LA RENA DOMILA - DAL 1999 EL SITO VERONESE DEI VERONESI IN VERONESE

Cari veronesi, l'è passà un altro ano a Verona e semo riussì a védar completà un fraco de "òpere publiche"; s'a visto la prima corsa del filobus co' partensa a le ore 09.05 da San Michél el 25 noémbre, l'arsenàl l'è stà sistemà, Castèl San Piéro el g'a finalmente el so museo, Palasso del Capitanio e i Scavi Scaligeri con el çentro de fotografia 'pena 'inaugurà e tante inissiative culturali che le sconde le classiche manifestassioni magna e bévi sparse par la çità....  me son sveià, l'éra un sogno.... Cari Veronesi dal 31 deçémbre al primo genàr no cambia un casso, t'è finìdo un ano de merda e te pol scominsiàrghene un altro de istesso... Verona l'éra ferma prima e la sarà ferma dimàn. Un proèrbio diséa: "Chi vive sperando el more cagando", un proérbio che a Verona l'è sempre de moda. El prossimo sogno l'è el nóvo stadio, seitàndo a speràr... Bon ano? De cosa? La sopravivensa l'è l'unica cosa che te serve. I schèi no i fa la feliçità? Prova a no vèrghene gnanca uno, te vedarè. El 2019, l'è stà l'Annus Horribilis de la veronesità, Giorgio Gioco e Roberto Puliero i-è sgolà in çiél ma par fortuna, che La Rena Domila, l'è ancora in vita nel portàr denànsi le tradissioni veronesi e nel ricordàr  quel fato da 'ste do grandi persone. El nostro sito g'avù un ano de sodisfassioni, la stampa l'à parlà dei vint'ani del sito, tanti veronesi s'a complimentà par el nostro laóro, par uno dei siti piassè veci de Verona che porta avanti la nostra cultura. I grupi su feisbuc iè vegnù tuti dopo, parfìn el quotidiàn de la nostra çità su internet. Dovì tegnerlo presente e savér che tante 'olte çerti siti e "amiçi" de FB i ne ciava el nostro materiàl publicà, parché pochi i-è boni de portàr denànsi le tradissioni veronesi come femo noàntri. Gh'è bisòn de l'aiuto de tuti, a 'olte basta poco, dieserighe, le stesse che magari scrivì drento a pagine de sociàl che dimàn no le ghe sarà più. Qua tuto l'è a la luçe del sol e sempre disponibile. 1999-2020 nissuni l'è come La Rena Domila! Bon 2020... (Verona deçembre .2019 - El Diretór)