LA RENA DOMILA - DAL 1999 EL SITO VERONESE DEI VERONESI IN VERONESE

No l'è una novità, la maleducassion gh'è sempre stà e sempre ghe sarà. I furbi, quéi che no varda le regole i gh'è sempre stà e le Istitussioni? Le Istitussioni dovarìa far calcòssa, no solo dar multe par divieto de sosta in Borgo Milàn, parché la çità de Verona merita rispéto. La çità storica porta schéi co' el turismo, ma védar suv parchegià de sera in Piassa Erbe e compagnie de butéi co' el bicér in man paroni de la piassa, fa giràr le bale come un mòscolo. Gh'è ostarìe grandi come un francobol e zénte che beve in strada, che fa ciàsso. Caro oste, no stà lamentarte che ci vive de sora a ti el possa infufarse e ti caro Sindaco te devi far ordine, gh'è dei posti par sentarse, par ciacolàr co' amiçi e vardàr le belesse de la çità, tuto quél che vién consumà fora dal "plateatico", in particolàr co' in man el bicér de vero de l'ostarìa, l'è da cosiderarse "ocupassion" e quindi l'è giusto dar multe. Ne risulta e sperémo sia 'na barseléta, che gh'è zénte che paga tasse parché un vaso de fiori tacà via, del so ristorante, fa ombrìa sul terén comunàl, par ocupassion. Sarìa du pesi e do misure se fusse vera! Quél sucesso in questi giorni, dopo la quarantena del Coronavirus, 'ndoe Piassa Erbe l'è stà scambià da compagnie de butéi par Cà del Bò, no l'è una novità. Cosa gh'éra de diverso staolta? I bicéri de plastica par tera, le pissade o el vin spanpanà su la Piassa, la distansa de 0 cm l'uno da l'altro, la màscherina anti-virus sui cavéi ecc. L'unica cosa istessa vardando a genàr prima de la quarantena, podémo dir la maleducassion. Caro Sindaco, ghe vol "ordine e dissiplina" in çità par valorisàr la nostra storia, quindi, cavàr le auto, bici e moto parchegià ne le vie storiche, in particolàr 'ndoe passa un fraco de turisti e sistemarle in qualche via più sconta no come gh'è in Piassa de le Poste! I cassoneti i deve èssar sconti soto tera no in vista. Ordine! El çentro no l'è una discoteca, co' la musica a tuto volume sparà fora da le ostarìe. Ghe vol musica e eventi culturali che i se sposa co' la storia! Ordine e bona educassion.....  El Diretòr 24.05.2020)