El 22°canpionato ai Fioi del Bandàr_LR Notissie

22° canpionato
22° canpionato
El 22°canpionato ai Fioi del Bandàr

El canpionato dopo ani el ris-ciava de no partìr, poca voia par colpa del Coronavirus, ma le squadre i-éra tute dacordo sul fato, che bisognàva parteçipàr. El virus no podéa scancelàr la voia de zugàr, de far quel che émo sempre fato par ani. L'oroloio in quarantena el paréa fermo, le giornade tute istesse ma l'unica cosa che te faséa passàr le ore l'éra propio el canpionato. La premiassion no l'è stà fata come al solito, in compagnia, denànsi a un bon risoto co' el tastasàl e questo el n'a fato tornàr co' pié par tera a pensàr al virus e a quante cose te pol pérdar. Cossìta el nostro diretòr l'à messo su una direta streaming (strimin) su Youtube (iutub) con tanta zénte pronta a scoltàr e védar la classifica finàl, con do parole in ciat, No l'è stà el massimo, parché darse un strucon de persona l'è un altra cosa, ma almanco grassie a le foto de le squadre se podéa ricordarse de ci i altri ani l'è stà sempre presente. Dopo ani de bèi piassamenti dal 2000, "I Fioi del bandàr" i-è riussì a vénsàr con gran merito, tiràndo fora una gran poesia finàl e intivàndo la dimanda sul carnevàl che g'à provocà un teremoto, in un canpionato che paréa la borsa de Milàn co' alti e bassi in classifica. Al secondo posto co' l'asse de cope, le Ave Mate, tra le squadre più forti dei ultimi ani, sempre pronte a completàr el servissio de "sece". Al terso posto Elkjaer Sindaco, sempre sul podio, ma st'ano, co'in scarséla un Premio Barbarani in più. Le squadre dei veronesi nel mondo i-é riussì a far la so figura, in un canpionato sempre pién de sorprese- El Premio Sinpatia par el nome piassé bel de la competission a "Péssega che l'è stròo". Sperémo che'l canpionato el vaga sempre avanti, parché oltre a tegnér alte le tradissioni, la léngua e la storia, tién alto el senso de faméia e de comunità de ci parteçipa......  (La Rena Domila 31.05.2020) - Premiassion 2020 in streaming Youtube - Risposte terso turno e Classifica finàl





Pin It