LA RENA DOMILA - DAL 1999 EL SITO VERONESE DEI VERONESI IN VERONESE

Ma semo sicuri che, el vero pericolo de la montagna veronese vién da un s-ciàpo de lòvi? L'è la dimanda che me fasso ogni 'olta che vago in montagna a far quatro passi. In particolàr ne la Valdàdese, se pol notàr come la tera vién remissià lóngo i sentieri dal porco sengiàr conossù da tuti come "cinghiale" o "Sus scrofa scrofa". Nei ultimi ani émo notà che anca poco distante da Verona, dopo Aesa, se pol catàr questa bestia, che 'ndòe la passa, lassa el segno. Ma a forsa de far fiòi, i se stà spostando verso l'alta montagna e i grandi pascoli, sassinàndo i prà come quéi del Monte Baldo l'Hortus Europae, 'ndòe cresse fiori particolari conossù in tuto el mondo come el Calliantheumum kerneranum, el Carex baldensis e Kanutia baldensis. Ma parché gh'è cossìta tanti porchi sengiàri? A quanto i dise, tempo fa, calchedùn g'avù la béla idea te portàrghene un bel nùmaro in Italia; capìr se in maniera legàl o no legàl, penso sia compito de le Autorità co'tanto de prove. Quindi, quéi che magari magnémo nei ristoranti o agriturismi no i-é del tuto nostrani parché l'è stà incrosà la ròia de l'est Europa "Sus scrofa domesticus" co' el nostro porco sengiàr "Sus scrofa scrofa". El risultado? Semo passà da un esemplàr che faséa tri-quatro fiòi che podéa rivàr a 70-80 kg a diése-dódese fiòi che pol sgrandarse e pesàr fin a un par de quintài. Ci vive in contré fóra man el g'à paura e anca quéi che coltiva le vigne o g'a pascoli con prà deventà sensa erba, no i se le passa mèio. Quando i se móve te pàr de védar i bùfali mericàni ne la prateria del Minnesota e védarli da vissìn posso dirve che no fa piasér. I regolamenti de la Provinçia e de la Región del Veneto par copàr le bestie, da 'na parte aiuta la categoria dei cassàdori, ma da l'altra no riesse a fermàr la riprodussión de la bestia deventà fóra contròl. La notissia positiva l'è che de lóvi se ne vede manco e magari nel tempo ghe toca cambiàr posto. Parò ci vive ne la montagna veronese no l'è contento visto che de rogne ghe n'è più de una a parte el çitadìn che'l va a pestàr el terén montano a la dominica lassando le sgauie nei "pré". Faséndo dó ciàcole co' un cassadór, ne diséa che quando el ghe dà una s-ciopetà a 'na bestia cossìta grossa, l'è façile da ciapàr ma l'è difiçile da portàr a casa, visto quanto la pésa. Vedémo come la va a finìr'sta storia, ma posso dirVe, che nei ultimi ani ghe n'ò visti sempre de più e la cosa par no 'vérghe fine......  (El Diretòr 01.07.2020)