La storia quertà_LR Notissie

La storia quertà
La storia quertà
La storia quertà

Quando piòe gh'è el pericolo che tòchi de strade e piasse deventa dei laghi; cossita a Porta Borsari le botèghe se cata in Piassa San Marco a Venessia co' l'aqua ai zenoci in poche ore. Ma staòlta s'a pensà de sistemàr el problema, ma a quanto par, l'intervento "tènico" l'è servìdo poco. Fato stà, che par sistemàr i servissi aqua e fogna co' tuto quél che ghe va drio, s'a dovù scavàr su l'antica via Postumia, ma catàndo, no le piére romane de la strada ma 'na mura de epoca Gota, e no del romàn Gallieno, che in verità l'è stà costruì dal grande Re Teodorico, un "avancorpo difensivo". Nei ani '90 i du archeologi Peter Hudson e Giuliana Cavalieri Manasse quando i-avéa visto dei tochétini de mura sempre a la Porta, i g'a dito in pressia che lì gh'éra calcòssa de Teodorico, ma el risultado l'è stesso, quertàr tuto come in Corso Cavour con la via Postumia. Nel mondo, quanti vorìa 'verghe la storia, l'arte e la cultura italiana? Parché la nostra storia no vién porta a la luçe del sol, ma quertà? Fóra da l'Italia, co' gnente i fa le mostre che i te le fa pagàr un ocio de la testa, qua no sémo bóni de valorisàr quel che gh'émo e che l'è 100 'òlte mèio! Noàntri valorisémo le auto e le partìe de balòn ma no quél che pól portàr turismo e laòro in tempi de merda-virus. Che bèlo sarìa védar la via Postumia tuti i giorni, ma restarà un sogno. Fémo i titoloni sui giornài de un calcòssa che se savéa, come se, el scavo e la scoèrta, fusse stà opera del sindaco. Quertémo, quertémo tuto! Sarìa bèlo quertàr l'ignoransa ogni tanto ma se preferisse restàr dei mussi e quertàr la nostra storia......  (La Redassion 15.07.2020)





Pin It