Verona soto aqua _LR Notissie

Verona soto aqua
Verona soto aqua
Verona sóto aqua

Noàntri no parlémo mai de politica, ma de tuto quél che gh'è de bèlo nel Veronese, in questo caso de bèlo gh'è solo un ricordo, quél ricordo dei "mile" e no fémo riferimento a Garibaldi ma a le piante cascà in téra come sora a un campo de batàlia, in una tragica dominica de agosto. G'a piovù a séce roérse da la Valpoleséla a Porta Vescovo, passàndo par Borgo Trento, Veroneta e le Toreséle dopo che la tompésta la g'a stupà le fogne, quéle fogne che se stùpa sempre co' quatro schèi de pióva. L'aqua la s'a alsà a livél de la piena de l'Adese del 1882 in particolàr a San Stèfano 'ndóe 'na stimàna prima un temporàl g'a fato visita. Se vardémo Viàl Colombo da piassé de 50 ani devénta come el Garda se pióve bén, come a Porta Borsari ndóe ultimamente i g'a messo man. Cambia le aministrassioni, cambia i sindaci ma i problemi i-è sempre quéi, se in più, el clima mondiàl cambia e se catémo ai Tropiçi, la fritàia l'è fata. 'Desso bisón métarghe un tacón qua e là, parché sistemàr tuta la rete fognarìa ghe vol almanco 70-80 milioni de euri, e questi schèi no i gh'è. A parte el famoso 17 setémbre 1882, par molti veronesi el 23 de agosto del 2020, restarà un giorno da no desméntegàr. No se pól darghe la colpa a l'ultimo sindaco par una roba cossìta ecessionàl, ma no se pol seitàr a dar la colpa al sindaco che gh'éra prima. Quando un veronese devénta sindaco dovarìa, in teoria, far védar, che lu el fa de méio. Ma se i problemi i-è sempre quéi, che no vién risolti come se deve, tra 5 sindaci, némo in gondola par la çità. Disémo che magari bisognarìa spéndar quatro schèi par 'ste robe e no par una coriera co' le tiràche che probabilmente pol èssar utile come la nutella sora la pearà!......  (El Diretòr 24.08.2020)





Pin It