LA RENA DOMILA - DAL 1999 EL SITO VERONESE DEI VERONESI IN VERONESE

Par capìr el valór de la cultura bisognarìa savér cosa l'è, ma come al solito Verona la g'a perso una grande ocasión par demostrarlo. Tuti ghe dà colpa al Sindaco parché la nostra çità no l'è riussì a entràr ne la finàl de le 10 località italiane, da ndóe el 15 de genàr, vegnarà fóra el nome de ci nel 2022 sarà Capitàl d'Italia de la cultura. Se vardémo ci gh'è in finàl, ne casca i brassi e le bale in téra, parché Verona, podéa fàrghela benissimo, Ancona, Bari, Cerveteri (Roma), L’Aquila, Pieve De Soligo (Treviso), Procida (Napoli), Taranto, Trapani, Verbania (Verbano-Cusio-Ossola), Volterra (Pisa). No l'è stà portà in giudissio un idea come se deve e quindi 2000 ani de storia i-è stà butà del cesso. Se no fusse passà romani, scaligeri, venessiani e austriaçi, Verona sarìa solo 'na çità de çimento e sensa ànema, parché no semo bóni de darghe la giusta visibilità al nostro patrimonio eredità, figuremose a far qualcosa de nóvo come un filobus o un traforo. Semo bèi e bravi parché gh'émo un riconossimento UNESCO, ma che no conossémo el so vero valór, come no se conosse el valór dei quadri ciavà a Castélvècio. Par aministràr una çità no serve solo la bóna volontà, bisón vérghe una çérta visión a 360°, culturàl, finansiaria e turistica. Quindi il sindaco el fà el so làoro, gnente da dir, come quél de un aministradór de condominio a casa tua. La so giunta comunàl l'è tuta farina del so saco e quindi, a far i assessori el g'a messo, òmeni e dóne che secondo el so giudissio podéa far al caso. El problema l'è quèl, ci èlo el sindaco? Qual'érelo el so curriculum vitae prima de le elessioni? E de conseguensa, che valór g'a el so giudissio? Se uno el se spetàva dei risultati diversi, beh alora, no dovéa votarlo! El problema l'è, che, ghe va de mèso anca quéi che no i g'a votà el sindaco. Par far eventi culturali, bisón 'verghe una bona cultura personàl costruì in ani e ani, parché cossìta no se ris-cia che i risultadi i pòssa èssar scarsi come questi. No basta crédar de savér, bisón savér e far! In pratica a ognuno el so làoro, mi defàti fasso cultura ma no el sindaco. Quindi se parte dal primo çitadìn che ghe méte i so assessori in Comùn, secondo i so gusti, lóri i va a créar eventi co' persone che se crede Dante o Sèspir e che magari i g'a la spariénsa maurà nei ciòstri e ne le corteséle de paese e no nei grandi teatri. St'an che vién par i 700 ani da la morte de Dante, se pensa a dei eventi culturali, el problema con ci e come. Secondo mi ghe vol artisti e atóri de livél nassionàl o mondiàl come co' la lirica drénto la rena, parché la cultura porta turismo e schèi, sensa qualità podarìa saltàr fóra una "Comedia poco divina". Se un evento ndóe te magni e bevi o un zugo portà in strada devénta una de le manifestassioni piassé importanti de Verona, par quanto possa 'vérghe 'na nina de cultura, semo messi mal, l'importante parò l'è portàr voti. Le manifestassioni culturali fóra da Verona i-è ben altre soratuto de qualità, da noàntri conta "l'usàdo sicuro", i soliti nomi e le solite cose, faséndo de tuto par nascòndar ci garantisse livél e qualità, l'importànte i-è le ciàcole. Se l'émo, ciapà nel cul, un motivo ghe sarà! p.s.co' tuto el rispeto par Cerveteri, Volterra, Pieve de Soligo, ma come se fà ciapàrla nel de drio da 'ste località che no i-è gnanca çità? L'è come se a balón el Real Madrid perdesse in casa co' el Ceo!.... (El Diretór 25.11.2020)