Bon 2021 dal Diretor_LR Notissie

Bon 2021 dal Diretor_LR Notissie
Bon 2021 dal Diretor_LR Notissie
Bon 2021 dal Diretòr

Cari veronesi émo lassà un ano de merda drio a le spale, el 2020, co' un virus maledéto, 'desso ne spéta l'ano de la speransa e de la rinassita, i dise, grassie al vaçìn. Sperànsa l'è la parola giusta basta come el ministro. Par Verona, no gh'è tanto da dir par l'ano passà, gnénte de nóvo. La nostra aministrassión comunàl pol tiràr fora la scusa del Virus se tante cose no i-é stà finìe, come el famoso filobus, cantieri ancora spampanadi in çità, co' una probabile piéra sora al progeto. Una cosa che pósso dir, co' la man sul cór, l'è el risultado disastroso de la cultura a Verona, el spècio de la çità dei ultimi 20 ani che varda sempre a le istessa manifestassioni e la definisse cultura el zùgo de la péta. La nostra çità patrimonio de l'UNESCO, no l'è tra le 10 finaliste par deventàr capitàl de la cultura italiana, al so posto ghe sarà una tra Ancona, Bari, Cerveteri (Roma), L’Aquila, Pieve De Soligo (Treviso), Procida (Napoli), Taranto, Trapani, Verbania (Verbano-Cusio-Ossola), Volterra (Pisa). L'importante nel 2021 l'è comemoràr i 700 ani de la morte de Dante Alighieri; se le manifestassioni par el sommo poeta le fusse veramente a l'altessa de la situassión, probabilmente Verona sarìa capitàl de la cultura nel 2022. Daltronde grandi nomi che pol interpretar Dante a Verona no ghe n'è e se va sempre su l'usà sicuro locàl, quèi che crede de èssar el sommo ma che magari fin a ieri i se esibiva nel teatro parochiàl; el Comùn deve vardàr el bilancio in tempi de magra e quindi, va ben tuto! De Dante ghe n'è uno solo. El "Sommo Poeta" l'è simbolo de la léngua Italiana, pecà che tanti i preferisse le parole inglesi par ciacolàr e farse védar brai, desmentegàndo l'italiàn e magàri butàndo nel cantón el dialéto; noàntri inveçe ciacolémo in veronese co' el cantór Barbarani parché a noàntri ne interessa salvàr la léngua dei nostri vèci. L'Aministrassión Comunàl no se rende conto de la galassia de associassioni, de volontari e de studiosi de alto livèl che gh'è ne la rete culturàl Veronese, fermandose, come dito, ai soliti nomi. Questo el g'a provocà o l'è una de le tante cause, del disastro par el discorso "Verona capitàl de la cultùra". Ma vardémo in casa nostra, su La Rena Domila, st'ano émo superà i 400 min. de conferense de la tradissión con Radio Scarpa TV e vérto la nóa rubrica del Filò, sensa contàr che'l Museo Barbarani l'è deventà piassé grande. No podémo desmentegàrse de la riçerca storica sui pascoli de la Lessinia, durà 3 mesi de laóro. El nostro archivio e la biblioteca le pol contàr su nóvo materiàl, el 10% piassé che l'è stà publicà su Feisbuc e sul sito. Nel 2021 ghe sarà tante novità come la nóa Rubrica de Foto "Téra Bassa". Varda La Rena Domila, el sito de la tradissión!..Bon 2021!.. (El Diretór 31.12.2020)





Pin It