LA RENA DOMILA - DAL 1999 EL SITO VERONESE DEI VERONESI IN VERONESE

Ogni tanto pol capitàr che i giornài parla de La Rena Domila, ma staòlta el giornalista Lorenso Fabiano l'a fato piassè, capìr cosa gh'è drio al sito, parché l'è nato, i segreti, la vita del Diretòr e soratuto come pol restàr in piè dopo piassè de 20 ani. Sul Coriere de Verona de dominica 18 lùio gh'è tute le risposte a queste dimande. Quando l'è 'nata La Rena Domila, tanti veronesi che ne lése, no i savéa cosa l'éra internet, par navigàr ghe voléa schèi e destacàr la linea telefonica de casa, tacàr el modem a carbonèla, giusto el tempo par dar un ociàda. I siti g'avéa contenuti de valór, gestìdi da università e da qualche istitussión, no gh'éra i social 'ndóe la zénte la dise tuto quél che la vol; in póche parole, in primis la qualità a parte i siti porno che la zénte credéa ghe fusse a video 'pena te tacàvi el modem; internet visto come el diàolo da quéle stésse persone che 'desso le g'a 70 ani e le sèita a far "gruppi" Feisbuc. Butàrse in questo mondo sconossudo no l'è stà "rose e viole", ma quando te si sensa laóro te provi altre strade. Te studi, te crompi i libri e te vardi in giro se qualche to amigo pol savér, come far su do pié un sito internet. Dopo 3 pagine, te podéi sentirte un re, rivàr a 400-500 l'è 'stà incredibile. Son partìo con gnénte, con zénte che me diséa de seràr tuto parché no gh'éra futuro, defàti grassie a lóri La Rena l'è stà serà el 31 dicémbre 1999 e vèrta da nóvo co' el nome La Rena Domìla el primo de genàr, prima del quotidiàn çitadìn. Co' l'aiuto de l'amigo Giorgio Gioco del ristorante 12 Apostoli l'è partìa la storia che tuti podì conóssar e portà inànsi da solo par tuti quésti ani par quéi veronesi che dal 1999 i sèita a darghe un ociàda. Le Istitussioni nassionàli come el MIBACT (Min.Cultura) le g'a riconossù a La Rena Domila el so valór culturàl con quatro righe sul sito del Ministero. El Comùn de Verona no g'a mai dato el giusto péso a quél fato par i veronesi de çità e del mondo a gratis, mi no preténdo gnénte, un riconossimento sarìa el premio a ci ne varda, 18 milioni de pagine visità no iè póche in tuti quésti ani, su La Rena Domìla la cultura vién fata 365 giorni l'ano sensa l'aiuto de le istitussioni e quindi.... mùso duro e baréta fracà! p.s. come stàr in piè par ani? El segreto l'è costansa, passión e farte i cassi tói...(El Diretòr 18.07.2021)