Festival sensa Parco _LRNotissie

Festival sensa Parco
Festival sensa Parco
Festival sensa Parco
Tra le curiosità veronesi, nel 2021 podémo contàr, come se lése sui giornài, anca sul "gesto atletico" de l'Ente co' sede a Bosco C.N. del Parco Regionàl de la Lessinia che st'ano dopo 26 edissioni no g'a volù contribuìr al Film Festival de la montagna. Una manifestassión che valorìsa no solo el nostro teritorio ma che varda piassè in là. Defàti l'archivio dei 1300 film jè conservè propio ne la sede del Parco. Le dimande che se sémo fati in 'sti giorni de festival jè tante. Parché un Ente che dovarìa far promossión de la propia tèra, mòla, dopo tuti 'sti ani, una manifestassión de 'sto tipo che pol valorisarla? Forsi bisognarìa valorisàr piassè la nostra montagna e manco quéle dei altri, co' proiessioni solo lessiniche? O l'Ente vol organisarla da solo, cavandoghéla a ci le organisa da ani, e magari faséndo piassè fadìga? El problema a 'sto pónto, l'è ci gestisse l'Organisassión o l'è solo un problema de schèi in un periodo de mèrda? Ma vol dir che par l'Ente, bisón utilisàr i schèi par far robe piassè importanti? In 'sto caso el Festival, no sarìa cossita importante come se pensa e no l'è ritegnù un mèso de promossión. In tuti 'sti ani jè stè butà via i schèi? L'è véra che le Istitussioni tante 'òlte jè lontane dal çitadìn, in quésto caso se ris-cia veramente che nei prossimi ani anca altri enti che i g'a contribuì i mòla anca lóri, anca parché se mòla l'Ente del Parco che dovarìa èssar in mèso a la manifestassión, figuremose i altri. Le conseguense par un festival de promossión le podarià èssar brute e sensa ritorno, deventàr piassè picenin o scancelà. Organisàr un festival de 'sto tipo sensa l'Ente 'ndóe el vive, l'è un ciaro messàjo de calcossa che no va, parché se pol contribuir anca co' póchi schèi. Quali pol èssar le motivassioni e soratuto le colpe, visto che tante 'òlte no l'è mai colpa de uno solo? Noàntri de La Rena Domila érimo presenti a Badia Calavena par la proiessión del grandioso docufilm de Mauro Quattrina su la cultura cimbra co' el so "Tauciàs Gareida", realisà con el contributo anca de l'Ente Parco e se sémo dimandà, parché el regista no l'è stà invità al festival lessinico visto che'l film l'è stà presentà anca a la mostra del Cinema de Venessia? Parché un Ente contribuisse a un docufilm e no a un festival con piassè de 50 film 'ndoe pol starghe anca l'opera de Quattrina? Cosa pol èssar sucesso tra Ente e Festival? Le dimande jè tante e sperémo de 'vérghe de le risposte... (La Redassion)





Pin It