LA RENA DOMILA - DAL 1999 EL SITO VERONESE DEI VERONESI IN VERONESE

Tuti g'avémo vóia de tornàr a gòdarse dopo ani de Coranavirus, 'ndóe émo visto zénte malà, zénte che l'è sgolà in çiél, zénte serà su in casa e zénte che la g'a perso el laóro. 'Désso par che tuto sia finido, ma se ciàcola al Goèrno, dela tèrsa sponciàda de vaçìn. Invésse a Verona dopo el "Tocatì" in çità, par la fin de otobre gh'è el Carneàl, giusto par no star taché a i altri co' el ris-cio de passarse el virus. Forsi, el virus no'l gh'è solo quando gh'è interessi de mèso. A tal proposito, volémo savér, se la manifestassión la vién fata sensa el contributo del Comùn, ma ne par strano che el can móe la cóa par gnénte in particolàr co' le elessioni del sindaco drio a la porta nel 2022. Ogni fruto g'a la so staión, tanto che, el Papà del Gnóco co' la barba bianca podarìa èssar scambià par "San Nicola o Claus" se al 30 de otobre tirémo i coriandoli. Parché spéndar schèi par 'na roba che in 'sto momento no serve un casso? De solito i contributi del Comùn par i eventi iè zà a Bilancio, in pratica se no te spendi i vién giràdi par altre manifestassioni magari piassè importanti. Che sia questo el caso? (La Redassión 23.09.2021)