El Docufilm de Guido Keller
El Docufilm de Guido Keller

Nissuni finora l'éra riussì in un impresa de 'sto tipo, realisàr el docufilm "Ali ribelli" su Guido Keller "l'asso" dei çiéli ne la prima guera mondiàl amigo de Francesco Baracca che el g'a parteçipà anca a l'impresa de Fiume de Gabriele D'Annunzio. Grassie a l'Associassión Culturàl StoriaViva e al so regista Mauro Vittorio Quattrina l'è nato un "opera" de valór che ne porta a la scoèrta de un sogèto fóra come un balcón ma che restarà uno dei "grandi" che dovarìa èssar ricordà mèio par le so imprese. Póchi veronesi i s'a che Guido el g'avéa catà un terén a le Vessarde "Vezzarde" de Sant'Ana d'Alfaedo ndóe costruìr 'na pista par i 'reoplani utilisà come scalo militàr a metà tra el 'reoporto de Tombeta e 'l confìn austriaco e tra l'altro fóra da la nèbia. El Docufilm podarìa vìnsar el David de Donatello "l'oscar italiàn del cine" nel 2022 e par la Lessinia sarìa un calcossa de ecessionàl e de promossión. El regista el g'a presentà la so opera, no solo ne la "casa" de D'annunzio al Vitoriàl de Gardón Riviera ma anca a Sant'Ana. El giorno 5 decémbre a la prima proiessión veronese gh'éra anca La Rena Domila, che pol dirVe de quanto l'è bèlo el filmato, in particolàr le riprese sóra la Lessinia con un drone, spiegà in maniéra che tuti i rièssa a capir. Un ora 'ndóe podì capìr la vita, le imprese de Guido Keller e la storia italiana. Par info sul filmato, podì scrìvar a storiavivaitalia@libero.it....(El Diretòr 06.12.2021)