LA RENA DOMILA - DAL 1999 EL SITO VERONESE DEI VERONESI IN VERONESE

El virus da un par de ani el ne stà rompendo i maroni e par quanto ghe sia el vaçìn a darne 'na man, semo sempre ne la merda, cossìta, semo qua a dirghe pèste e corna a ci no se fa la prima dose, convinti che, grassie a lóri, el virus el cata posto tra la zénte. Nel fratempo se impenìsse i reparti covid dei ospedài co' relative terapie intensive e par quanto ghe sia chirurghi a disposissión gh'è ci dise che bóna parte dei anestesisti e infermieri i vién sacrificadi par l'emergensa in questión (poarèti). Cossita la chirurgia, la funsiona par i casi piassè gravi, ma par i casi manco rognosi se va 'vanti come 'na bogonèla e forsi anca piassè pian. Ve contémo, l'odissea del nostro diretor che'l spèta de èssar operà da l'aprìl 2020 par 'na serie de ernie, che in molti casi ghe dà problemi par laoràr. Dopo avér spetà 4 mesi i ghe dise de far i esami pre-operatori ma par colpa del virus tornà piassè forte in autùno, vién rimandà l'intervento a un giorno sconossudo. Passà un ano, 'ndóe nissuni savéa gnénte, parché prima de lu gh'éra i casi piassè gravi, al 7 deçémbre 2021 vién ciamà par rifàr i esami, ormai scadù, come contestà da la Región Veneto (questo dito da la segreteria de la chirurgia generàl). A la visita con el chirurgo ghe vién controlà se in questo ano e mèso le 2 ernie le fusse deventà 3 o 4, ma dei esami pre-operatori el chirurgo no ghe ne parla. In data 21 decémbre 2021 la segreteria de la "chirurgia del gotiór e stómego" ghe dimanda al nostro diretór se el chirurgo el g'a fissà la data per i esami pre operatori, altrimenti se córe el ris-cio de èssar mésso in cóa e quindi de èssar operà in una data ancora piassè sconossuda e de avér spetà fin 'desso par gnénte. Nel fratempo el Diretór no'l stà bén. Questa storia la vol rapresentàr la situassión nei ospedài, in bóna parte a disposissión par lotàr contro el virus ma che desmèntega i altri casi che i ris-cia de deventàr piassè pericolosi, 'ndóe la Region dise che i nostri ospedài iè i mèio contro el Covid, bén savéndo che i reparti i deve èssar organisà in altro modo magari seràndoli e contestando i ospedài parché gh'è ritardi e bisón far da nóvo i esami. Ma no se podéa tegnér verto almanco un ospedàl par le robe piassè semplici? La Región no la g'a in man i nostri ospedai? La se contesta da sola? Un bèl casìn, se no l'è cossìta spetémo una parola in merito e soratuto una data par l'operassión! La Redassión (Verona 21.12.2021)