Oròscopo del Divìn Pojàna 2022_ LR Notissie
El nóvo 'Ròscopo Veronese del Pojàna, el Divìn che'l varda le stéle e i pianeti sóra a Verona par dar una interpretassión de qual podarà èssar, el destìn de l'òmo su la tera nel 2022. No l'è un semplice 'stròlogo. El Zodiaco Veronese tra i più vèci in Italia, studià par secoli e presente su La Rena Domila in ciàve moderna co' Moltón, Tòro, Zuméi, Moléca, León, Giuliéta, Balànsa, Scarpión, Cavalón, Cavrón, Garda, Àole. Par ogni segno del Zodiaco gh'è un colór che te porta positività, fortuna, schéi e salute nei momenti 'ndóe le robe le va mal. El Divìn Pojàna te dise la verità, no l'è falso. Varda Verona, varda le stéle co' Divìn Pojàna.
> Moltón 21 marso - 22 aprìl
Moltón
Grassie a Giove, el Moltón pól métar su faméia co' la so pegoréta e ci l'è da solo no ghe resta che far schèi. Se par caso l'è da vint'ani che no te vedi un to caro amìgo dopo una barùfa, te pól védarlo ma... a distansa, tanto la to vita l'è andà 'vanti sénsa de lù. A fine ano, el to mestièr sarà quél del Michelasso, magnàr, béar e 'nar a spasso.
genàr * *
febràr * *
marso * *
aprìl * * *
màio * * *
dugno * * * *
luio * * * *
agosto * * * *
setémbre * * *
otobre * * * *
noémbre * * *
decémbre * * *
colór: Àdese
> Tòro 23 aprìl - 22 màio
Tòro
El nóvo ano scominsia come l'è finìo quél prima...de merda, ma da dugno se vedarà le bale del Toro, nel laóro e ne l'amor. Da setémbre l'è mèio cavarse quàlche sasséto da le scarpe e sicuramente i to amiçi i te dirà che te g'avéi rasón, tanto la rasón l'è dei mussi! In salute, tuto va bén, anca se i livéi del colesterolo iè rivè fin a Saturno, te pol far su el mas-cio ma no magnàrlo.
genàr *
febràr *
marso * *
aprìl * *
màio * *
dugno * * * * *
luio * * * * *
agosto * * * * *
setémbre * * *
otobre * *
noémbre *
decémbre *
colór: giàrón
> Zumèi 23 màio - 22 dùgno
Zumèi
Basta pirlàr come un mòscolo ne le rotonde de Corso Milàn ciapa la Tangensiàl e tira drito, l'è ora de far védar ci te si. Se te magni una pasta e fasói te speri de nar su Saturno, ma forsi, l'è tanto se te parti da Vilafranca e te rivi a Boscomantico. Salute, co' tuti i asterischi ne le analisi, el Covid l'è l'ultimo dei to problemi.
genàr *
febràr *
marso * *
aprìl * *
màio * *
dugno * * *
luio * * *
agosto * * *
setémbre * * *
otobre * *
noémbre *
decémbre *
colór: Mandolàto de Cologna
> Molèca 23 dugno - 22 lùio
Molèca
In amór grassie a Giove, a fine ano, te catarè el to òmo/dòna dei sogni, basta oltàr el galón e seitàr a ronchesàr. Da dugno te pol viagiàr e nar a l'èstaro, ma visto i schèi ne la musìna, San Marino podarìa èssar la mèta piassè probabile. Nel laóro par 'verghe una promossion te devi lecàr el cul al to capo e no in senso figurà, dùgno el mese par darse da far co' la vaselina.
genàr *
febràr * *
marso * *
aprìl * *
màio * *
dugno * * * *
luio * * * *
agosto * * *
setémbre * * *
otobre * *
noémbre *
decémbre *
colór: Sirésa de Cassàn
> León 23 luio - 22 agosto
León
El léon de San Marco che gh'è in ti, a febràr devénta un gato viséntìn, l'ano scomìnsia co' la luna de traérso, ma Saturno che l'è in León pol portarte ancora piassè sfiga. Da màio grassie a Giove, te podarè vìnsar al SuperEnaloto sensa zugàr la schedina, In amór gnénte de nóvo, ci l'è sposà da vint'ani oramai l'è rassegnà e ci l'è da par lu/éla l'è rassegnà.
genàr *
febràr *
marso * *
aprìl * *
màio * * * *
dugno * * * *
luio * *
agosto * *
setémbre * *
otobre * *
noémbre * *
decémbre *
colór: Pàia da luamàr
> Giulieta 23 agosto - 22 setembre
Giuliéta
El 2021 l'è finì mal, el 2022 pol scominsiàr solo che pèso, grassie a Giove che spaca le ultime bale restà sora l'àlbaro de Nadàl. Sul laóro te pol far le robe sensa spacàrse la schèna, basta métarse in malatìa e far laoràr un altro al posto tuo, Voia de laoràr sàlteme 'dosso... L'è un ano da capìr cosa far ne la vita, te pol cromparte casa a marso, i mobili d'arte a Zaréa a lùio e visto che gh'è Giove in trigono te pol nar a starghe a decémbre. Salute, mèio del 2021, ma forsi ghe vol póco.
genàr *
febràr *
marso * *
aprìl * *
màio * * * *
dugno * * * *
luio * * * *
agosto * * *
setémbre * *
otobre * * *
noémbre * *
decémbre * * *
colór: Pandoro
> Balànsa 23 setémbre - 22 otóbre
Balànsa
Grassie a 'na mucia co' Giove, Saturno e Mercurio ogni tanto te pol farte notàr, a 'na festa o par strada, come una stéla che sluse nel çiél, pecà, che la luçe l'è blu e la s-ciantìsa come quéla de 'na volante, béar poco o dir de éssar passà co' el bianco... de Custòsa! Nel laóro te vegnaré ciamà in ufissio dal capo, mèio presentarse co' le scarpe sensa cordóni, podarìa rivàr un importante comunicassión quando te te cuci par ligàrteli. In amór te convién tor un bel ovo de strusso al posto de la famosa pastilìa blu par darghe drénto, òcio a no sbaiàr co' le pastilie dei freni.
genàr *
febràr *
marso * *
aprìl * *
màio * * * *
dugno * * * *
luio * * * *
agosto * * *
setémbre * *
otobre * * *
noémbre * *
decémbre * * *
colór: Bianco de Custòsa
> Scarpión 23 otóbre - 22 noémbre
Scarpión
Fin a dugno te pol far tuto quél che vol, anca el base jumping dal ponte de Veja co' l'àstico de le mudande o sgolàr co' un parapendio sbuso dai Colonei de Cavrìn. Nel laóro se te credi in ti e te ghe la méti tuta par far sempre mèio el to posto vegnarà ciavà dal solito lèca-cul. Forsi in istà, la fortuna vegnàra pestàndo una boàssa a Passo Fitànse.
genàr * * *
febràr * * *
marso * * *
aprìl * * * *
màio * * * * *
dugno * * * * *
luio * *
agosto * *
setémbre * *
otobre * *
noémbre * *
decémbre * *
colór: Téra giàla de la Valdonega
> Cavalón 23 noémbre - 21 decémbre
Cavalón
Grassie a Giove in Ariete che te darà sicuressa te podarè caminàr co' l'ombréla sbusa soto la pióva. In amór, no te vedi l'óra de sposarte a setémbre o aprìl ma una 'olta sposà, la vita sarà difarénte, 10 kg piassé in un mese; par ci l'è sensa morosa/o, gnènte paura, basta córar incontro a l'amór, tante òlte scónto de drio al cantón, òcio a no sbrissiàr descàlso sul pavimento móio e spacàrte la deolìna propio sul cantón.
genàr * * *
febràr * * *
marso * * *
aprìl * * * *
màio * * * * *
dugno * * * * *
luio * * *
agosto * * *
setémbre * *
otobre * * *
noémbre * * *
decémbre * * *
colór: Tortelìn de Valéso
> Cavrón 22 decémbre - 20 genàr
Cavrón
Dopo essarte inciucà con un bón Amarón nel 2021, la confusión ne la to testa no la gh'è più, te podarè far tuto quél che te vol, anca pissàr controvento sensa bagnarte. In amór se te speti 'na telefonada da 'na morosa o da un moroso 'pena lassà, te pol star sicuro/a che no te telefona e de sicuro no l'è gnanca Papa Bergoglio ma piassé probabile che'l sia fastueb; vérze riscaldà e morosa/o tornà no i-é mai bóne/i. Nel laóro te faré tanta strada...ma a pié da casa tua grassie a 'na busa del cantiér del filobus che t'a spacà la machina.
genàr * * *
febràr * *
marso * *
aprìl * * *
màio * *
dugno * * *
luio * * ^
agosto * *
setémbre * * * *
otobre * * *
noémbre * * * *
decémbre * * *
colór: Brocoléto de San Gioàni in val
> Garda 21 genàr - 19 febràr
Garda
Par ci l'è nato nel segno del Garda, grassie a Saturno, ghe tocarà sfadigàr, come portàr su la schéna una zérla impenìda de sassi da Bardolìn fin a Cima Telagrafo. In amór o nel laóro, ogni ano da setémbre a decémbre g'avì la speransa che co' l'ano nóvo, le cose le vaga al mèio, cossìta ghe sarà la tentassión de far nóe 'spariense come cusinàr la Pearà co' la Caponada Siciliana, ma ci vive sperando móre cantando.
genàr * *
febràr * * *
marso * *
aprìl * * *
màio * *
dugno * * * *
luio * * *
agosto * *
setémbre * * * *
otobre * * * *
noémbre * * * * *
decémbre * * *
colór: Schìto de colómbo de Piassa Dante
> Àole 20 febràr - 20 marso
Àole
Grassie a Giove tornà nel segno de le àole dopo piassè de dies'ani, te pol realisàr tuti i sogni nel càlto, prima parò cava i calséti col buso e le mudande in boléta. In amor nel mese de maio te podarè maridarte, anca regalando un gambo de rosa. Nel laoro, in certe situassioni, tièn duro, anca quando l'è molo.
genàr * * *
febràr * *
marso * *
aprìl * * *
màio * * * * *
dugno * * * *
luio * *
agosto * *
setémbre * *
otobre * * *
noémbre * * *
decémbre * * *
colór: Piéra Galìna de Àesa
| // Podarìa interessarte |
| Informassioni + La Rena Notissie, Speciali, Radio Scarpa + Spetàcoli & Teatro + Sagre + Marcà + Orari Messe + Fiere |