LA RENA DOMILA - DAL 1999 EL SITO VERONESE DEI VERONESI IN VERONESE

Cari veronesi vissini e lontani, nel mondo, semo rivè al 2022 con la speransa che l'ano novo el sia mèio del quél vècio, ma come sempre no cambia gnénte, come a Verona. L'unica speransa de védar calcossa de divérso l'è dal risultado de le prossime elessioni par el novo sindaco, ma par quanto ghe sia uno novo primo çitadìn, Verona l'è sempre ferma inciodà. No conta el colór politico, el risultado l'è sempre quél. Dovì pensàr che l'ultima granda opera realisà a Verona, l'è quéla del famoso soto-passo de Porta Nóva nel 1990. Anca nel 2021 come nel 2020, gh'émo la scusa del COVID e quindi no s'a podù far quél che se voléa e come sempre la colpa l'è de la precedente aministrassion. Se podéa far de più, ma forsi al pòro Sindaco ghe voléa altri 5 ani par podér finìr quél progetà, ma semo convinti che anca se'l restava in piè co' la so Giunta par altri 20 ani no cambiava un casso. Sensa ofése. Far poco o gnénte l'è un sucesso, i veronesi i-è abituadi a no védar gnénte de nóvo e quindi parché romparghe le bale co' le novità? S'a visto poco o gnénte anca par le celebrassioni dei 700 ani da la morte de Dante, con eventi e interpreti no propio de primo piàn, se podéa far de più anca par la cultura veronese lassà in man sempre ai soliti volontari, mai tegnù in considerassion dal Comùn. Noàntri de La Rena Domìla némo 'vanti par la nostra strada, come émo fato anca nel 2021 con grandi sodisfassioni. Ringrassiemo Simonetta Chesini par averne ospità a TeleNuovo, Giorgia Preti del Pantheon, Lorenzo Fabiano del Corriere de Verona, Ilaria Moro de L'Arena e Frank Zimmermann de Friburgo par i grandi articoli. Émo sgrandà la rubrica de Etimologia e dei modi de dir, che nel 2022 i farà parte de un novo progeto del sito. Novità anca par la Bassa Veronese... ma no voio dirve de più... varda la rena ghe ne val la pena, bon 2022 dal vostro diretor e da larenadomila!..Bon 2022!.. (El Diretór 31.12.2021)