LA RENA DOMILA - DAL 1999 EL SITO VERONESE DEI VERONESI IN VERONESE

Semo rivà al 24° canpionato del mondo de le tradissioni veronesi, un qualcosa de unico, difiçile da capìr se no se zuga. La premiassión deventa un giorno de festa, 'ndoe tute le squadre se presenta par star in compagnia e ciapàr la pergamena de la veronesità. Portémo cultura zugando, questo l'è importante, soratuto star insieme. In questi ani èmo visto de tuto, la squadra catalana ciapàr l'aereo e vegnér a la premiassion sensa savér de aver vinto e dotori scambiarse el turno par 'nar in biblioteca. La çità e la provinçia vién messa soto-sora, parenti e amiçi che no te senti da tempo i te dà una man, librerie e biblioteche registra in du mesi un mucio de visite. El canpionato parte dal giorno 18 de aprìl 2022 e finisse el 26 de maio co' la premiassion forsi vardandose in t'el muso. Tuti semo bravi o credémo de savèr tuto su la nostra cultura, ma no l'è cosìta. Dimostrémo che ci l'è un professòr el ghe ne sà de manco de un poro can co' un diploma de scola media. A la fine nissuni vinse, l'importante l'è parteçipàr. Fin al 15 de aprìl te pol iscrivarte, basta 'nar su la pagina del canpionato. Se 'na squadra parteçipa par dimostràr de savèrghene più de un altro, no l'à capìdo gnente. Un vero campion, se gode, stà in compagnia e dimostra a sé stesso de no èssar un musso, schèi in palio no ghe n'è e dimàn ghe toca nar a laoràr istesso. Le tradissioni vinse, la zènte che parteçipa l'è la sirésa su la torta, vol dir che a Verona gh'è ancora qualcuno che ghe tién a conservàr quel tramandà dai nostri vèci. canpionato >  (La Redassión 27.03.2022)