El novo libro del Carneàl _LR Notissie
El novo libro del Carneàl _LR Notissie
Dopo ani el nostro Diretor Andrea Toffaletti in compagnia de Alverio Merlo, l'è riussì ne l'impresa più incredibile de la storia veronese. Sistemàr l'archivio storico del carneàl veronese e publicarlo in un libro. Un libro dedicà a tuti quèi che ghe iè contenti de èssar veronesi e ghe piase mantegnér vive le nostre tradissioni come quela carnevalesca, da tramandàr a le future generassioni. Una publicassión che vol mètar in primo piàn, la storia, la belessa e quèl "unicum" che l'è, el nostro carneàl, tra i più antichi d'Europa, fato da màscare storiche e de volontari che i riesse ogni an dar lustro al carneàl de Verona anca fora dai confini de la provinçia. No l'è un libro "aqua e saón" ma un viàio a la scoèrta de un mondo poco conossù e fato de emossioni. Se va drento le sfilàde de l'800, ne le curiosità màcaroniche sensa desmentegàr le origini e i bacanàli, el tuto consà co' documenti mai publicà, cartoline, manifesti, foto antiche e moderne Crompa el libro a 18 Euro, isbn 9788892710825 da l'editòr - www.edizioni03.com o varda ne le librerie onlain o se te vol te pol ordinarlo ne la to libreria soto casa. info (La Redassión 20.02.2022)