Belfior, la TAV e i romani _LR Notissie
Belfior, la TAV e i romani _LR Notissie
L'è da tempo che par costruìr el percorso del Trèn Alta Veloçità s'a çercà bombe de la seconda guera mondiàl da San Martìn a San Bonifacio, sensa parò catàr gnénte. Ma come al solito, dal terén veronese pol saltàr fóra reperti romani, come staòlta. Secondo la Soraintendensa, le piére catà, podarìa èssar del periodo compreso tra la costrussión de la Via Postumia del II° secolo a.C. e  la strada Imperiàl Berengaria ciamà Porçilàna del 900 d.C.; par, che i reperti i sia sora a un terén de 3000 mq. a nord de la Corte Boaria, tacà a via Buggia, propio a metà tra le do strade romane. Forsi podarìa èssar i tòchi de 'na vila da schèi, de patrissi, co' locài bèi grandi e anca de le tombe. Se 'ndémo verso ovest in diressión Gombión catémo altre piére, ma de epoca sconossuda anca se, nei ani '80, i g'a catà rèsti dei paleoveneti. La zona del camposanto ciamà un tempo Castèl, s'a catà invésse, ani fa, piére de epoca tardo romàna. Se vardémo un par de chilometri piassè in là de la vila péna catà, podémo butàr un òcio al Santuario de la Madona de la Strà, 'ndóe gh'è 'na piéra da morto de la gens romana Melminia de Lucio Melminio Romano Festo, dedicà al fiòl morto. In póche parole Belfiór l'èra abità dai romani fin dai primo secolo d.C. come se pól lésar su le piére che catémo al museo Mafeiàn de Verona. Quindi no gh'è solo piante de pómi ne la zona, come tanti i pól pensàr, ma gh'è un bèl museo che no pól restàr lì come simbolo del paese, parché gh'è da farghe posto ai super treni. Una storia così importante, secondo noàntri, meritarìa de restàr 'ndóe l'è stà catà e no in un museo o pèso ancora sóto tèra, ma in 'sto caso, bisón salvàr quél che se pól. (La Redassión 02.03.2022)