Lessinia, el turismo in savàte _LR Notissie
Lessinia, el turismo in savàte _LR Notissie

La nostra montagna no l'è sicuramente tèra par un grande turismo e nei secoli ci g'a abità da generessioni l'è andà via verso la çità. Da 'na parte no vérghe un turismo come coèl de altre località venete l'è un bèn, parché s'a conservà la belessa de le nostre montagne a parte coalche stalón fato de çiménto, ma da l'altra quél de bèlo rivà fin a noàntri el ris-cia de 'nar a farse ciavàr se vién desmentegà anca dai póchi che ghe vive. Bisognarìa recuperàr tuto coél che gh'è de bèlo no solo dal ponto de vista naturalistico ma anca coél fato da l'òmo co' le propio mane come contrè, giassare, malghe e muréti, sensa desmentegarse el discorso storico e culturàl, ma soratuto portando dei servissi che podarìa portàr la zénte a vìvarghe 365 giorni a l'ano, come i neodi dei neodi dei ultimi cimbri. Solo ci vive e ghe laóra sempre, pól savér cosa ghe serve a la nostra montagna, con la possibilità de tegnérla sempre controlà e valorisà. Un esempio su tuti, l'è coél de le case ude a San Giorgio deventà un paese fantasma istésso de coéi dei film de Sergio Leone, costruide 50 ani fa coì l'idea de vivarle ne le stajóni invernali, coando fiocàva piassè. In Lessinia émo visto in coèsti ani, malghe deventàr ristoranti, co' pretese da parte dei "foresti" de magnàr come a casa propia e scoltàr musica come a 'na sagra. Ma coàndo névega catémo zénte in savàte o co' scarpe da sera, pestesàr la neve e che, se spaca le gambe, rompendoghe i maroni a quéi del socorso alpìn. L'ultima vacàda che no serve a gnénte a parte far casìn e turismo da sagra, l'è l'idea del ponte tibetàn, lóngo 500 metri, da costruìr da le Giare poco distante dal Ponte de Veja, passando de sóra a la val a nord de la Val Pantena par finìr in una località a 600 metri piassè in basso de Erbeso, ndóe no gh'è un casso a parte 5 case. 6 milioni de euro par far un ponte da "selfie", parché de zénte che g'a voia de far quatro passi in montagna ghe n'è póca e no ghe rèsta altro che farse 'na foto tacàdi via come dei saladi. El ponte, porta casìn, zénte e machine, quindi bisón sassinàr la montagna par far posti auto che, con tuta probabilità deventerà a pagamento come pestar sóra al ponte, difàti i dise che ghe sarà un bilièto da pagàr. Schèi e schèi, no un discorso par valorisàr la montagna secondo noàntri come dito invèçe da coalche primo çitàdìn montano. La Lessinia la mèrita piassè... (Bifolco Villici 13.03.2022)