Veronesi sensa memoria _LR Notissie
Veronesi sensa memoria _LR Notissie

Bisognarìa mantègnar quel che se dise in campagna eletoràl o almanco no sparàrle massa grosse. In generàl, bisognarìa vardàr anca el curriculum dei candidati quando se vota, se su de lori in precedensa gh'è stà dei sospeti con la legalità, se i g'a calcossa da scòndar o se jè degni de aministràr la çità. Bisognarìa vardàr cosa i g'a fato par Verona par no cascàr un altra 'òlta nel stesso sbàio. E alora fémo un salto indrio in quél passà nei ultimi 15 ani, par capìr se la nostra çità l'è ferma inciodà o se la sèita a movarse come el dise l'atuàl Sindaco. Sul filobus no gh'émo parole, una giunta fa le buse e l'altra la le stupa; el traforo de le Toresèle mai partìdo come el mega parco de la stassión, 'ndóe el Sindaco el vol altri 5 ani par scominçiarlo e finirlo (e se no vién riconfermà, émo perso 5 ani?); l'arsenàl pién de progeti ma no'l se move. Invéçe de spetàr el risultado eletoràl par far un cambio importante a la Fiera, vinti giorni prima de le urne l'è stà nominà el nóvo presidente, con i "complimenti" de la minoransa in Comùn; i risultadi i fa fadìga a rivàr a l'aeroporto par quanti schèi te ghe buti drénto par farghe far el salto de qualità che meritarìa. Forsi i veronesi no i se ricorda de le 17 tele sparìde a Castèlvècio piassè de 5 ani fa e catà in Ucraina 'ndóe i g'a fato una mostra co' i nostri quadri par siè mesi e dandoghe parfìn la citadinansa onoraria de Verona al vècio presidente ucraino come premio par la colaborassión; citadinansa cavà con la nóa giunta. Ma 'desso, semo feliçi e contenti parché el nostro sindaco l'è riussì a portàr la cerimonia che sèra le olimpiadi invernali 2026 a Verona drénto la rena; el problema l'è gestìr un evento cossìta grando con una çità picenina come la nostra, con póchi alberghi e i trasporti che come émo visto, al momento no iè al massimo. L'è bèlo pensàr in grande, par far notissia e far védar de èssar el piassè brao, ma el dùbio te vién quando te pensi che la capitàl de la cultura no l'è Verona ma Procida. Cari veronesi, prima de votàr el novo sindaco, dovì pensarghe sóra, vardarve in giro e védar cosa l'è cambià nei ultimi ani e cosa l'è stà fato par farVe sentìr mèio e no pénsar quanto l'è bèlo el nóvo supermarcà o el nóvo çéntro comerciàl! Se némo 'vanti cossìta la çità móre e probabilmente le çità vissine le farà sempre manco fadìga a far mèio de noàntri..... (El Diretòr 19.05.2022)