LA RENA DOMILA - DAL 1999 EL SITO VERONESE DEI VERONESI IN VERONESE

L'è incasinà tentàr de entràr ne le cossiense de le persone, figuremose cambiàr el mondo. Sémo parte de un sistema, un teatro che alcuni i tenta de combàtar, ma che in verità i combàte con le stesse armi fornide dal sistema stesso. No te lési i giornài parchè i pol èssar in man a quél che pol manovrarte ma te usi Feisbuc 'ndoe te méti a la berlina i to dati personali e quante volte te vè al cesso, fidandote magari de publicassioni che solo lore le dise la verità che i altri no dise. Ci ne comanda el sà benissimo, che le pégore i-è piassè de ci conosse la verità, questi ultimi éssendo in pochi i passa par mati, scancelandoli. Cossita i méte in testa a l'òmo-medio l'arma piassè carogna del mondo, el dùbio. In 'sta maniera i te contròla come 'na marionéta e oltre al dùbio, scominçia la paura. A quél punto te gh'è paura anca de un to parente e no te vol fidarte più de nissuni a parte le riviste on-lain su FB che le dise sempre "la verità co' onestà". Dopo entra in zùgo, el genio, tiràr fóra vèce parole che pol tacàr ne la molóna, mèio de la pégola, in particolàr durante le votassioni, come el comunismo, i fassisti, la destra, la sinistra, i gender, i clandestini, i vu cumprà, i campi rom e quindi insicuressa. No èssar sicuri in casa propia, l'è la cosa piassè bruta del mondo, ma l'è una gran arma da utilisàr in campagna eletoràl. Par consàr mèio la cosa, i te dise de votàr quél manco pèso, parchè sarìa la roìna. Pochi i se tién in mente cossa l'è sucesso a Verona nei ultimi 20 ani e anca cosa no l'è sucesso, ma iè pochi, quésto l'è el problema. La pégora g'a memoria solo par magnàr l'erba, figuremose se la se ricorda cossa l'è sucesso ieri e quindi la sganassa a le vacade da campagna eletoràl, a le bale e a le tolte par el cul. Védar i politiçi che i schersa su la pèl del çitadìn, l'è 'na mancansa de rispèto, ma lori i sà che la pégora la sèita a magnàr l'erba. E mentre gh'è in pié el teatro, de soto ciàpa forma i vari interessi, costruìr o butàr schèi nel pignatón de qualche ente. E ti pégora magna l'èrba e tasi o porta denànsi le idee de qualche politico con l'unico interesse de la caréga, che'l sà benissimo che nar in consèjo comunàl l'è 'na missión impossibile ma co' l'aiuto de tante pégore pol fàrghela, devéntando un vero pastor. Anca el Vescovo, el g'a dato una indicassión de voto ai so preti e dopo se dimandémo parché in césa ghe va sempre manco pegoréte. Quindi votàr con giudissio e dimandarse sempre parché e par come prima de far una crose.... (El Diretòr 23.06.2022)