L'Astrolabio de San Zén in vendita _LR Notissie

L'Astrolabio de San Zén in vendita   _LR Notissie
L'Astrolabio de San Zén in vendita _LR Notissie
L'Astrolabio de San Zén in vendita

Un calcossa de unico che par tre secoli l'éra tacà al muro del ciòstro de la césa de San Zén e che 'desso l'è in vendita a Londra, stémo parlando de l'Astrolabio del 1455, una sòrta de strumento astrologico e no solo. I benedetini i vardàva el calendario zodiacàl de le stéle, la quantità de luçe de la giornada in un giorno preciso de l'ano, i giorni e i orari de le feste dei santi. L'éra posissionà in maniera tal che i dovéa passarghe denànsi par forsa, quindi, quando i lassava el dormitorio a la matina e quando i tornava indrio la sera. In pratica l'éra l'unico modo par i monaci de lésar l'ora, l'astrolabio el ghe diséa quando el sol se sveiàva, quante ore de ciàro e de stròo gh'éra con el cambio de le staiòni. Nel 844 d.C. dovémo segnalarve che ghe n'éra zà uno, fato a la bóna da Arcidiacono Pacifico e utilisà al Dòmo, ma gnànca da métar a confronto con quél de San Zén. Come émo visto a parte el sol, la luna e le stéle se lése anca i nomi del vescovo mòro, San Procolo, San Lucillo e San Cerbonio. Sui documenti se lése, che a l'inissio del '900 l'éra de propietà del Conte Antonio Maria Cartolari di Verona (nato nel 1843), ma probabilmente deventà parte de la colessión de la nobile famèia fin dai rebaltamenti napoleonici grassie a un lontàn parente monaco, un tal Bartholomaeus de Fanzago Cartulariis, che l'è riussido, forsi a salvarlo dai francesi. Come sia finìa fóra da l'Italia e soratuto quando l'è andà via dai Cartolari, no se sà. El problema l'è, che par vérghelo indrio ghe vol 1.275.000 sterline e forsi a San Zén, la tor tacà a la cèsa, g'a bisón de ristruturassión. Giusto par darve un idea, l'astrolabio l'è fato da 3 dischi in legno; quél piassè grande g'a un diametro del 1280mm invéçe quéi picenini 533 mm e 483 mm, tacàdi uno a l'altro grassie a 'na spina. Verso l'orìn del disco grande, gh'è el calendario in nero e rosso con scrita tardogotica con nóve colone de figure e nùmari arabi e verso l'interno i dodese grandi miniature dei segni zodiacali, alte çirca 100 mm, disposte in cerchio. Nel disco più picenin con tre colone co' figure in nùmari arabi e romani sensa contàr i nomi dei mesi. Par finìr el disco çentràl co' dipinto con el çiél noturno serà drénto un anèl de raméti de fóie co' atórno de i nastri, disegnà con un buso tondo sfalsà par védar mèio le fasi lunari sul panèl de sóto. Sul sito de Daniel Crouch Rare Books https://www.crouchrarebooks.com podì catàr la descrissión de l'Astrolabio..... (El Diretòr 18.07.2022)