Bon 2022 dal Diretor_LR Notissie
Bon 2022 dal Diretor_LR Notissie

Cari veronesi, vissini e lontani, nel mondo. La Rena Domila, nel domila e venti-tre supia 24 candeline e l'è un importante traguardo par el sito culturàl piassè vecio de verona. St'ano émo demostrà, che ci fa cultura sempre, tuto el tempo de l'ano e da tanto tempo come noàntri, pol garantìr un qualcosa in più de quéi che i pensa solo a pociàr da le istitussioni sensa presentàr un vero progeto. Con el 150mo compleàn de Berto Barbarani, émo demostrà che sensa schèi riussémo a far un mucio de robe e de métar in rete tante realtà veronesi. Qua ringrassiémo el Comùn de Verona par averne dà visibilità a le nostre inissiative barbaraniane. No volémo schierarse par un partito o un altro, par una giunta o l'altra, ma se vardémo i fati, finora, l'atuàl giunta n'a dato una çérta fiducia, cosa mai sucessa o quasi par quéle in precedensa. Par quanto riguarda Barbarani no émo visto una cérta visibilità a l'evento da parte de molte associassioni venetiste che in questi ani, le g'a çercà de imporne una sorta de lengua veneta. Voio ricordàr che anca el veronese g'a de le regole e pol èssar una lengua formà da tanti dialeti e se vardemo, usi, costumi e conomia semo distanti dal resto del Veneto. Ve fasso una dimanda, Verona èla cossita tacà secondo voialtri al resto del Veneto? Forsi vardemo verso nord, nord ovest? Parché da le parte de Venessia, pochi o nissuni g'a parlà del piassè grande poeta veronese e Veneto del '900? Ognuno el resta de la propia idea. St'ano émo cambià sindaco, che pol piasèr o no piasèr, disémo che noàtri lo conossevimo da ani, da quando el ne scrivea da la Cina, quando l'éra impegnà come calciator. Lassemolo laorar, par mal che vaga, el farà tanto come quei vegnù prima de lu, lo tegnémo soto osservassion. Noàntri, nel 2023 gh'émo tanti progeti in mente, par valorisar al mèio le nostre tradissioni, parché la rena domila no l'è solo internet ma anca incontri, conferense e eventi.... e par el 2023 sostegnémo el Comùn de Verona nel "patto par la lettura" parché volémo che la cultura veronese la sia sempre de più a disposission de tuti... Bon 2023 da La Rena Domila.. (El Diretór 31.12.2022)