LA RENA DOMILA - DAL 1999 EL SITO VERONESE DEI VERONESI IN VERONESE

St'ano la diga del Ceo smorsa 100 candeline, una de le ultime grandi opere de la çità. Questo ne fa pensàr che Verona s'a svilupà ben e in pressia grassie a la diga, al Canàl Camussoni e a la çentràl de Tombeta, par dopo fermarse. Ci l'è nato nei ani 70 pol testimoniàr che a Verona no l'è stà fato gnénte de particolàr in 50 ani a parte i soto-passi de Porta Nóa e 3-4 supermarcà par quartiér. Ve rendì conto che nel 1887 grassie a la giunta comunàl de Giulio Camuzzoni e a l'opera de l'ingegnér Enrico Carli s'a pensà de far un canàl par portàr energia a le industrie a sud de la çità sensa utilisàr el carbón? Ve rendì conto che grassie a l'ingegnér Rubinelli l'è stà realisà la diga del Céo par alimentàr al mèio le quatro turbine de Tombeta grassie al canàl zà in piè da 30 ani par svilupàr la çità? Piassè de 100 ani fa, calchedùn pensava al futuro de Verona, ma i ultimi sindaci a cosa i g'a pensà? Ve lo disémo noàntri... al filobus co' le tirache de 60 ani fa!... (La Redassion - 22.03.2023)