LA RENA DOMILA - DAL 1999 EL SITO VERONESE DEI VERONESI IN VERONESE

Par ci vol conóssar Verona, émo pensà calcossa che pol far al caso vostro, Quatro passi par le vie de Verona a la scoèrta de le belesse de la çità, tra arte, storia e poesia. Se ve piase lésar libri, beh alora l'è propio el lógo giusto, parché gh'è anca la presentassión de 4 libri interessanti che no i pol mancàr ne la Vostra libreria. Ma de cosa stémo parlando? "Verona in camìn, un çità che varda, una çità che scoèrze, una çità che lése" una inissiativa de La Rena Domìla par Verona messa in piè dal grande laóro de squadra dal C.T.G. La Fenice, Co' noàntri ghe sarà la compagnia del Touring Club de Verona, la Coop. Al Calmiér co' el Simposio permanente dei poeti veronesi, sensa desmentegarse del Patrocinio de la Provinçia de Verona. El tuto el vegnarà inserido ne la manifestassión nassionàl de "Il Maggio dei Libri" e inserìdo drénto dal Comùn de Verona nel "Patto per la lettura". Sabo 13 màio se catémo a Santa 'Nastàsia a le ore 9.30 par visitàr co' la guida Paola Pisani la césa, dopo fémo quatro passi par la çità passando par Piassa Dante 'ndóe parlémo del poeta, altri quatro passi fin a Piassa Erbe e 'l Ghéto Ebraico 'ndóe el nostro Diretór el cantarà la poesia de Berto Barbarani. Prima parò de rivàr al Museo de Castèl Vècio 'ndóe ne spèta una altra visita, el studioso Maurissio D'Alessandro ne parlarà de le botéghe storiche de verona. Par finìr, un convivio culturàl de la tradissión co' calcossa da smorfìr e i libri de Andrea Toffaletti, Alverio Merlo, Paola Pisani e Maurizio D'Alessandro a San Zén organisà in colaborassión co' la Coop. Al Calmiér. Come podì mancàr a 'na roba de 'sto tipo de cossìta alto livèl? Gh'è solo 45 posti e dovì prenotàr. Noàntri Ve spetémo par una grandiosa giornàda culturàl veronese. (La Redassión 29.04.2023).

Sabo 13.05.2023
- Se catémo denànsi a Santa Nastàsia a le ore 9.30
- Quatro passi par Verona fin a Castèl Vècio (ore 10.45)
- Convivio culturàl in cusìna a la Coop.Al Calmiér de San Zén (ore 12.30)

# prenotassioni entro el 11.05:
info@ctglafenice.it
45 posti disponibili
15 euri a persona (Visita a Castèl Vècio e Convivio).