LA RENA DOMILA - DAL 1999 EL SITO VERONESE DEI VERONESI IN VERONESE

Passa i sindaci e i assessori, ma i problemi no vién risolti o se la te va bén, vién tirà fóra dal calto progeti de trenta o çinquant'ani fa. Gnénte de nóvo a Verona, Par incasinàr la vita ai veronesi s'a pensà de tacàr i sotopassi tra porta Palio e Porta Nóa e farghe passàr de sóra el filobus co' le tiràche. Nel primo caso se podéa farlo nel 1990 quando i-è stà realisà par i mondiali de balón, nel secondo caso dovì pensàr che a Verona el gh'éra zà, ma l'è stà cavà. I nostri aministradori i-è talmente 'vanti, che, se i varda indrio, i vede el futuro! Par colpa de tuto sto bordèl la circolassión a Verona l'è stà rebaltà come un calséto. Cossita i veronesi i deve far el classico giro de l'oca e restàr in colona co la propia auto par ore, ogni giorno. Nel 2023 pensàvimo a una metropolitana o al tele-trasporto, invéçe no, se catémo co' filobus e sotopassi che gh'éra ani fa. El problema l'è, che queste pensàde le va 'vanti de Giunta in Giunta e se no le vién fate, gh'è el ris-cio de pagàr penali. Ogni nóvo sindaco se cata co' le rogne de quél prima de lu. Ma i-è bravi a contarne quéla de l'orso o dei lóvi in Lessinia, par ci gh'è a Palasso Barbieri, tuto questo, tra un ano, podarà dar 'na man a la viabilità de la çità. A 'òlte, te pensi che la politica, sia distante da la realtà. (La Redassión 28.04.2023).