Bon 2024 dal Diretor_LR Notissie

Bon 2024 dal Diretor_LR Notissie
Bon 2024 dal Diretor_LR Notissie
Bon 2024 dal Diretòr

Cari Veronesi, vissini e lontani, nel mondo, nel 2024 La Rena Domila compie 25 ani e par noàntri l'è un calcossa de incredibile, nissun sito culturàl a Verona l'è riussì a mantégner sempre agiornà el propio sito par tuti sti ani. Nel 2023 émo parteçipà al Tocatì con una proposta culturàl, declamà Barbarani sora al Forte Tesoro e a Quinsàn co' le poesie d'amor del grande poeta veronese par "Verona in love", sensa desmentegàr un giro poetico culturàl al Giardìn Giusti e nel cor de Veroneta col el C.T.G. La Fenice. St'an che vién, el nostro sito vegnàra ristruturà par deventàr sempre mèio. Noàntri fémo del nostro mèio sensa schèi, no dimandémo gnénte a nissuni, ci vol dar 'na man, ne fa piasér, La Rena Domìla l'è patrimonio de la çità ma pochi i le capisse. Ma el no capìr le robe o far finta de no capìr l'è un modo de far a la veronese. Se gh'è problemi o rogne, basta dar la colpa a l'ultimo sindaco solo parché l'è de color difarente, sensa pensàr che quéi vegnù prima no i g'a fato de mèio. Se uno el vién votà da la magioransa dei veronesi e dopo pochi mesi criticà, el veronese medio no pensa che i progeti in pié i pol èssar de la precedente giunta. No se pensa che una parte de la politica veronese l'è restà su la caréga del Comùn e nei vari Enti par 15 ani de fila trasformandola in una poltrona o un divàn. Le idee alternative par cambiàr la çità, parò, no porta grandi risultadi e l'ultimo Sindaco che i sèita a tor par el cul parché l'éra un zugadór de balón (come dir che la politica veronese la g'a sfornà premi Nobel), el dà la conferma, che forsi podéa far de l'altro. Le comiche le pol rivàr quando uno el vol far el nóvo stadio e ci vién dopo el porta denànsi la stessa idea ma ghe vién dito che l'è un mona e che i-è idee de un zugador e no de un sindaco. Tra le cose de folclór, segnalémo la "stéla cadente" de Piassa Bra, che a genàr l'è stà smontà in una giornàda de vento; un tòco de sostégno drénto la Rena l'è rugolà zò spacàndo i gradoni. Forsi, pochi i sà, che no tute le piére che gh'è, le g'a domila ani. Cossita i-è partì le indagini e sequestrà da le autorità l'opera. A setémbre quando tuto paréa nar par verso giusto e quando un par de asiende veronesi le s'a messe a disposissión par sistemarla, la Giunta la g'a preferido métarghene una luminosa in stile luna-park de paese, con i veronesi pronti a castràr el Sindaco. El veronese medio, no capisse che par la verifica de qualità e autorisassión de un tòco nóvo ghe vol mesi, ma capisse quando l'è el momento par dirghe su par la 10000 volta al Sindaco, che in questo caso l'è andà propio in çerca de rogne; l'éra mèio no far gnénte e sparagnàr schèi. I veronesi i g'a la memoria curta e su questo i maestri de la politica i ghe zuga a la grande, se g'avì tempo, podì lésar in Biblioteca Civica, i giornài de quarant'ani fa, par capìr cosa gh'éra scrito su la "stéla de fèro" e su quél che la zénte pensàva, de un òpera massa granda e che magari la podéa deventà rùsena nel tempo. El 2023 finisse con una notissia bomba, come quéla mericana de 400 kg catà a Parona de la seconda guera mondiàl. La bomba l'è finì in man dei militari, la frassión l'è stà udà a metà stìmana e la zénte sistemà al sicuro come dito dal Ministero. E qua salta fóra el genio, el politico de turno, quél de nóvo córso, che no podéa no dar la colpa al Sindaco ne la sièlta del giorno. E come al solito el veronese medio, va drio a ci sóna el pìfaro. Moràl del 2023: Se un to amigo el pensa a come far una cagada, no l'è una cagada parché l'è un to amigo, se un to nemìgo el riesse a far una cagada... l'è un coión! In 25 ani émo visto Giunte e Sindaci, ma no gh'è da salvàr nissuni, gnanca i veronesi, preocupadi par una "stèla cadente" e no de una çità ferma a un filobus co' le tiràche! Cari Veronesi co' le ciàcole no se impasta frìtole! Noàntri anca par el 2024 portémo ne le piasse e su internet la storia e la tradissión, le uniche cose sicure da salvàr par no cascàr ne le mane de ci sona el pìfaro... (El Diretór 31.12.2023)