LA RENA DOMILA - DAL 1999 EL SITO VERONESE DEI VERONESI IN VERONESE

El Forte San Michèl conossù come Werk Kaiserin Elisabeth l'è stà costruìdo a 600 metri dal paese tra el 1854 e 'l 1857 co' 29 bòche da fógo, a 3200 metri dal bastioni de Santa Toscana e de le Madalene, de forma praticamente istessa de quel del Ceo Kaiser Franz Joseph su l'atuàl Via Unità d'Italia, tra via Marmolada, via Zanati, via Gottardo e Via Rossi. Fin a la prima guera mondiàl el forte austriaco ghe faséa far un bel semiçércolo intorno a la strada, che da San Michèl menàva verso san Martìn, in quanto el "Werk" l'èra piantà in mèso a l'atuàl Statàl 11. L'intera area, dal Demanio l'è passà a la faméia Astori co' el vincolo che'l forte fusse butà zò e la strada sistemà drita. El nóvo parón l'a sfrutà el materìal da costrussión e le grandi cave de giàra co' el tempo desmentegàde mentre un tochetìn de terén l'è finì in man a l'AGIP. Dopo la seconda guera mondiàl, la zona intorno l'era piena de buse e teren messo mal, e l'èra presente 'na mura longa 50 metri alta più de 10 metri grossa più de un metro, fòrsi le fondamenta del forte. De là del muro gh'èra la cava e a quasi 25 metri el resto del forto longo 50 metri largo 40 co' el quèrto e i busi par sparàr. Le 'olte e le càmare ancora in pié, sfrutà come abitassioni nel dopoguera e rifugio dal 1943 al 1945. Nel 1960 l'è stà vendù l'area par costruìr case, palassi e distributór de bensina butàndo zó quél restà del forte austriaco. A parte qualche cartolina de San Michèl, no gh'è foto sul forte ma conservà solo un plastico al Museo de l'Arma del Genio a Roma. La mura de l'ex Motel Agip l'è fata co' i tochi del forte come se pol védar; gh'è restà un lontàn ricordo de ci g'a i cavéi bianchi e 60 ani fa el zugàva tra le piére del Werk Kaiserin Elisabeth....... El Diretòr (Verona 02.10.2019)