LA RENA DOMILA - DAL 1999 EL SITO VERONESE DEI VERONESI IN VERONESE

Cari veronesi, vissini e lontani nel mondo, la rena domila smorsa vinti-un candeline e par mi, l'e' sempre una grande sodisfassion, festegiar con voialtri....No l'e' un traguardo, ma un punto de partensa par far sempre meio....Emo passa' un ano pien de sodisfassioni, riconossimenti dai veronesi e dai media. cosa ne speta 'desso? Un altro ano impegnativo con drento tante novita' in particolar, vegnara' sgranda' el sito, con noe rubriche culturali de la tradission, come da richiesta de ci ne varda. Quindi un ano de studio e de laoro, sensa desmentegarse le colaborassioni con cultori, tv e giornai, come sempre, a disposission par ilustrarve le nostre conferense. In questi ultimi ani, ho presenta' le serate culturali a San Roco de Quinsan, dando el me contributo a la nobile causa. Ringranssio per averme da' questa opportunita' invesse a le serate culturali de poesia al calmier, no mancaro', ormai ghe son da 13 ani....podi' catarme li el secondo vendri del mese. Par quanto rivarda le nostre conferense culturali vegnara' trasmesse in direta su iutub nel nostro canal radio scarpa tv. Parlando de iutub, ghe sara' la direta de la premiassion del 22° canpionato del mondo de le tradissioni; visto el corona virus ancora presente, emo preferido scancelar a malincor el spetacolo.... ma el canpionato se fara', anca parche' la gente l'e' sera' in casa da un mese e no sa' piu' cosa far, par far passar el tempo. Quindi laoro e inovassion, sensa vardar ci l'e' sempre pronto a sotolinear con la matita rossa quel che pol essar un nostro sbaio.... purtropo l'ignoransa, porta certe persone a crédar de essar sempre nel giusto...Se mi sbajo ve'l digo, ma quel che vien publica' l'e' querta' da prove e certesse.Daltronde se la rena domila gh'e' da piu' de vint'ani un motivo ghe sara'...Mi ghe meto la facia altri se sconde drio a la tastiera o a un profilo feisbuc. Invesse de criticar o sparar vacade se pol nar una man a la causa par la salvaguardia de le tradissioni veronesi! La Rena Domila, l'e' un sito libaro, che no dipende da nissuni se no dal sotoscrito, che no parla de politica, che no ofende mai nissuni; quindi, eventuali pressioni su cosa publicar par no ofendar i sentimenti de qualcuno che dovaria réndar conto a la comunita'del proprio operato... vegnara' rispedi' al mitente come sucesso nel 2019! Muso duro e bareta fraca', avanti par la nostra strada...e ci ne vol ben e soratuto se fida....s'a 'ndoe catarne e catarme! La Rena Domila fa tuto a la luce del sol, scondiroti o secondi fini... ma con onesta' e amor par verona....Bon conplean La Rena Domila! El Diretòr 01.04.2020)