LA RENA DOMILA - DAL 1999 EL SITO VERONESE DEI VERONESI IN VERONESE

Secondo el nóvo regolamento Comunàl, par Verona no ghe sarà più la possibilità de montàr sóra a la caróssa tirà dai cavài faséndo un giro turistico par la çità sensa inquinàr. Secondo l'Organisassión Internassionàl a protessión de le bestie, ghe vol rispéto par lóre. Par 'sto motivo no se pól tegnér cani e gati sora al balcón a cósarse soto al sol sensa podér entràr in casa. No solo el çirco deve far atensión, in particolàr par le bestie esotiche, anca par ti pol éssar un problema 'verghe un grifón del Bengala in casa. Nel regolamento se lése anca, che bisón taiàrghe le bale ai gati che va fóra de casa a farse un spritz e a quéi che vive in colonia come quéla de la gatàra sóto casa tua. El Comùn de Verona che g'a a cór le bestie, el ne dise che bisón volérghe ben, no solo crompàrle parché va de moda o parché no te savei cosa cromparte par dopo lassàrle ligà a un pal su la strada e scapàr via. No se pol ligàrghe 'na campanéla intorno al cól del to gato parché pol vegnérghe mal de testa o deventàr insemenìo nel tempo con problemi neurologiçi. Qua, noàntri ghe zontémo le vache véce che pàscola a Passo Fitanse co' el campanasso al cól, da secoli con l'Amplifon ne le réce. Disémo che ghe vol rispéto par la bestie e volérghe ben come le fa lóre con ti, quésto l'è importante, el regolamento l'è solo par le teste da casso che le g'a la testa par spartìr le réce..... (La Redassion 06.11.2020)