Gh'è ci móre e ci fa carnevàl _LR Notissie
Tuti g'avémo vóia de tornàr a gòdarse dopo un ano de Coranavirus, 'ndóe émo visto zénte malà, zénte che l'è sgolà in çiél, zénte serà su in casa e zénte che la g'a perso el laóro, ma pensàr de organisàr el Vendri Gnocolàr de màio, l'è 'na cosa vergognosa. Un carnevalante 'bituà a far carnevàl pol dìr 'na vacada, ma el Comùn in quanto istitussión dovarìa usàr el sarvél. No gh'è rispéto par i sanitari, par ci l'è stà mal o l'è ancora drio a lotàr e soratuto par i quàsi 2000 morti de la provinçia veronese. Nel mese de aprìl, par ben che la vaga, se scominsiarà a vacinàr le categorie no a ris-cio, in pratica, la magior parte de la zénte. I nostri aministradóri e i carnevalànti i pensa a far festa? Ma sémo fóra de molóna? No sarìa méio utilisàr i schéi par ci no 'riva a fine mese e no g'a gnanca da magnàr? I-è stà rimandà le olimpiadi de Tokyo, ma noàntri semo piassé furbi e fémo la cavalcada a cavàl e i càri co' i coriandoli che i gira in mèso a la zénte in çità. Cosa gh'émo da festegiàr? El Virus gh'è ancora! Ma ci organisa vive su Marte? Mai g'avarìa pensà che la "mente umana" podésse rivàr a tanto! A le prossime elessioni sarìa mèio vardàr ci se vota, se córe el ris-cio che anca el drago Parsémolo de Gardaland pòssa deventàr Sindaco.
(La Redassión 05.01.2021)
| // Podarìa interessarte |
| Informassioni + La Rena Notissie, Speciali, Radio Scarpa + Spetàcoli & Teatro + Sagre + Marcà + Orari Messe + Fiere |