LA RENA DOMILA - DAL 1999 EL SITO VERONESE DEI VERONESI IN VERONESE

Berto come nel '900 l'è protagonista de Piassa Erbe, de quéla piassa e de le case del "Ghéto" salvà nel secolo passà, grassie al so contributo e a quél del pitor Angelo Dall'Oca Bianca. In 'sti giorni a Verona se ciàcola de la nova botéga de "frìto mericàn" tacà a la so statua e vèrta a pochi passi dal nostro poeta. Quando piassè de 15 ani fa l'è stà posissionà la statua gh'è stà una bèla polemica e nel tempo gh'è stà tacà el portabiçicléte e deventà lógo preferìdo dai cani par una bèla pissada. La considerassión a ci g'a volù ben a Verona l'è pari a zèro tegnéndo conto de tuto quél che'l g'a fato par la so çità. In più, denànsi a la statua se vede Piassa Erbe bèla e cambià, ma co' altri "Piassaròti" soratuto che no iè veronesi. La fine de la Verona de Berto la gh'è da ani e i nostri Aministradòri no i-è stà bóni de salvàr quél póco de veronesità restà e la so zénte che ghe laóra da generassioni, la libreria "Ghelfi e Barbato" in via Noa o "Ferario" in corso Santa Nastasia. Tute le çità italiane le g'a perso un tòco de la so storia, quéla storia che'l mondo ne invidia par far pòsto a un qualcossa che no l'è nostro e che l'è istésso da Verona al Nairobi e da Bogotà a Melburn. Berto se stupa el nàso par la spussa de frìto e se stupa i òci par una Verona che la cambia in pèso....(El Diretòr 10.06.2021)