LA RENA DOMILA - DAL 1999 EL SITO VERONESE DEI VERONESI IN VERONESE

G'ò pensà sóra, e forsi un sistema par portàr la Pearà dal ristorante a casa tua grassie a un tubo soto la çità el gh'è. El sogno del poèta Alverio Merlo conossù come Re Pipino nel carneàl el pol finalmente realisarse. E mi che ghe daséa del mato! Se al Ristorante 12 Apostoli i me cusina la Pearà, secondo l'originàl riçéta e grassie a un tubo che passàndo sóto a Portoni Borsari l'ariva fin drénto a casa mia, podarìa magnàr la storica pietànsa, cóme e quando vóio. Quésta idea l'è pressapoco, quéla che al nostro Comùn gh'è vegnù in mente propio ne la zona de la porta romana, par el discorso de l'aqua, che, ogni 'òlta che piove, va de sóra la pavimentassión, faséndo una sórta de pissìna olimpionica. El sistéma par scargàr l'aqua de la piòva da la Porta, no l'a mai funsionà bén e nel córso dei ultimi ani s'a provà de tuto, secondo la famosa teoria veronese "mèio el tacón del bùso", via che parò el bùso l'è quèl fato ne le casse comunali nei ani. El nostro Comùn grassie a dei fóndi ministeriali par le emergense, vol sistemàr con Aque Veronesi 'sto problema, con un tubo, largo piassè de un metro e longo çénto metri e che te porta l'aqua che casca dal çiél ne l'Adese. Come idea no l'è tanto distante da quéla de l'amigo Alverio co' la Pearà, 'ndóe parò par magnàr se ciàpa in man el cuciàr. Co' la sperànsa che sia la 'òlta bóna par el Cafè Rialto tacà a la Porta, de no catàrse come a Venessia ogni òlta che pióve, el nome de çérto no ghe dà una man! Come riportà sui giornài, quésti laóri no i costa gnénte a la comunità e no se va a tocàr le boléte de Aque Veronesi. Disémo che i schèi del Ministero i salta fóra da altre tasse che paghémo, quindi no l'è véra che ai veronesi no costa un casso e gh'è da dir anca, che in tuti 'sti ani, s'a speso schèi par i scarsi risultadi. La moràl l'è una sola, cambia el sindaco e le aministrassioni ma i problemi i resta sempre quéi. Cari veronesi, bisón ricordarse quando se va a votàr dei risultadi e de le promesse del periodo eletoràl. Se una Giunta, de qualsiasi colór, no l'è bóna de risòlvar questi problemi de normàl aministrassión, come la pol farme crédar che l'è bóna de far el traforo de le Toreséle o un filobus? El Diretòr (Verona 26.11.2021)