LA RENA DOMILA - DAL 1999 EL SITO VERONESE DEI VERONESI IN VERONESE

Podémo dir che le nostre inissiative par i 150 ani de Berto le g'a portà in alto el nome del nostro cantór Barbarani. Tre conferense sul poeta co' tanta zénte sentà a scoltàr el nostro Diretór sensa contàr el giro a pié par le vie de San Zén declamando le piassè bèle poesie barbaraniane. El Comùn de Verona n'a dato 'na man par la promossión dei nostri eventi, defàti dopo la conferensa stampa in Muniçipio, par 'na stimàna s'à parlà de Berto su giornài e tilivisioni. El tuto sensa avér ciapà un schèo da le Istitussioni e co' la possibilità ai veronesi de parteçipàr a gratis. Un ringrassiamento va in primis a la guida storica del CTG La Fenice che nel giorno del conpleàn de Berto n'a fato scoèrzar le belesse del rión de San Zén co' el Diretór vestì da Berto e l'amigo Alverio Merlo pronto a dir do parole sul carnevàl drénto a la sede del Bacanàl, al Calmiér par averne ospità par la conferensa sul poeta in una sala piena de zénte e al Comitato San Roco de Quinsàn che n'a ospità par do grandiose conferense co' le curiosità che se pol catàr ne le poesie. Le nostre inissiative podémo dir che i-éra tra le piassè complete e valutade bén dal Comùn, parché semo riussidi a tacàr l'una co' l'altra, çinque associassioni de la nostra çità. La Rena Domìla no la g'a ciapà schèi ma soratuto, g'a volù colaboràr co' tuti, cosa che altri no i g'a volù far e i risultati i s'a visti. No se pol, a l'ultimo secondo, realisàr de le manifestassioni sensa vérghe un idea de quél che se deve e se pol far solo parché te te senti taià fóra. Noàntri da aprìl émo pensà a festegiàr i 150 ani de Berto utilisando solo le nostre forze e portando un progèto valido e nóvo, no una cosa vècia de ani. S'a visto, ci ghe tegnéa a Berto veramente. Noàntri de La Rena Domìla émo dimostrà che sémo bóni de far cultura par amor de Verona, cérte robe le vién fate par passión e no par schèi! La Redassion