Giorgio Gioco

Giorgio Gioco (+2019), l'amìgo de La Rena Domila che l'è riussì a portàr la poesia in cusìna. No l'éra solo un cógo, ma un veronese che ghe piaséa la so çità, amante de le tradissioni e de la so storia. De lu conservémo un ricordo grandissimo, la prima persona che l'à credù nel sito, organisàndo tra l'altro co' el Diretòr numarose manifestassioni ne la çità de Verona. Da ricordàr anca, che 'l s'à dato da far, par realisàr la statua del grande Berto Barbarani amìgo de faméia e de tanti veronesi. Ciao Giorgio! 
Altro

Giampaolo Feriani

Nel 2015 el n'à lassà un grande poeta veronese, un amigo, 'na persona che'l sentìa drento de lu un missioto de sentimenti, in particolàr i ricordi de quando l'era un bocia che vivèa ne la campagna veronese. El so dialèto el te porta in un ambiente familiàr fato de tanti sacrifici e che porta el letòr a capìr el vero significato de la vita. Un poche de poesie par ricordarlo, parchè merita de no èssar desmentegà.Varda el so sito http://www.giampaoloferiani.it/ No te resta de çercàr su internet el so sito e de crompàrTe uno dei tanti e tanti libri. Ciao Giampaolo!
Altro

Andrea Toffaletti

Le poesie del nostro Diretòr, da quele operaie a quele d'amòr passando par Verona, "tra i vicoli e le case sconte". L'anima se spècia ne la so çità, come la so musa Berto Barbarani, i so versi no parla mai de guera e desgrassie ma fa risaltàr tuto quèl che gh'è de bon intorno a lu. La tecnica nei ultimi ani l'à portà le so poesie a someiàrghe a quele del cantòr Berto, ambientà parò a i giorni nostri. Ne la poesia se cata una moràl, un qualcosa da imparàr e questo l'è sempre presente in ogni componimento.
Altro

Franco Ravazzin "el Rava"

Franco (1936-2007) un genio de la poesia veronese che l'à credù a La Rena Domila nel lontàn 1999. El n'à lassà un magnifico ricordo de la so persona e de quele sere passà in so compagnia davanti a un bon goto de vin. L'à contribuì nei primi ani de vita del sito a dar lustro a le nostre atività. La so poesia l'è veramente da "veronese tuto mato" ma che tante 'olte te porta a spasso ne la veronesità e nei ricordi de un tempo. Volémo ricordarlo così, persona s-cèta che ghe piasèa stàr in compagnia nostra e de tuti i veronesi. Ciao Rava!
Altro

Angelin Sartori

Angelìn (1905-1982) che podémo definìr "el poeta del cor"  co' le so poesie te porta tra le mura de casa, co' la faméia, davanti a un fogolàr. El so cor el bate par tuto 'sto mondo partìcolàr, consà con quela mata alegria tante 'olte portà a la luçe co' l'amigo Tolo da Re. Uno dei piassé grandi poeti del '900 veronese che ve femo gustàr in un poche de poesie. Me racomando parò de crompàr el libro, se riussì a catàrlo in uno dei tanti marcà de colessionisti, gh'è drento tante bele poesie che no podì far a manco de lésar. 'Desso Ve lassèmo a le so opere, sentà su 'na carèga co' in man un bon bicèr de rosso veronese. Te pol catarle sul libro POESIE del 1986 sul sito Ebay, 
Altro

Mario Maimeri

Mario (1915-1974) l'era un vero Alpìn, 'na persona che l'à messo nero su bianco el so dolòr de quei bruti momenti ne la seconda guera mondiàl, ma che l'à savù decantàr la so Verona. Solo ci l'à passà quel tipo de esperiense riesse a capìr çerti valori de la vita. El so amigo Crike a distansa de ani l'à volù che La Rena Domila publicasse la so poesia parchè no la vaga desmentegà. Ci l'à conossù el poeta, a distansa de tanti ani, conserva un bon ricordo de Mario. Cossita su sua richiesta podì lèsar le so poesie.
Altro

Luigi Ederle

Luigi l'è stà "colaboradòr" del nostro sito co'le so notissie e i ricordi de la Val Pantena par piassè de 10 ani. Un vero esperto de la cultura e de le tradissioni de la so tera. Par ci vol savèr informassioni su Lumiago, Senàgo o Gressana e savèr se gh'è una fontana, un lavatoio o un monumento Luigi l'è la persona che pol darte una risposta sicura. Basta far el so nome ne la val e tuti i conosse 'sta fantastica persona. No te resta che lèsar le so poesie
Altro

Gianni Recchi

Pochi a Verona conosse el grande Gianni Recchi (1922-2009), ma podémo dir che l'è stà uno dei più grandi poeti veronesi, conossù e premià no solo nel triveneto ma anca a livèl nassionàl. 'Na persona s-cèta con cui passàr de le ore in so compagnia, che te fasèa stàr ben. Questo el nostro ricordo. La so poesia in particolàr l'era fata de bei ricordi, de particolari e de curiosità, quela mata alegria che catèmo con Angelin Sartori e Tolo Da Re. Lesi anca ti una de le so tante poesie par capìr ci l'era sto omo dal libro che'l n'a regalà "Inchiostro e Lapi"
Altro

Tolo Da Re

L'è ciamà "El poeta de l'Adese", uno dei piassè grandi poeti veronesi del '900 no solo a Verona, ma anca in molte çità italiane. Come Berto Barbarani l'à decantà la so Verona co' quela ponta de ironia e sano umorismo. Par lu sentìr parlàr el dialèto par le strade e i vicoli ghe se slargava el cor. L'Adese l'è da considerarse una de le più grandi poesie del '900, quela poesia che podéa dar l'idea de una çerta continuità barbaraniana come quela storica de Dona Lombarda. Pochi i sà che drio a questo so modo de far, così a la bona, se scondèa una vena de malinconia, che catémo ne le poesie de guera. La "Preghiera" dal fronte Russo l'è un qualcosa de veramente intenso da lésar tante e tante 'olte e solo ci l'è stà Alpìn a quei tempi, pol  capìr cosa vol dir la gioia de vìvar e dar el giusto peso a le cose. I libri se pol catàrli ne le librerie antiquarie v.  www.maremagnum.com Le poesie presenti su www.larenadomila.it te pol catarle sul libro "Poesie par i veronesi" Ed. Demetra 1999
Altro