Giorgio Gioco

Giorgio Gioco (+2019), l'amìgo de La Rena Domila che l'è riussì a portàr la poesia in cusìna. No l'éra solo un cógo, ma un veronese che ghe piaséa la so çità, amante de le tradissioni e de la so storia. De lu conservémo un ricordo grandissimo, la prima persona che l'à credù nel sito, organisàndo tra l'altro co' el Diretòr numarose manifestassioni ne la çità de Verona. Da ricordàr anca, che 'l s'à dato da far, par realisàr la statua del grande Berto Barbarani amìgo de faméia e de tanti veronesi. Ciao Giorgio!


LA PASTISSADA


LA PASTISSADA DE CAVAL

Se te vol farte un regal,
un regal a la Cangrande
compra carne de caval
e po' dopo pensa in grande.

Cori in piassa a far la spesa
de carote e de...morbìn,
seole, sedano, del lardo
no desmentegarte el vin.

A remengo l'avarissia,
par un piato de gran nome,
te ghe vol del bon Recioto
'na botiglia de Amarone.

Taia po' la carne in pressia
a tocheti e tochetini;
le verdure del desfrito
ben taiade a dadolini.

De farina, quela fina,
buta pur 'na piovesina
su la carne e le verdure
fin che el fogo el le seduse.

A 'sto punto meti el sal
quel bon sal de la moral.....
la polenta moscardina
che la ronfa in la ramina.

Par na pastissada fina:
çinque ore de cusina.
Far pipar 'sto gran parol,
pian pianin, più pian ch'el pol.

(Giorgio Gioco)

PASTA E FASOI


PASTA E FASOI

Sia d'inverno che d'istà,
col gran fredo e col gran caldo
e par quanto se convien
l'omo g'ha da magnar ben.

Disè pur qul che volì
no gh'è gnente de più bon
sia la sera che a mezdì
de un cuciàr de minestron.

La me pasta coi fasoi,
spessa come el fusse miel,
me la insogno fra i ninsoi,
me la cuno nel çervel....

L'è el più bon piato nostran,
da San Zen fin a Cangrande
sensa truchi e sensa ingan
l'è un bocn da festa grande.

L'è l'insegna de Verona
la me pasta coi fasoi,
se la magna zo a la bona
e la fa cressar i fioi.


(Giorgio Gioco)





I PEVERONI

I PEVERONI

I peveroni i è 'na gran verdura,
col sol de agosto i porta el so calor,
dal condimento no i ciapa paura,
i ghe fa da rufiani color.

I va d'acordo col so pomodoro,
par un bon piato de peperonata;
co l'aio, 'l suchin e poco aloro
i te regala anca la caponata.

Un gran saor picante, apetitoso,
i se la intende ben co le patate
col ripien, po', i gà del portentoso
ch'el va ben sia d'inverno che d'estate

Vegna i paneti col so peveron
che i te dà forsa e in più sodisfassion.


(Giorgio Gioco)



CREMA DE SUCA


CREMA DE SUCA
 

Anca la suca, cari mei, se stima
al contrario de quel che fa i suconi,
la se presenta giala e moscardina
par regalarte piati forti e boni.

pronta d'inverno par tute le stagioni,
se la capita in man del cogo esperto
co la so fantasia, co le intensioni,
da la cusina'l tira su un concerto.

Se scomodemo quel del messisbugo,
che fasea da magnar in Vaticano,
co la suca e un poco de bon uso,
el contentava l'ospite più strano.

Viva la suca, bona e sucarina:
"Te darìa la corona de regina!"

(Giorgio Gioco)



LE MELANSANE

LE MELANSANE
 

La Melansana dal so bel color
l'è un ortagio che l'è tanta mana
frita, al forno, in padela e su le brase
la te dà piati par na setimana.

Però bisogna un poco starghe a drio,
taiarla zo a fetine, comodà,
spolverisarla con una gran de sal,
te la fè deventar una bontà.

Se te vol, la va ben co le verdure:
al suchin, la patata, el pomodoro....
Portà in trionfo po' co' la so pasta
la te regala piati in fin che basta

Le melansane cari amiçi mei,
l'è un bon piato da lecarse i diei

(Giorgio Gioco)




EL POMODORO


EL POMODORO
 

El pomodoro, fioi, l'è un fruto onesto
che vien da l'altro mondo, da là via,
rosso, infogà de sol ma sempre fresco,
con più lo magno, più lo magnarìa.

L'è bon col sal e un fià de peverìn
no meterghe l'asedo ma el limon
el te sbrisigola 'l mato de morbin
el te controla anca la pression.

No gh'è piato italian ch'el pol far sensa,
el so color, rinforsa anca el saor,
se te lo peli, l'è 'na penitensa
co l'aio, po' el da l'ambassador

mi lo vorìa par tute le ocasioni:
l'è proprio da magna in du boconi.

(Giorgio Gioco)

 



Pin It