LA RENA DOMILA - DAL 1999 EL SITO VERONESE DEI VERONESI IN VERONESE

Secondo a quanto podémo catàr scrito su enciclopedie e vocabolari, el dialèto l'è un sistema linguistico usà in zone geograficamente limitade in un contesto sociàl e culturàl ristreto. Se volemo ndàr più nel specifico, el termine el vien dal greco Diálektos "lingua" derivà dal verbo Dialegomai "parlo". El dialéto in generàl l'è una forma comunicativa parlada e no scrita, tramandà de pare in fiol che la se porta drio tuta la cultura de un popolo. Ma no sempre l'è così come nel caso de molti dialèti d'Italia. Col tempo anca el Veronese l'à subì una forma (grassie ai numerosi scritori, poeti, artisti veronesi che i l'à difusa) de "codificassión scrita" che fatalità l'è propio la definission de "Léngua". I linguisti antropologici i definisse el dialèto una forma specifica de una lingua usà da 'na comunità de parlanti, in pratica la difarensa tra lingua e dialèto l'è tra l'astrato e 'l concreto, fasendo risultàr che nissuni parla una léngua ma tuti i parla un dialèto de 'na léngua.La Léngua l'è usà in un zona bela granda, el dialèto in una parte de zona. Alora el Veronese l'è una léngua o un dialèto? L'è una léngua formà da tanti dialéti. La provinsia veronese la confina con le provinsie de Mantoa, Vicensa, Padoa, Trento e Bressia, che comporta l'imbastardimento de la parlada Veronese e quindi l'alterassión de le parole specialmente ne le nostre zone de confine par esempio a San Bonifacio, Mossecan, Valés, Roaredo de Guà, Castagnaro, zona Garda-Baldo ecc. Par semplificàr ancora piassè ò disegnà sto schema 'ndóe se vede che rispéto a la çità, ne le zone de confin gh'e un influsso magiór de le parlade da parte de le altre provinsie. Quindi partendo dal dialèto de la çità e andando verso le zone de confine se scominçia a sentir de le sfumadure ne la parlada, inissialmente de calche letara e/o parole acentà e via via sempre piasè forti a favor de la vissina "tera straniera". Le "sfumadure" che catemo tra le zone de confine e la çità, l'è un incroso de parlade e de acenti, no con tante difarense, che podemo sentir tra paesi e/o contrà confinanti tra lore. Rispeto a la çità, in Lessinia o ne la Bassa podemo catàr anca dei termini a 'olte completamente diversi, magari dovù al tipo de mestièr (es. atressi par laorar i campi o par far el botiér). Par la parlada Veronese Ve rimando parò al relativo capitolo. Avemo visto che 'l dialèto el se porta drio la cultura de un popolo, ma no se capisse come mai ci parla dialèto el sia ritegnù un sotosvilupà o un ignorante, inveçe se vien parlà da una persona famosa e conossù alora el vien rivalutà. A parte i soliti poeti e cultori veronesi, la nostra parlada la tende a èssar scancelà a favòr de un italian sempre più bistratà da le lingue straniere come l'inglese che definisso macheronico in Italia, deventando cossita un "carneval" de parlade. L'unica cosa par salvar el Veronese, l'è, che quei pochi che i le parla ancora, i continua a farlo tramandandolo a fioi e neòdi. Portarlo ne le scole sarìa el massimo zontandoghe el studio de le nostre tradissioni, insegnando a 'sti fioi del terso milenio come se vivea 'na 'olta, cossita che i possa catàr de le cose positive e perfessionàr le cose negative rendendole mejo e al passo coi tempi. L'ultima solussion l'è scontà, ma Ve la digo istesso, dovì continuàr a vardar www.larenadomila.it e magari spedir via imeil de le Vostre esperiense e altro materiàl par el ben de la nostra lingua o "lengua".

SECONDA LESSION - 2.0 Scritura, Letura e Pronuncia
Ghe tanta zente che me dise che riesse a parlàr el dialèto ma no scrìvarlo e lésarlo. L'Alfabeto Veronese l'è formà da le classiche 21 létare come in quel Italiàn ma con la zonta de la "J" quindi A,B,C,D,E,F,G,H,I,L,M,N,O,P,Q,R,S,T,U,V,Z,J. Se andemo a esempio ne la zona de Monteforte D'Alpon podemo catàr la presensa de la "X" usà ne la parlada de la gran parte del Veneto, un esempio l'è ne la frase "xe drio rivar" a Verona "l'è drio rivar" 'ndoe la "x" l'è parò pronuncià come la "s" del fior "rosa". Se vardémo la scritura, secondo molti, nel Veronese no esiste le létare dopie. Da 200 ani parò, grandi poeti veronesi, i fa uso de la létara 's'. Par un problema de comprensión infati, a 'olte convien zontàr un altra "s" a quela presente, come nel caso de rosa se te devi dir rossa o magari ne la parola lesion par dir lessión. Ne l'ultimo caso, ne la Bassa Veronese, se pronuncia z deventando "lezion". Ne la Valpolesela par esempio l'uso de la dopia "s" vien pronuncià come "raforsativo" in un discorso, come ne le parole grosso, massa etc. Prima parò de 'nar avanti, podemo fermarse propio su 'sto problema. Come dito nel caso de la parola "rosa " se la scrivo così, per intèndar una cosa, a esempio rossa come un semaforo, no se capisse, te si costreto a zòntàr un altra "s". La "s" del fior rosa, se te la pronunci l'è"sonora" in posissión intervocàl es. fantasia, musica, caso, riso, naso mentre la "s" de rossa l'è "sorda" e pronuncià come "s lunga" tasso, sasso ecc. Anca nel caso de "z" dolce o sonora quando l'è seguida da la vocale "i" seguida a so volta da un'altra vocàl, come ne l'italiàn polizia, grazia, ospizio, vizio, noantri pronuncemo polissia, grassia, vissio....ecc. Ne la parlada de l'Alto Garda le parole le vien "tranciade" con forti influense trentine par esempio ramet inveçe de rameto, mès par dir mèso, vent par dir vento, gos par gosso, nòs par dir nostro etc. El problema avemo visto l'è soratuto nel discorso de la "s", che riussimo a capir el "suono", solo lesendo un intera frase. Par sercàr de dar 'na man a capir, el più de le 'olte vien messa la "z" al so posto, fasendote sembrar da la Bassa; lezendolo parò te lo pronunci come i t'a insegnà. L'è un compromesso, ma scrìvar SZ par el fior Rosa ROSZA te par ungarese. Altro discorso, podemo catar la letara "ç" che pol sostituìr la "s" de séna/çena, serùmola/çerùmola, sercàr/çercàr etc.. In pratica la magior parte dei casi, la létara "c" davanti a "e" "i" (ci-ce) che la g'à el suono "tche" "tchi" vien sostituì con la "ç". Da ricordar parchè frequente l'è "s-c" solitamente davanti a la létara "i" (raro "s-c" davanti a la létara "e" s-ceto, s-cèpo etc.). s-ciantiso (stchantiso) s-ciopo (stchopo), s-cianco (stchianco), s-ciafa (stchiafa), ris-cio (ristcho). Casi particolari podarìa èssar la "ö" che corisponde al francese "eu" tipico de le zone gardesane esempio piöve, malmaö etc; ü corisponde al suono vocale palatal lombardo presente in un poche de parlade del Garda (scürtà, grügn) mentre "âêîô" usà ne le parole de l'alto Garda con sonorità slongà e nasalisassion ne la parlada dênt, gualîf, crôs, balsâ; " ' " va in sostitussion de le parole che scomincia par "v" specialmente in Lessinia e sul confin con el Bressian e Mantoan 'edel>vedèl>vitello, édar>védar>vedere, 'ardar>vardar>guardare in pochi casi con parole che scomincia par "l" 'arase>làrese>larice, par "u" 'na>una, par "a" 'ndén>andén>andiamo, par "i" 'mpisàr>impisàr>accendere, par "o" 'tobre>ottobre. Ultimo caso che Ve propongo, che pol capitarVe, l'è la "j" che va a sostituir la "i" come in "formaio" che deventa "formajo" o "iutar" che deventa "jutar", ne la magior parte dei casi parò va in sostitussion de quel che in Italian pronuncemo "gl" con la zonta de la "i", fameja (famiglia), mejo (meglio), tenaja (tenaglia). Prima de finir la lession podì visionàr chi de fianco el schema molto utile e interessante, de la parlada veronese ne la provincia. 

1 - Parlade del Lago (sora l'asterisco ghe influssi trentini, soto l'asterisco ghe influssi bressiani) Malcesine parò l'è un isola linguistica bressiana. 2 - Veronese del Baldo e dela ValdAdese con influssi trentini. 3 - Valpolicelese 4 - Veronese dela Lessinia o Lessinico. 5 - Parlade Veronesi con forte influsso viçentin (nel colognese con influssi padovani). 6 - Vilafranchese (Vilafranca, Custosa, Pojan). 7 - Parlade con influssi mantoani. 8 - Parlade dela Bassa. Se distingue el nogarese e el legnaghese, el primo con influssi mantoani, el secondo con influssi polesani e a est oltre l'Adese Padoani. La linea grisa delimita le tri ripartissioni

Prontuario dela grafia nela poesia Barbaraniana
Sto prontuario l'è stà realisado con lo scopo de iutàr ci gà problemi con la scritura dialetàl veronese o no se ricorda come se scrive alcune parole specialmente acentade.

Parole acentade	Acenti
che à fato	à
c'èlo che pianse	c'èlo
c'è stà a dar na man?	c'è stà
ch'el porta passiensa	ch'el
ci 'l sia	ci 'l
cos'èi sti schersi?	cos'èi
èmo fato	èmo
che ghe fè	fè
cosa g'ala	g'ala
che g'avì	g'avì
ve g'ha assolta	g'ha
che gh'è in cusina	gh'è
gh'era par aria	gh'era
no g'ho che quatro	g'ho
ghi n'è fin che costa	n'è
ghi n'ò quatro	n'ò
e mi g'ò dito	g'ò
i à butado	i à
i è fate	i è
quando jè svelti	jè
che j è bei	j è
j-à risposto	j-à
la me l'à data	l'à
l'è nato	l'è
che l'avea	l'avea
l'era fortunada	l'era
el m'à lassà	m'à
i m'ha messo	m'ha
su 'na strada	'na
che non ghe n'à	n'à
me n'è capità	n'è
ma ne 'l cor	ne 'l
che no'l pol	no'l
mi ò ciapà, e ò dito	ò
la s'à tirado su	s'à
la s'ha convinto	s'ha
quando s'è veci	s'è
che i t'à lassado	t'à
che t'ha impromesso	t'ha
ma t'è magnado	t'è
luna in t'el posso	t'el
che t'ò comprado t'ò	t'ò
Casi frequenti	Esempi
a i giardini	a i
na çerta roba	ç
co le tresse	co le
col fero	col
fa de i sbreghi	de i
e i amorini	e i
e el solito	e el
par che ghe sia	ghe
i-era diaoli	i-era
verdi de voja	j
svejève	jè
j era diaoli	j era
che j-era	j-era
ne la sporta	ne la
de seda s-ceta	s-ceta
a casa soa	soa
a ci vol	vol

TERSA LESSION - 3.0 Giorni e Nùmari
3.1 Giorni de la Stimàna - I giorni de la stimàna nel veronese
-Luni
-Marti
-Mèrcoli, Mèrcodi (Poejan), Mèrcori (Vilabart.), Mèrcore, Mèrcordi (Vigasi, Bonferar), Mèrculi (Veronela), Mèrco (a.Garda), Mèrcoldi (Valpolesela).
-Sòbia (da lésar con la s de rosa), Zòbia, Zòba (Vilabart.), Dhòbia (Lessinia, Valpolesela)
-Vèndri, Vènare (Verona, Valpolesela), Vènardi (ValdAlpon), Vèndare (Castagnaro) Véndri (Lessinia), Vènde (a.Garda),
-Sabo
-Domìnica, Domìniga, Doménega, Dumìnica (Valpolesela).

5.0 Pronomi Personali
Par no èssar massa pesante Ve fasso 'edar nei schemi quali jè, i Pronomi Personali (mi, ti, lu, noaltri, voaltri, lori) finendo con esempi utili:




/// El conta sempre bale e nissuni ghe crede: El(nom. sing. in funsion de sogeto) conta sempre bale e nissuni ghe (dat.sing.; complemento de term.) crede /// Me par che i g'àbia rasòn: Me (dat.sing.; complemento de term.) par che i (nom.plur.; sog.) g'àbia rasòn /// Se 'l me brinca l'è forte: Se'l (él, nom.sing.; sog.) me(acus. sing.; compl. og.) brinca l'(nom. sin. sog.) è forte /// El ne disea tante fole: El (nom. sing.; sog..) ne (dat. plur.; compl. de term.) disea tante fole /// El Cana el i a fermadi e lori i a confessà: El(in sto caso l'è articolo) Cana el (nom.sing.; sog. ripetù dopo el sog. Cana) i(acc. plur.; compl. og.) a fermadi e lori (nom. plur.; sog.) i (nom.plur.;sog. ripetù dopo el sog. lori) a confessà.

Solitamente come ne l'italiàn el pronome possessivo e l'agetivo i se presenta nel stesso modo. Nel dialèto gavemo una dopia forma, la prima (mio, tuo, suo) se usa soltanto predicativamente, la seconda (mé, to, so) in funsión de atributo.  Es.1- Dame el me (atributo) capel  Es.2- Sto ombrel l'è mio (predicado)  Degno de particolar considerasion riguardo ai pronomi possessivi l'è el fato che el dialèto  el gà una forma unica nela tersa persona, sia par indicar che el possesor l'è uno sol, sia par indicar che i possesori iè pi de uno.  Es.1- Quel butin pensa sempre ai so zugatoli.  Es.2- Quei butini i pensa sempre ai so zugatoli.  Talvolta el dialèto el raforsa el pronome possessivo col genitivo del corispondente pronome personal. Es. mio de mi, tuo de ti, suo de lu;

Altro argomento che vojo tratàr parchè de uso comùn jè i pronomi dimostrativi. Par indicàr una cosa vissina a ci parla o a ci scrive: In posissión predicativa g'avémo quésto, quésta, quésti, quéste mentre in posission atributiva g'avémo stó, sta, sti, sté. A 'olte come rafforsativo del pronome vien zontà l'averbio "qua" (o "chi" par ci vive in campagna o in montagna) par esempio: El to baston l'è quésto qua. El pronome quél, quéla, quéi, in italian corisponde con le forme quello, quella, quelli, quelle, indicando essar lontan da la prima persona che parla o scrive, quanto da la seconda persona con ci se parla o se scrive; Es. Dame quél scartosso. Un altro caso podarìa verificarse quando zontemo al pronome "quel" l'averbio "là". Così quel fior là indica un fior lontan tanto da ci parla come da ci ascolta, inveçe se disemo quel fior lì indica un fior lontan da ci parla ma vissin a ci ascolta. Nel'uso dei pronomi interogativi, indefinidi e numarali el dialèto veronese l'è in quasi tuto conforme al'italian.

6.0 SESTA LESSION - Agetivi e Articoli
6.1 Agetivo Qualificativo (esempi)

L’era grasso e grosso come on baril. Se fusse stà farghe dele mudandote, ghe voleva on nissol intiero. El caminava cofà un bogon, più molo che on strasso, co' 'na velocità, manco de tre chilòmetri al ora. Più che te ghe osavi, manco el se spaurava. Ghe mancava meno de du giorni par coparlo. Che bruta sorte che i ga anca i porsei co i deventa grassi! 1. Comparativo de uguajansa – Come Es: Giorgio l’è vècio come mi. 2. Comparativo de superiorità – Pi, più. Es.: Piero l’è più vècio che Bartoldo, pi grando che Checo. 3. Comparativo de inferiorità –Manco, meno. Es.: Carlo l’è manco grasso de Piero. Le còtole dela Marieta le ze meno longhe che quele dela Santina. 4. Superlativo relativo– Pi de, più de. Es.: L'è più de vinti ani che no vedo pi de vinti osei. 5. Aumentativo – L'aumentativo, se zonta a le parole on o asso . Es: Furbo, furbon; bon, bonasso; caval, cavalon, cavalasso; omo, omon; beco, becon, becasso. 6. Diminutivo – El diminutivo se forma, par esempio tirandoghe via l'ultima letara de la parola (la vocal) e zontangoghe in/ina eto/eta etc.: Bela, belina; santo-santin, caro-carin-careto. 7 Se dopera in qualche caso anca i diminutivi pegiorativi, depressativi ma Ve risparmio....