LA RENA DOMILA - DAL 1999 EL SITO VERONESE DEI VERONESI IN VERONESE

Piassa Erbe vista dal grande Berto Barbarani. Semo nel 1910 quando l'è stà inserì tra i monumenti nassionali da conservàr; par questo motivo le case del "Gheto" che se specia ne la piassa iè stà salvà, mentre quele più distanti, butà zò par far posto al super-cine. Par molti ani Berto e Angelo Dall'Oca Bianca i s'à messi a difesa de Piassa Erbe sensa èssar 'scoltà. Par fortuna el riconossimento da parte del Governo el g'a messo fine a la questión

Pochi i conosse Berto come bravo giornalista in léngua italiana, semo abituà a conòssarlo come poeta vernacolàr. Grassie a un libro publicà e regalà da l'editòr Bonato "Solitudini sul Garda", èmo deciso de publicàr questa storiéla e provàr de persona quel dito da Berto. Se parte da la località de Cassón de Malsésen, par rivàr grassie a un sentièr par gnente façile, fin a l'Eremo dei Santi Benigno e Caro. Tuto quèl  contà da Barbarani l'è vera, nei ultimi 70 ani no l'è cambià gnente! Ghe sarìa tanto da dir, la forza e la precisión ne le descrissioni, le fa parte de un altro periodo, un altra epoca che no gh'è più. Poeta e giornalista, laòri che ne la vita de Berto s'à ingropà più volte, uno no podéa far manco de l'altro.

Articoli che i parla de Berto a livél nassionàl. Come cronista del "Gazzettino" el catémo par le strade de Avio, parlando in léngua italica, mentre un articolo de l'amigo Renato Simoni el parla de lu su la "Domenica del Corriere". Tra le curiosità anca el segreto su come cusinàr el sèleno-rava a la veronese e la poesia "El Bastardo" in portoghese. Una rubrica che ogni tanto la vegnarà sgrandà co' altro materiàl che catémo sparso par l'Italia.