| Cosa dir de la carega, dir de ben o dir de mal? L'è un compito assai duro, duro come un toco de legno. Ela pol essar fata de diverse piante, nogàra, làrese, fò, sirèso e ròaro, ma al dì de ancò de plastica, pvc, resine e derivadi dal petrolio, co' le forme più strane pensà da grandi desainer, che no ià mai posà el cul su le strope incrosà. Nel novo milenio, se parte da un trespolo da papagàl che te cati ne le noe ostarie o loungebar (ma che casso vol dir lounge bar, ma casso parlito?), fate de fero che te par de averghe un caucio impiantà nel..... a quele a bogonela che te finissi in tera co' le gambe par aria. Ma vuto métar, sentarte su la paia come l'à fato un butìn domila ani fa? Ma vuto métar la sensassion de verghe una sperangola de legno che tièn la schena drita come 'na steca de bacalà? La carèga l'è sempre stà el simbolo dei potenti, de re e regine, noàntri a Verona gh'èmo parfìn el rion de la Carèga, secondo i antichi, una catedra de un magistrato romàn tal Cornelio Annone spacà a metà pronta par sentarse sora. I sovrani come Re teodorico o el nostro Principe Cangrande, i g'avéa quela co' soto el bocàl, quertà da le vesti regali, cosìta no i g'avea da alsarse e scapàr in bagno come femo noàntri quando gh'èmo el cagoto. I novi desainer che i ghe ne spara de c...vacade, no i è riussì a far un model de 'sto tipo, che sarìa comodo, magari i cinesi, par laoràr sempre, i ghe l'à in dotassion. Ma la comodità no la va mai de pari-passo con la modernità. Par passàr da la carèga a la banchèta ghe vol poco, ma almanco te pol stàr sentà in do, tacadi come do morosi quando i se ciùciòna. Insoma, pol verghe forme diverse, fata del materiàl più strano, anca de piera. Se te ve in montagna o longo le campagne te cati le sponsaore, giusto par postàr el cul, magari soto a 'na pianta a l'ombria o tacà a uno de quei capitèi de Santi e Madone. Montagna, eco, ghe n'emo una qua tacà a la Lessinia, ciamà Carèga divisa in du tochi, a Verona gh'è tocà le gambe , al Trentino le speràngole. Anca la natura l'à volù dar el so contributo, dandoghe questa forma de tuto rispeto. Ma al dì de ancò, anca se no gh'è conti, contesse e regine, gh'èmo i politici ormai abituadi a starghe sentà par ani, come i g'avesse la cola soto al cul, tanto da pensàr che i abia utilisà anca dei ciodi; par lori parò, nel tempo ciapa la forma de una poltrona, 'ndoe i pol stà stravacà par ani e ani sensa destacarse e sensa verghe el bocàl de soto. Come dapartuto, a seconda de come tira el vento e par no darghe dispiaser a nissuni, tiràndo l'aqua al to molin, te pol stàr "sentà su do careghe"; bison èssar brai parò, no l'è da tuti, anca se, quando te riva l'ocasion te lo fe anca ti, sicuro! Ma se te si scarognà, pol piovar soto al cul anca quando te si sentà. E no gh'è gnente da far. Se inveçe te capita 'na desgrassia o i te conta 'na bruta notissia, te te senti mancàr la carega soto le ciape, un sconforto. A scola me ricordo, l'era un bruto voto, un bel quatro, tanto che podéa vèrzar 'na botega de sole carèghe! Insoma ne la nostra vita pol èssar utilisà in mile modi e in mile circostanse. L'è utile par ci l'è arènte ai malà nei ospedài, par starghe vissin, farli stàr meio con la propia presensa, ma anca par star tacà a la cuna de to fiol. A proposito de cuna, l'è belo cunarse su quela a dondolo, magari denànsi a un camin co' le brase e 'l fogo che bampa, come faséa to nona che la se ponsèa co' l'ucia mentre la taconava i calsèti sbusi nel calcagno. Se te zònti un posto a tola, parchè gh'è un amigo in più, te tol la carèga e tuti iè sentà in compagnia, a magnàr, bèar e ciacolàr. Se inveçe te ve in vacansa al mar te pol verghe quela a sdràio par ciapàrte el sol. Più scrivo, più penso e più me vièn in mente che la carèga te pol catàrla al laòro, in ufissio, gh'è quela co' le ruèle soto, par spostàrla de qua e de là sensa far fadìga. Gh'è n'è anca una, no tanto alta, ciamà sgabèl, parò no l'è cosìta comoda, la serve solo par postàr el cul un poco, sponsàr e nar via quasi subito, come quando te parchegi la machina con le quatro frece in strada. Se te giri el mondo te vedi che gh'è popolassioni che preferisse sentarse in tera o su dei cussini o magari sui rami dei àlbari o sora le bestie, ognuno de noàntri g'à el desiderio de ciapàr fià, stando comodi e no l'è importante come. La carèga in pratica, la cambia forma nel tempo ma stando ferma, la va drio a la vita moderna sempre de corsa, sensa movarse. Una vera compagna che te compagna e che soratuto la demostra de èssar una vera amiga, no la dise gnente quando te magni pasta e fasoi! (Andrea Toffaletti) |
