OmoSignàpola e Pìtaro
La to çità l'è in pericolo? Qualche malvivente l'à cavà i semafori o s'à brusà la Pearà sul fogo? Te pol ciamàr i Paladini de la Giustissia, L'OmoSignàpola in compagnia del Pìtaro, i è pronti a sistemàr i problemi a Goto çity (Gotham çity). Se 'l Sindaco ordina, el comissario Cordoni risponde e ghe passa la bala al Tenente Arà che quasi sempre ciama l'OmoSignàpola che no bisón disturbarlo quando el varda la tilivisión da borghese, ne la so vila su le Toreséle soto el nome de Conte Brulé. Ogni riferimento a persone, bestie o cose l'è puramente casuàl e l'è fruto de fantasia!
| LE STORIE DE L'OMOSIGNÀPOLA E DEL PÍTARO | |
 OGNI MESE una storia diversa, ogni mese i Paladini i çerca de risòlvar i problemi a Goto çity. L'OmoSignàpola in compagnia del Pìtaro iè sempre vigili su la çita 'ndóe la Giustissia grassie a lori, trionfa sempre e la delinquensa pol 'verghe solo le ore contà. Cosa l'è sucesso a Goto çity? Storia del mese |
OMOSIGNÀPOLA
| OMOSIGNÀPOLA | |
Cosa dir de Omo Signàpola el Paladìn de la Giustissia de Goto çity? Se gh'è rogne el çerca de risòlvarle (quele dei altri nel limite del possibile). Se'l pòl laoràr sensa sfadigàr, sarìa mèio, ma el Sindaco e 'l Comissario i le fa tribulàr. Col so compagno Pìtaro, gira in lungo e in largo la provinçia, par el ben de la comunità contro i delinquenti. No sempre le cose le pol 'nar par el verso giusto, ma le solussioni le va drio a la famosa frase: "mèio el tacón del buso". Par lu la giustissia la deve trionfàr sempre, l'importante l'è no rimetarghe schèi... Batman > Uomo Pippistrello > Omo Signàpola
|
EL PÌTARO
| EL PÌTARO | |
 El Pìtaro, fedele compagno de l'OmoSignàpola, sempre a difesa de la giustissia, El çerca de risòlvar i problemi de la çità ma no sempre le so idee le va ben. Par 'sto motivo, el conta sul servo Alfredo de la vila del Conte Brulè, che vista la so età e la so esperiensa l'è in grado de darghe sempre dei boni consilii. Parò l'è un brào butèl anca se preferisse el stile de vita del Michelasso, magnàr, béar e 'nar a spasso. Robin > Pettirosso > Pìtaro |
EL CONTE BRULÈ
| EL CONTE BRULÈ | |
 Me racomando de no dirlo a nissuni, ma in verità el conte Brulè l'è l'OmoSignàpola. Quando gh'è rogne el deventa un Paladìn de la Giustissia. Nato da una faméia de imprenditori del nord-est, vive ne la vila su le Toreséle e par scomessa el s'à portà in casa da i campi, un butèl de nome Dino Gresón par farlo studiàr e deventàr 'na persona de tuto rispéto. L'importante l'è far beneficensa par farse notàr da la comunità e tegnér alto el nome de la casata co'l minimo sforso. Bruce Wayne > Conte Brusa el Vin, Brulè |
DINO GRESÓN
| DINO GRESÓN | |
 Nato a Minerbe da 'na faméia de contadini, 'ndoe l'à laòra nei campi de la "casata" del Conte Brulè, da un pochi de ani el vive ne la vila su le Toreséle. Nel tempo perso el studia e fa el mantegnù, ma nel momento del bisogno el devénta el famoso Pìtaro, uno dei Paladini de la Giustissia de Goto çity. Dino l'è brào butél, anca se la vòia de laoràr l'è poca. Quando el g'à un segreto el va dal servo Alfredo, che ghe prepara una bona Pearà. Dick Grayson > Dino Gresón. |
EL SERVO ALFREDO
| EL SERVO ALFREDO | |
 Alfredo l'è el servo del Conte Brulè, el brasso e la mente de l'OmoSignàpola. Grassie a la so esperiensa de vita el cata sempre de le bone solussioni par el ben de Goto çity. El so desiderio sarìa de 'nar in pensión ma el conte preferisse tegnérlo come tuto-far e pagarlo poco. Grande cogo, custode de la riçèta originàl de la Pearà el fa da magnàr da vero chef. Alfred > El servo Alfredo |
COMISSARIO CORDONI
| EL COMISSARIO CORDONI | |
 El Comissario Cordòni de la Questura de Goto çity, l'è la Giustissia in persona. Dopo ani de laòro par le strade de la çità, preferisse la gestión de le rogne da drio a 'na scrivania. Cossita ciama l'Omo Signàpola par risòlvar problemi de trafico, par 'nar drio ai delinquenti o par farghe la spesa. 'Desso el vorìa 'nar in pensión, ma ogni ano, grassie al so impegno, l'è obligà dal Prefeto a restàr al comando de la Questura. El so fido consiliér l'è el Tenente Arà dei Vigili urbani. Commissario Gordon > Cordòni |
TENENTE ARÀ
| EL TENENTE ARÀ | |
 El Tenente Arà, da ani l'è el servo del Sindaco de Goto çity, par lu, la Giustissia la vién par seconda ne la scala dei valori dopo i schèi. El varda sempre che tuto quèl che'l primo çitadìn dise, vegna fato. Cossita ciama, obliga e delega el so laòro a l'OmoSignapola. El so piato preferì l'è una bona Pasta e Fasòi brustolà, in quanto la ghe riesse sempre cossita e no l'è un brao cogo, ma a l'amigo Comissario ghe piase. Tenente O'Hara > Tenente Arà |
OMA SIGNÀPOLA
| OMA SIGNÀPOLA | |
 Questa l'è una butéla d'oro, cressù in una faméia de polissioti. Quando no l'è vestì da Oma Signàpola l'è la fiòla del Comissario Cordoni, segretaria in uno studio legàl. Anca se no par, ghe piàse el Conte Brulè ma èssendo una de l'Associassión Feministe Vegane la se scontra sempre co' lu. L'importante l'è che la Giustissia la regna a Goto çity e anca èla la vol dar el so contributo, parò so pare l'è contro l'idea far laoràr le done ne la Polissia. Batgirl > OmoSignàpola |
ZUGATOLÓN
| ZUGATOLÓN | |
 Uno dei più grandi delinquenti de la çità de Goto çity. Ghe piase schersàr e organisàr rogne, par far deventàr la çità un posto sensa sicuressa. Grassie a le so conossense e a le so origini del sud, el vièn ciamà "Giocattolone" da la malavita. L'è in grado de comandàr al Sindaco, de stamparse schèi falsi e de smorsàr i semafori de la çità par creàr un bel casìn. L'unico problema se ciama Omo Signàpola che riesse sempre a métarghe el bastón tra le rue. The Joker > Zugatolón |
MASTRO INDOVINÉL
| MASTRO INDOVINÉL | |
 Anca Mastro Indoinèl l'è un delinquente ma de quèi che no se fa problemi a far del mal. Ghe piàse far schèrsi e far tribulàr el poro Omo Signàpola. Le solussioni a le rogne che se inventa i è sconte drio a l'anagrama del Cruci Verona de La Rena Domila. L'Omo Signàpola no riesse mai a rìsolverle par questo motivo se fa giutàr dal servo Alfredo, fedele "abbonato" The Riddler > Mastro Indovinèl. |
LA GATÀRA
| LA GATÀRA | |
 La Gatàra l'è una bèla bùtela, pecà che dopo la morte dei so genitori l'à preferì darse a droga, fumo e prostitussión. Dopo l'incontro con Zugatolón e Mastro Indoinèl la s'à specialisà in rapine e a come far cascàr a i propi pié, politiçi e imprenditori. Ghe piase i gati, in quanto par éla, i ghe soméia, fedeli quando serve. L'è incredibile, come no la sia mai stà ciapà da la polissia e a finìr al Canpón, ma la so furbissia nei ani l'à contribuìdo a tegnérla in vita. Cat-woman > La Gatàra |
