LA RENA DOMILA - DAL 1999 EL SITO VERONESE DEI VERONESI IN VERONESE

QUEL GIORNO AUDIO LIBRO <

Quel giorno - Libro dedicà a l'amigo Sergio scapà da Verona par amòr - Caro Letòr, te gh'è la possibilità, de lésar un bon libro ma anca de scoltàrlo da la voçe de ci l'à scrito.Nel 2009 in Brasìl, l'è deventà una telenovela a puntate da vardàr in tv co' milioni de spetatori. Una novità assoluta su internet, che Te invitemo a gustàr.

Fola moderna durà solo un par de mesi, tra un Romeo e 'na bela Giulieta del terso milenio. Dedicà al mitico Sergio che prima de scapàr da Verona dal dolòr, l'à volù che vegnesse messo nero su bianco la so triste storia in modo che altri no i fassa la so stessa fine. Fati realmente sucessi, scriti sul diario del nostro amigo e publicà in forma romanzà dal nostro Diretòr. Nomi de persone e de località i è puramente inventadi, el resto l'è tuto vero.

Introdussion - Quél giorno, lóngo el vial de platanari, 'ndóe i pensieri se perde, tra le frasche e la campagna, stava par realisarse un sogno. Cossita Sergio, con la so moto scassà, el coréa verso una contrà, de quele véce, bagnà dal Ménso, par incontrarla. Case de sasso, mèse smaltade, una tacà a l'altra con al çentro 'na césa, un bar e un campo da balòn. Éla, butéla de solidi valori, fiòla de un ofelìn (cogo da torte), impiegada in un ufissio del Comun, ghe piaséa la compagnia de amissi e parenti. Rivà a pochi metri da San Gioàni, el siél el scominçiava a s-ciumàr de rabia, con nùgole nere spampanade de qua e de là dal vento...Tic, tac....una gossa drio l'altra, bagnava el parabressa de la vespa special, ma ormai Sergio l'era rivà. Silvia, la sghimava dai scuri, se da la strada bianca el so amor vegnéa avanti. Più che 'edarlo, se riussìa a sentìr ben el rombo, da inissio paese; la marmita sbusà a Sandrà dopo aver pissegà con la rua un sasso. Con una bèla frenà e un polvaròn istesso de un fumogeno da stadio el se presenta. Colpo de clacson e con un bel soriso a trentùn denti, e no trentadu parché l'avea perso un canìn 'na stimana prima grassie a una busa, el dise: "son rivà, straco...ma son rivà". Con un scato da atleta dei çento metri piani, la core verso Sergio, sbatendo la porta de casa e passando a raso de la pianta de olìo che so pare l'avea pena piantà nel giardìn. "Sito qua?", con un strucòn e un baso degno del film Via col vento la storia la ciapa 'na bèla piega, ambientà tra la çità e un paese de la campagna veronese. Scominçià par caso in una sagra par dopo finìr in pochi mesi, l'è stà un aventura bèla da ricordàr e da contàr......

fola:favola; s-ciumàr:schiumare; sghimava:sbirciava; pissegà:pizzicato; stimana:settimana; scominçià:cominciato; nùgole:nuvole; ofelìn:pasticcere; Ménso:Mincio; Gioàni: Giovanni; éla:lei;

1° capitolo / el ritardo - Quél giorno, Silvia, no la rivàva mai. I era le sié de sera e i voléa 'nar al cine co' altri amissi. L'avéa barufà co' so mama par un fato, che subito el paréa sensa valòr. "Scusa el ritardo, problemi a casa con me mama". Vegnù fora la luna dopo averghe dà 'na bèla spalà al sol, i nostri morosi i và a sentarse su 'na banchéta in Piassa San Zen spetando i amissi anca lori in ritardo, tanto par cambiàr. El Vescovo Moro cissà quante sganassade el s'era fato a sentìr çerti discorsi e a 'edar le facie e le smorfie che i faséa. "Parché te giri sempre in moto e no te gh'è la machina? A me mama no ghe par vera, la dise Silvia". Lu pronto co' el classico soriso da pié, de uno che no tién in considerassion çerti argomenti el ghe risponde "parché no te vol comprarTe casa?". In efeti ne la vita ognuno de nojaltri ghe dà la precedensa a le cose che ghe piase e che ritién giusto. Intanto ne la piassa ingiassà no gh'è nissuni a parte un can col pél sbarufà, dal color cafélate e sopo da 'na zata. Sergio, el scominçia a sbossegàr, colpi de tosse forti, ma l'era ora del cine e la serata la sarìa finì poco dopo a mèsa note con el classico baso e strucòn soto al coèrto del distribudor de benzina a pochi metri da casa del nostro amigo. La note par lu, l'era ancora molto longa e quel che s'era dito, belo che sparì el giorno dopo....

'ndóe:dove; barufà:litigare; strucòn:stretta forte; banchéta:panchina; sbossegàr:tossire; sbarufà:arruffato; coèrto:tetto; sentarse:sedersi; Vescovo Moro: S.Zen;

2° capitolo / la casa - Quél giorno, me par de aprìl, quando i fiori i tira fora la testa e le lusertole le scapa tra un sasso e l'altro de quele mure da la pansa mola, Sergio l'era belo inmarocà; inciodà in leto con quatro linee de féara el spetava la classica telefonada da la "bèla" che nel fratempo ne la vecia contrà l'era drio a spassàr in camara da leto dopo aver lavà i piati. I scuri i sbatéa dal vento, tochi de rame scavessade de piope mese smarse da partuto. El silensio de boto, el finisse quando 'na telefonada a le oto de la matina de la butéla sveja el nostro amigo ne l'unico momento che l'era riussido a indormensarse dopo una note in bianco. "Se vedemo a casa mia tra mes'ora, parò te devi querzarTe ben parché ancò in vespa fa fredo". La casa de Silvia no l'era massa granda, tanto che'l bagno no'l g'avéa la vasca e la dovéa 'nar al pian de soto, nel garage. A tal proposito me vién in mente la casa de montagna dei me parenti che i g'avéa el cesso sora al luamàr a sinquanta metri da l'abitassiòn, fata de asse con in fondo un bel buso nero, che faséa paura ai buteléti nel momento del bisogno. El problema l'era che la dovéa nar fora da la porta de casa e zo da de le scale strete de çimento passando soto al pòrtego de asse costruì da so pare davanti al portòn e poco distante dal giardin con prà inglese, fiori arènte al cançél, piante grasse e al mitico olìo nato nel campo de un amigo de Parona. Al ritorno parò l'era una corsa par no ciapàr la polmonite. In cusina e in sala gh'era tuto in ordine e in fondo davanti a la tilivisiòn un bel divàn in pèl nera, usà da "romeo e giulieta" ne le poche ore de intimità. Cossita sensa far tante storie, el nostro eroe, el s'à intabarà ben e con spirito del classico inamorà, soratuto rincoionido, core verso San Gioàni......

inmarocà:ben raffreddato; féara:febbre; scavessade:spezzate; olìo:olivo; arènte:vicino

3° capitolo / la roca - Quél giorno, gh'era vento, che'l supiava dal Monte Lupia verso la Roca de Garda.....supia supia el Vento dal Monte Lupia; si parché, dovì savér, che par quanto staséa mal Sergio, de bon grado, l'a volù contentarla. Ghe da dir, che quando, te ghe vol ben a 'na persona te ris-ci de far cose che solitamente no te faressi. Dopo aver percorso i vinti chilometri in moto e rivà mèso ingiassà, el nostro amigo par la prima volta incontra, disemo cossita par dir, i futuri suoceri che i era drio a 'nar al marcà de Monzambàn. Gnente de particolàr, a parte un saludo e 'na strucà de man in una giornada missià tra nùgole nere e sol. E via con Silvia, vestì sportiva, bèla, coi cavéi biondi che i sventolava come 'na bandiera in çiél, in spala un bel zaino pién de bone robe da magnàr, me par una sfoia de pasta de quele lisiére con drento le spinàsse fata dal pare "ofelìn". La taca el motòr de la çinqueçento scassà, mèsa rùsena mentre lu al contròl de le ultime robe, machina fotografica, ciave de casa e ociai da sol. Ah si, el paréa un sogno, no ghe paréa vera che propio a lu ghe stasesse capitando una cosa cossita, quel che avea sempre sognà. Lasise, Sisàn, Bardolìn, la piova la querséa mèso lago a parte Garda. "Nemo a Garda el dise lu sganassàndo, là gh'è el sol che ne speta". No se sente volàr 'na mosca da parte de la butéla, l'era persa nei pensieri, al volante de la "pulsìn mobile" ciamà cossita par un pulsìn de pessa che'l g'avéa regalà e che l'era ligà da la séngia de sicuressa nel sedìl de drio; rivà nel paese lacustre, la piova e 'l vento l'era sparì de colpo, mentre el sol el se faséa forsa par végner fora. Su par la salita a pié, man ne la man, tra na vacada e 'na sganassada. "Gheto fredo? Sito straca", éla ghe dà un bel strucòn disendoghe:"sto ben, te pensi massa a mi". Dopo avèr sudà vinti camise, da la roca i se perdéa co' i oci sul lago inluminà da 'na spéra de sol. "Varda là, chéla barcheta, vorìa portarte, propio là, cossita se femo cunàr da le onde". Poco distante un grupo de persone in meditassiòn che sentendo le matade dei butéi, i s'era fermà; lu el çercava de fotografarla mentre éla la scapava par i prà e i castagnari. "Speta cara, fèrmaTe un secondo, ciapa sta maia de riserva e pòstala su le spale che te si sudà" cossita da gnagno el riesse a brincarla. Rivà a l'eremo dei Camaldolesi, 'ndóe la tranquilità la regna sovrana, i se senta soto al pòrtego o meio lu su 'na banchéta de piera mèsa intrielà con éla su le so gambe. La gola parò del Sergio l'era tuto un fogo, e i primi sintomi de 'na bèla pronòspera i se faséa sentìr, che insieme co' éla no i contava più de tanto. Rivà strachi a Bardolìn dopo aver caminà come Re Magi, par de le stradele de tera batù, col vento che sguaratava le nùgole da 'na parte a l'altra del lago, i s'era stravacà davanti al porto a sponsàr. L'era ora de tornàr a casa, 'ndóe 'na fogassa, anzi no, la ceciata, tipico impasto de aqua e farina de ceci del mantovàn i le spetava.....

supia:soffia; ingiassà:ghiacciata; sganassada: risata; piova:pioggia; arènte:vicino; maia:maglia; fogassa:focaccia; drio:dietro; gnagno:persona furba; sguaratava:sciacquava, nel senso di spazzare via; sponsàr: riposare; spéra:raggio;

4° capitolo / el kebab - Quél giorno Sergio, par contentarla l'à magnà el Kebab, lu cressù a pearà e recioto, par amor, l'avéa butà via tuti i so discorsi su le tradissioni veronesi. De drio a l'ala de la rena, gh'era un bel locàl gestì da indiani, che l'avèa superà i contròi sanitari. Lu el s'era informà anca de questo, se propio el dovéa far un fioreto, almanco el restava vivo. Éla seitàva a vardarlo e a sganassàr mentre con 'na serie de tentativi Sergio el çercava de capìr come magnarlo dopo essarse sbrodolà col sugo su la giaca. "Ridi ridi, che la mama l'à fato i gnochi" el ghe dise. Quante sganassade a l'ombrìa de l'antica costrussion romana, davanti al muniçipio da le colone lissie e da la longa scalinada de piera. Par fortuna che poco distante, nei giardini gh'era 'na fontana, par lavarse mane e giaca oltre a de le bele panche curve, scomode, da farte végner mal de schéna. Dopo essarse sentà e strucadi come i fusse una cosa sola, s'à tacà i lampioni trasformando la Bra in un sogno. I oci de Sergio i butava fora làgreme che sembrava (paréa) perle de rosada, comosso da quel momento che no'l voléa no finisse mai. La Gran Guardia, lustrà, bèla massissa la dava un senso de protession e Silvia slongandose, g'à dà un baso mentre el sarfòio e le rame de pino strinà i vegnéa mossi da 'na bava de vento, sempre presente in quei primi giorni de primavera. Tuto paréa 'nar ben e la storia la séitava el so bel percorso.....

rosada:rugiada; sarfòio:trifoglio; strinà:bruciato; ombrìa:ombra; schéna:schiena; séitava:continuava;

5° capitolo / sensassión - Quél giorno, Silvia la voléa far un giro lóngo la pista ciclabile del Ménso, ma le previsioni del tempo in tilivisiòn le diséa fredo e aqua. Sergio, butél de bele speranse, da generassioni citadìn, g'à dimandà a la so dolsa metà dopo una serie de telefonade, de 'nar a pié par le vie del çentro storico de Verona par finìr in belessa al cine. Purtropo propio in chela dominica gh'era el bloco del trafico e quindi végner da San Gioàni l'era praticamente impossibile se no entro le do e mèsa del pomerigio. Cossita l'è stà, éla co' la pulsìn mobile l'è passà a tor su Sergio davanti a casa. Dopo aver girà come moscoli i à catà da parchegiàr la machina in Piassàl Cadorna a du passi dal Ponte de la Vitoria, famoso ponte coi cavài de bronso. A tal proposito me ricordo una storia che i m'à contà; un tempo i veronesi i voléa metarghe le mudande ai cavai per scòndar el "patrimonio", do bale che le paréa chéle del boowling e 'l batocolo usà da le campane de la tor dei Lamberti. A pié par Verona, man su la spala de éla, man sul fianco de lu, contandose de sogni, de laoro, ogni tanto un baso, ogni tanto un strucòn. Altro che piova, el sol l'era de un bel rosso cargo e le nùgole le se sfumava dal bianco al rosa, un çiél sfumà de gialo el creava 'na bela sensassion, 'na maravéia; ne la vita no te riessi a capìr come la natura la possa creàr una cosa cossita bela. Silvia, lassa de colpo la man del Sergio e sbassando de colpo la testa, la scominçia a mastegàr tra i denti dei discorsi sensa senso, subito, ma che col tempo i s'à trasformà ne la capitolassion del nostro amigo. "Vedito, g'ò paura de far star mal la zénte che g'ò arènte e no so par qual motivo, me sento drento 'sta bruta sensassion". Sergio el resta lì, inbacucà, çercando de vardarla nei oci sconti dai biondi cavéi de seda, mentre ne la so testa i mile pensieri i se intorcolava lisiéri.....

butél:ragazzo; cavai:cavalli; pulsìn:pulcino; cargo:carico; maravéia:meraviglia; moscoli:trottole; strucòn:grossa stretta; cavéi:capelli; inbacucà:stordito; intorcolova:attorcigliati; lisiéri: leggeri;

6° capitolo / el nemigo - Quél giorno la dovéa 'nar in Crucarìa par làoro, mentre el poro Sergio l'era a casa, in leto, par un forte mal de gola, co 'na vosse profonda, quasi el vegnesse da l'aldilà. El giorno prima no l'era vestì pesante; par farse 'edàr figo, l'òmo, a 'olte el se comporta nei modi più strani, come quando el paón par conquistàr la futura compagna el fa la "rua". In camisa con diese gradi, in Piassa Bra. "Pronto Sergio ò pena finì el convegno, 'desso passo a saludàr un vécio amigo". Dovì savér che de solito i veri amissi te pol contarli sui diéi de 'na man, mentre par Silvia, anca ci te frequenti ogni tanto l'è al stesso livél, compreso el vécio moroso Alessio da Riva del Garda. Anca mi son dacordo co' Sergio e no par solidarietà maschìl. Infati el problema de la tragedia finàl, l'è stà la presensa de 'sto amigo, durà par ci come mi no podéa saverlo, tuta 'sta fola. Sergio el perde la passiensa, anca parché no'l podea no dir gnente, l'era pur sempre un rivale, saltà fora de punto in bianco o almanco cossita el credéa. Éla da 'na parte se sentìa contenta de la fiducia ma da l'altra scominçiava a sentìr el fogo de la passion de un tempo. Tornà a casa dopo averlo incontrà a l'altessa de Mori, la va in bagno coi mile pensieri e soratuto col panéto incastrà, quél bel onto de l'autogrill, tra el stòmego e la pansa. E su e zò, zò e su, come un equilibrista quando el fa un passetìn a la 'olta sora 'na soga sospesa a vinti metri d'altessa, el panéto con una propulsion degna de uno shuttle el vién sparà fora come la dona canòn, drento al cesso. E dopo aver tirà un zigo de dolòr, el pianto ghe spampana el colòr nero del contorno oci su la facia. No la savéa più 'sa far, se quél sentimento co' Sergio l'era vero o se quela vécia amicissia la stava tornando ne la gloria de un tempo.....

camisa:camicia; rua:ruota; zigo:urlo; panéto: panino; spampana: si sparpaglia;

7° capitolo / la reassión - Quél giorno i se incontra in çità parlando de la nóva situassion, éla co' la paura de sentir el Sergio infufà come 'na bestia, davanti a un bon tè a le sinque de sera. Le facie tirade, la prima discussion dopo un mese de passiòn. I oci i se incrosava, la tensiòn l'era alta, come in una sfida tra cai boi (cowboy). Nissuno dei du voléa parlàr, nissuno dei du savéa 'sa dir. In mèso tra le sganassade, la passiòn e 'l divertimento s'era infilà 'na spina o come diséa Sergio nei confronti de Alessio, el déo nel cul. Una strana sensassión par do persone che g'avéa le stesse passioni, i stessi gusti, che staséa ben insieme. La fortuna l'avéa basà i do morosi, ma solo che Silvia no l'avéa capì che el so vécio amor Alessio conossù a l'università l'era solo 'na parentesi de la so vita. La paura de far stàr mal le persone che g'avéa arènte, l'era dovù solo al fantasma de la vécia amicissia, che ghe girava par la testa. Cossita éla s'à fato avanti, col classico discorso sul tempo e sul trafico par finìr col tentativo "oscuro" de capìr el parché de la reassión del Sergio. Lu vardando nel punto più lontàn nel çiél, quasi a volér evitàr la questiòn deventà de colpo dolorosa, el mormora le classiche parole de circostansa dimostrando la superiorità maschìl. "Me fido de Ti". In efeti in çerte situassioni l'è inutile far discorsi in più, speçialmente su de le questioni che no dovarìa nàssar, zà masenà più 'olte a l'inissio de un raporto soratuto tra persone adulte. La giornada paréa no finìr mai, el sol l'era alto, tuto el casìn de auto, de le sirene de le ambulanse e i ciassi de la zente in Piassa Erbe, l'era sospeso intorno ai do morosi come se i fusse drento a 'na bala de vero. De boto éla, la mola un soriso mentre i oci i slusegava, tirando un bel sospiro, uno dei tanti in quei giorni. Una risposta come quela de Sergio l'è la classica che una persona no se speta, che fa sentìr ci l'è in una posissión de colpevolessa ancor più 'na merda. Co' 'n baso lóngo tri minuti entrà nei guiness dei primati de l'apnea, i do morosi i finisse la serada man ne la man, nel silensio de la note.....

incrosava:incrociava; déo:dito; nàssar:nascere;

8° capitolo / la missionaria - Quél giorno vista la lessiòn o mèio la bastonà de classe del Sergio, la nostra Silvia scominçia a tajàr i ponti o quasi coi véci amori, compreso le rélassioni durà un poco de tempo e le classiche piaserìe de un atimo. Tra queste l'amigo del nostro eroe, Mario, coriere postàl, lassà da la mojér in cinta de un altro, dopo quindese giorni de matrimonio; mèso pelà, simpatico, l'è stà el vero motivo par el qual Silvia chéla 'olta l'era andà a la sagra 'ndóe l'avéa conossù Sergio. Vista la trista esperiensa, l'autista, no'l g'avéa la voja, de scominçiàr una rélassion seria e più éla la ghe telefonava e più lu el le toléa par el cul. Infati el ghe fissava de le çene o incontri, che i vegnéa scancéladi a l'ultimo secondo e no sempre el ghe rispondea a le telefonade. Cossita ne la so nóva missiòn, Silvia riesse a incontràr Mario par dirghe 'na 'olta par tute che l'era interessà solo a un raporto de amicissia, come se lu ghe ne fusse importà calcossa. Tuti i amissi de la nostra amiga i savéa de 'sta storia e nissuni ghe diséa gnente, compreso Baghera, un omòn de sento e passa chili, o méjo un orso con do spale come un armadio a quatro ante, vécia conossensa anca de Sergio che l'avéa conossù Silvia in una vacansa in Spagna. Cossita altro giro par métar in ciaro el raporto amicisia-amoroso. Baghera coi so quarant'ani, col fisico scolpì nel budìn, par tuta la durata del raporto dei nostri du morosi el s'era messo in mèso, tanto che Sergio el più de le 'olte el g'avéa racomandà de farse i cassi soi. Anca lu el g'avéa tra i amissi Simone da Parona, el "paròn" de l'olìo piantà nel giardìn de Silvia. Altro omo de quarant'ani, che savéa tuto e no'l diséa gnente; visto el raporto de intimità co' la fameja, l'avea capì che a la nostra "Giulieta" ghe piaséa el vécio amor e no se l'era desmentegà, compresa la storia de l'autista e de altre de poca importansa. Amigo anca del nostro "Romeo", el podéa in qualsiasi momento conquistarla come confidà a Baghera, ma gh'era calcossa in éla che no riussiva a capìr e soratuto che el le metéa in una situassion de minoransa mentàl. La missionaria scominçia a "tajàr e a cusìr", presentando Sergio a amissi e parenti come el vero e unico amòr de la so vita mentre ne l'ombrìa Alessio da Riva el gira sempre più nei sogni de Silvia.....

mojér:moglie; tajàr e cusìr:tagliare e cucire; ombrìa:ombra;

9° capitolo / le scarpe rosse - Quél giorno, la piova la ciocava sora l'ombréla e no i savéa più 'ndóe nar con un tempo cossita. No ghe restava che far un bel giro tra le varie boteghe, par çercàr un bel par de scarpe rosse, no col taco massa alto visto che'l s'era spacà nel porfido de Corso Porta Borsari la stimana prima. Dopo un ora a pié par le vie storiche de Verona, i scominçia a èssar strachi, aqua da partuto, a sècie roérse dal siél e pocie par tera grande come el Lago de Garda. A tal proposito al Sergio, fora come un balcòn, ghe vién in mente de cantàr soto la piova la classica cansón veronese "Se'l lago fusse de pòcio e 'l Baldo de polenta.....". Rivà verso la fin de Via Noa, vegnendo da Piassa Bra, i s'à infilà soto al pòrtego del Gheto Ebraico. Lì almanco no piovéa e tuto somà no l'è stà 'na catìa idea par i du morosi tornà dopo alti e bassi ai tempi d'oro. La cosa strana, in aprìl, l'era èdar el portego slusegàr con le lampadine intorcolade de Nadàl. El momento l'era magico, de note, con Sergio postà a la colona e Silvia tacà a lu in un silénsio che te faséa respiràr la fola. Basi e dei forti struconi, come a scancelàr chéla stimana de parole mal dite. I oci i se incrosava, na màn sui cavéi de seda de Giulieta e un ultimo baso prima de ciapàr la strada verso casa. Finisse anca 'sta giornada, piena de sentimenti, carga de amòr, co' 'na béla sganassada de Silvia, dopo la frase del nostro Romeo che restàra ne la storia: "ma con tute 'ste lampadine l'è Nadàl o forse semo nel Pesach la Pasqua Ebraica?".......

strachi:stanchi; sécie:secchie; roérse:rovesce; siél:cielo; pòcio:sugo; pòrtego:portico,loggia; Gheto:Ghetto Ebraico vicino a Via Mazzini (Via Noa); slusegàr:luccicare; chéla: quella; ciocava:batteva, picchiava;

10° capitolo / tira e mola - Quél giorno, el sol l'era alto, i primi fiori i se verzéa e l'erba béla tendarina verda come in Irlanda, la colorava la campagna de San Gioàni. Sergio dopo aver netà ben la so vespa, quasi a festa, ghe mancava solo 'na càpola de gala, el core verso la so morosa, come se'l g'avesse un par de ale al posto de le rue, contento, par la sera prima 'ndóe tuto paréa èssar tornà a la normalità. Si, giusto, paréa. Silvia la pianséa parché la stava par comunicarghe la fine de la storia. Rivà in contrà dopo avér alsà el polvaròn par tuto el paese, el vede la so amà sul portòn de casa, con 'na facia nera come el carbòn, quasi l'avesse perso un parente. El mola la "special" par tera, sensa metarghe la cavaléta e andando verso de éla el scominçia a capìr che ormai l'era rivà al capolinea. El fantasma de Alessio l'era sempre più vivo, ma dopo un ora de ciàcole, discussioni e de progeti, sentà soto al famoso pòrtego arènte a l'olìo, i du morosi i era da nóvo una cosa sola. Sto tira e mola stava desfando moralmente el poro Sergio, che de passiensa ormai no'l ghe n'avéa più. Come darghe torto? Prima de tacàr la vespa e de tornàr verso casa el se ricorda che l'avéa crompà 'na rosa rossa par la so Giulieta, smigassà in tera, ne la corsa de la matina a l'altessa de Castélnóvo. Forsi l'era un segno del destìn................

tendarina:tenera; netà:pulito; ciàcole:chiacchiere; pianséa: piangeva; crompà:comprato; smigassà:spiaccicato a terra;

11° capitolo / el trén - Quél giorno piovéa a sécie roèrse, gh'era anca mi, avéa portà Sergio in stassìon, visto che la so moto la dovéa far el "bolìn blu" dal mecanico. El voléa incontràr a tuti i costi, la Silvia, prima de partir par 'na vacansa. Fatalità tuti e du, prima de conossarse, i avéa prenotà le ferie propio a cavàl del 25 de aprìl uno a Londra e l'altra in Birmania. Cossita el monta sul treno par Peschiera, noto paese lacustre 'ndóe a spetarlo gh'era éla. Tute le 'olte che Sergio l'avéa ciapà el tréno, no gh'era mai sucesso che se spacasse a la partensa el locomotòr; fermo par quaranta minuti a Porta nóva e cambio del treno. Quando el destìn l'è segnà, e la fortuna la te fa torto, l'è mèio star a casa. Bastieme al siél, mentre i mile pensieri de Sergio i era rivolti a la Silvia ferma impalà a spetarlo e ai mile discorsi su la machina tirà fora vinti giorni prima da la "suocera". Tuto ben a la fin, solo un ora de ritardo, un baso de quéi grossi, do parole su 'na vacansa a fine màjo in Liguria e via col trén de ritorno verso Verona. La volontà del Sergio l'era tanta, l'à volù dar 'na scarpà al destìn che ghe stava girando le spale; 'na forsa de volontà indescrivibile, tanto che quando ò leto el so diario e ben savendo la fine, m'è vegnù la pèl d'oca. L'avéa provà de tuto, ma l'ombrìa de Alessio l'era lì e se ghe pensemo ben, a 'sto personagio no ghe ne fregava un casso de Silvia, anca parché quando te ghe tién a 'na persona te pol comportante ben o mal come el Sergio. A proposito de la vacansa, ne le Sinque Tere, l'era stà consilià propio dal pare ofelìn, visto che, durante el so viajo de nosse trent'ani prima, el s'era godù con so moiér. Anca questa podéa èssar un esperiensa positiva da unìr sempre più i du morosi. Purtropo ne la testa de Silvia gh'era 'na sorta de amòr lisiéro, dolso, che séitava a giràr e giràr come un moscòn sora al sùcaro; un amòr come quéi che te provi quando te gh'è quindes'ani, nei confronti de Alessio. Tante 'olte ne la vita te pensi de far le siélte giuste, ma invesse pol capitarTe che la fortuna la passa soto ai to oci e no te riessi a brincàrla al volo. E la so fortuna l'era Sergio......

sùcaro:zucchero; brincàrla:agguantarla; pare:padre; siélte:scelte;

12° capitolo / el ritorno - Quél giorno i s'à incontrà dopo un bel periodo, 'ndóe a parte el divertimento, i g'avù el tempo par farse un esame de cossiensa; éla invesse de presentarse con un bel soriso, la séitava a piànsar, tirando fora le scuse più assurde compresa quéla che no ghe le faséa più a star con Sergio. Stavolta l'era rivà al capolinea la fola. La vacansa in Birmania l'avéa aiutà Silvia a ciapàr una decisiòn veramente trista, lassando el so nóvo amòr par uno che in verità l'era solo ne la so testa. El nostro eroe el mantién la calma çercàndo de capìr lo stato de confusión de la so bela. Passa un ora, do ore, tri, quatro. Silvia sempre più nel casìn mentàl e Sergio nel tentativo de risolvàr el cubo de rubik. Sistema che a la fin de la serada l'à portà a un risultato positivo. Vegnéa fissado in qualche maniera el futuro. De boto, i scominçia a sganassàr, come se tuto se fusse risolto, come se chéla tompesta 'pena passà, fusse una de le tante prove che la vita g'avéa messo davanti. La note vissina, la luna e le stéle da l'alto vardava i du morosi, dandoghe una speransa in più par el giorno dopo......

fola:favola; chèla:quella; vegnéa:veniva; fusse:fosse;

13° capitolo / l'incontro - Quél giorno, la sfortuna l'à volù che al primo de màjo i mèsi de trasporto publici no i va o quasi. Cossita Sergio soto un sol che'l ciocava ben, l'èra andà a pié da casa sua fin a la stassiòn de Porta Nóva, par un totàl de quatro chilometri in vintiçinque minuti. Dopo avér ciapà el trén e smontà a Peschiera l'è stà la 'olta del cambio de maia, negà missa dal sudòr dopo la "gara podistica". I pié i fumava e le vissighe sui calcagni i era grosse come nóse. Rivà Silvia su la "Pulsìn Mobile", i du morosi i ciapa la strada fin 'ndóe scominçia la pista ciclabile e da lì, longo el Menso, a pié fin a Borgheto. Dodese chilometri a l'andata e dodese chilometri al ritorno co' i pié del poro Sergio messi sempre pèso. Tuto paréa  èssar tornà come prima, i ridéa e i schersava come un tempo, col nostro amigo che'l tentava in tute i modi de fotografàrla. El Ménso, el faséa compagnia ne la so corsa ai du morosi mentre la giornada piàn piàn la séitàva el so passo, prima de finìr con l'incontro seràl de San Gioàni. Sergio el se ferma a çéna, una cosa in faméja, con i soi de la Silvia, el pare Ofelìn e la mama brava dona de casa. La tensión se tajàva col cortél, nissuni savéa 'sa dir mentre la butéla l'era andà a farse un bagno che no finìa più, prima de magnàr. El nostro eroe al primo incontro ufissiàl, el se l'era cavà ben, la fortuna sembrava (paréa) giràr a so favòr, quando con un colpo d'ocio l'avéa visto la colession de francoboi de l' Ofelìn. Cossita da colessionisti s'à intaolà 'na bela discussion durà bona parte de la sera, anca drio magnàr e la cosa faséa piasér a tuti. Dopo avér parlà del più e del manco, i du morosi i ciapa la strada verso Verona con mata alegria...

andà pié:andare a piedi; negà missa:bagnata fradicia; vissighe:vesciche; nóse:noci; poro:povero; savéa:sapeva; butéla:ragazza; ufissiàl:ufficiale;

14° capitolo / in compagnia - Quél giorno, come promesso un mese prima, el bon Sergio el ghe fa da navigatòr a la Silvia, in compagnia, nel longo viàio fin a Bolzàn da una so amiga. In machina no l'era de tante parole e la tensiòn e i mile pensieri girava ancora ne la testa de éla. Peri, Ala, Trento. Sergio el vede che la butéla l'è sempre più scura in facia e scominçia a farghe 'na serie de dimande che le vién saltade con la classiche risposte de circostansa sul trafico e la concentrassion che bisòn 'verghe durante la guida. Rivà a Bolzàn, Silvia la paréa  èssar de casa, nata lì, visto el colòr biondo dei cavéi come quéi de ci vive in Crucarìa. Dopo avér incontrà la so amiga, ghe spetava un longo ritorno verso casa o mèjo a l'ultima çena, con Baghera, Mario corièr, Simòn da Parona e tanti altri. Sergio l'era in tiro, giaca, cravata, cavéi lecadi mentre éla uno splendòr, còtola a la moda, cavéi longhi su le spale e quél bel par de scarpe rosse col taco çinque, crompà al marcà de Monzanbàn con so mama, la dominica prima. I paréa 'na copia feliçe, eleganti, propio bei da 'edar insieme, gh'era anca mi quéla sera. Nissuni podéa pensàr cosa sarìa sucesso tri giorni dopo. Finì la giornada bela longa, Silvia compagna Sergio a casa, fin al famoso distributor de bensina, disendo qualche parola tra i denti, passando par el viàl de platanari. El nostro amigo comosso prima de saludarla el s'a girà verso de èla, ciapàndoghe le mane e con la vosse emossionà g'à dito: "te si bela". Ormai l'era matina un altra 'olta, a distansa de poche ore, l'ultimo capitolo de la tragedia.......

viàio:viaggio; còtola:gonnella, sottana; ciapàndoghe:prendendole;

15° Capitolo - ultimo giorno. Quél giorno gh'era più de vinti gradi, 'na bela giornada, el sol spacava le pière, éla nel giardìn de casa a ciapàr el sol arènte al famoso olìo, con un bel costume rosso. Sergio no sentendo Silvia, ciapa la so moto e via fin a San Gioàni, fermado a Castelnóvo del Garda da la polissia par avér superà el limite de veloçità. Multa e punti in manco su la patente. Dopo avér ciacolà un poco soto al pòrtego, i fa du passi par el paese man ne la man, un baso ogni tanto, come tuto fusse normàl. Quando i s'era conossù, la fortuna sembrava (paréa) èssar girà da la parte dei du butéi, Sergio el me le diséa sempre 'sto discorso e anca tra de lori l'era una frase che vegnéa dita de spesso, lu che ne la vita l'avéa sempre lotà, tribulà; nissuni g'avéa regalà gnente, guadagnandose tuto con sudòr e fadìga. Quando te rivi a 'na çerta età i te dimanda se te si drio a çercàr la compagna su misura, fata a posta par Ti...de solito i Te dise de andàr a Sant'Ambrosio località marmista veronese. Sentà sul divàn de pèl nera, in sala, la dominica finisse in serenità e alegria. Sergio torna a casa con' la so vespa, sporcà da 'na bela pocia de fango e giara a San Giorgio, con in testa mile pensieri e mile speranse e soratuto col classico soriso de ci l'era feliçe.... 

pière:pietre; pèl:pelle; giàra:ghiaia; 

Finàl - Quél giorno, Sergio ghe telefona a Silvia e ciacolando ghe vién comunicà, che la fola l'era finì, el nostro amigo vién scargà sensa una vera motivassion, a parte le solite scuse che se dise da quando l'omo e la dona i gà fato comparsa su la tera. De Silvia savémo solo che la speta inutilmente che'l so Alessio el vaga da éla, mentre del poro Sergio, dopo avér lassà el laòro e smagrà de oto chili in pochi mesi, no gh'émo più notissie. Par lu, chéla dona l'era molto de più de un amiga, g'avéa dà tuto el so cor e soratuto tanta fiducia. Silvia no l'è riussì a dirghe in facia che ghe piaséa ancora el so vècio amòr e questo ghe faséa mal. Me ricordo che'l nostro amigo, el voléa savér la vera motivassion del triste finàl da éla, a quatro oci, rivà dopo vinti giorni, par caso; l'è stà informà da un amigo fidà de tuti e du, che Baghera, Mario e compagnia i era drìo a far 'na caminà su le Toreséle insieme a Silvia e Alessio da Riva del Garda. La "fatalità" l'a volù che Sergio l'era poco distante a magnàr in un ostària con mi e cossita propio in quél giorno el g'avù la risposta a la so pena d'amòr. Tuti i savéa e nissuni diséa gnente. Dal Mario emo savù che Alessio chéla sera el g'avea confidà che el stàva tolendo par el cul Silvia, el va a catàrla ogni tanto solo parché ghe stàva rompendo i maroni a forsa de telefonade e cartoline oltre che par "gòdarse". De Silvia, el Sergio g'avéa conservà nel tacuìn 'na foto scatà a Valéso e un pochi de altri ricordi a parte el fiòr de pessa, che éla la tién ancora in machina sul sedìl de drìo. Par el nostro amigo avér perso Silvia l'è stà come se una persona cara fusse morta e drénto de lu, l'è morta una parte del so cor. Ciao Sergio. FINE 

smagrà:dimagrito; savémo:sappiamo; tacuìn: portafoglio; Toreséle: Torricelle; gòdarse:divertirsi

Andrea Toffaletti

POESIE IN VIDEO <