LA RENA DOMILA - DAL 1999 EL SITO VERONESE DEI VERONESI IN VERONESE

1.
Dona Ciareta, la g'avea un sio prete,
che la tegneva come una so fiola
drento na gran canonica de chiete,
lontan dal Munissipio e da la scola...

No se sentiva mai far na parola,
mai un petegolesso de donete,
ma solo qualche : Ooh... Ooh... ! de «nina, nana»
e el sigolar de i seci a la fontana !

2.
Ne la cusina ben sfogà de rame,
el menarosto tegnea testa al forno ;
dal baldachin fornido de salame
piovea abondansa più che el sol de giorno;

e bastava guardarse ben d'atorno
e più che el passo sprofondar l'esame,
che in fondo de 'na scala a bogonela
gh'era la vena del Val Polesela.

3.
Parchè, a Don Cicio ghe piasea el vin moro
e i caponi col fondo de risoto,
e forsi in sto momento che discoro
l'è la in contemplassion del so vesoto,

e quando el ghi 'n'aveva bevù un goto
e l'era tondo come un pomidoro,
fora carta e nodar col testamento,
« che nissuni a sto mondo è mai contento! »

4.
Dona Ciareta, in parte, a prima vista,
co le manine a spasso atorno un fior,
la ricamava un telo de batista,
par la tovaia de l'altar magior...

E mi che arente me baiava el cor
soto la pele del seminarista,
co le mane in scarsela e el beco verto
me insognava de basi a Sant' Alberto !...

5.
No, se me spiego, a Sant'Alberto in quanto
che el vendesse i miracoli in cardensa,
ma a quel facin che me piaseva tanto,
quà de malissia e là de penitensa,

che se gh'era un rimorso de cossiensa,
par la paura de far torto al Santo,
no morsegar — disea — cossiensa trista,
se no diman te porto dal dentista !

6.
Ma la gente dirà: bruto birbante,
gnanca vargogna... In casa de un sio prete!?
(almanco el fusse un prete protestante)...
E el rispeto de Dio, dove el lo mete?

E quel vin... Quei caponi... Quela chiete,
che la parea el so unico tirante...!?
E Gesù, San Giusepe... e la Madona?
Quanti pecati che fa far 'na dona!

7.
Eco, intanto dirò : me racomando,
no tentemo a l'onor de Dona Giara;
altro l'è ragionar de contrabando,
altro de roba che poi costar cara...

No gh'è cosa che vai sensa la tara,
no gh'è obediensa se no gh'è comando...
Çerto che in casa sarìa sta un gran torto ;
ma mi, i me basi ghe li dava in l'orto !

8.
L'era l'orto un giardin del seteçento
tegnudo a brolo par economia;
le statue in tochi le fasea spavento
e ne l'istesso tempo compagnia;

e quando li tacà l'ave maria,
la luna se meteva in movimento,
co l'ombrelin de foia, anca le suche
le caminava in çercoli e in paruche.

9.
Taco al muro del brol, gh'era un sirèso
che el predicava su la strada granda
a quei da i monti che 'egnea zò a spasseso.
Par oseleti l'era un'oselanda,

e par sirèse gnanca s'el domanda,
che le più rame no tegneva el peso...
Quante testine rosse e che fameia,
l'era el sireso de la maraveia !

10.
Se vegnea 'n' automobile, che ciasso !
« Ciù » stranudava tute le testine,
se passava un porcheto: Oh Dio che grasso!
Se scadeva la sagra: Adio biondine,

come sì dolse e tendre e molesine,
quando sarave che 'n' aremo a spasso?
Se passava 'na sposa : Atenti al fosso !
Le testine rideva a più non posso !

11.
L'era nata da qua la indovinela,
che à fato el giro de l'età beata:
quei çinquessento cavalieri in sela,
co i brassi verdi e testa « insanguinata »

che quando i combateva a spada trata
drento un stòmego forte de putèla,
ghe voleva el dotor del so paese,
par la batalia abùa co le sirese !

12.
Vien, che Dona Ciàreta, un bon momento,
la me trovasse in quel a positura
de comandarghe a tuti i çinquessento,
a cavai de la rama più sicura;

che sì ben anca la cavalcadura,
l'era sensa le stafe e el fornimento,
pur me sentiva forsa e fantasia
de trotarghe al so verso in poesia.

13.
« Co sti guarieri e in tempo de vilota,
Dona Ciareta, ve farò 'na canta;
che se la mula la n'araà via sota
el sirà qualche strio che me la incanta ;

ma mi la spiansarò co l'aqua santa
par farla caminar drita e divota,
sì che sentendo el son de la me vosse
quasi ghe para de incontrarse a nosse...

14.
Con do sirese rusteghe e zermane,
che j-è sangue real de primavera,
co ste do perle, bianco e rosse e sane,
eco recini da far pleco in fiera...

E pò ghe zontarò a la me maniera
st' altra colana de marostegane,
che destese de onda sul sen nudo
no le soni un pecato... ma un saludo ! »

15.
« Grassie el me bel Signor » — la m'à risposto
Dona Ciareta co le fìame al viso —
Che dal vostro castel, dal vostro posto
cantè come 'n'osel del paradiso;

sì propio svelto e zòvene e preciso,
e cavalchè nel modo più composto,
che mai s'à visto un omo su la rama
cosìta cavalier co la so dama ! »

16.
« Za che m'à parso che ve sipia caro
questo mio debolissimo regal,
lasse che almanco ve ne taca un paro
I soto quele reciete de coral...

Eco, adesso desmonto da cavai,
pianto el comando in testa al siresaro
e ve baso la boca de veludo
che no 'l soni un pecato ma... un saludo!»

17.
« Ste zoie strambe in tempo de sirese,
che le par fate de grandesse sconte,
IO se le trova gnanca al me paese
che de si rese de faremo un monte...

Sì cavalier, ma mi ve fasso conte
e zà che no g'avì tante pretese,
SCO vostra la boca de veludo,
che no 'l soni un pecato ma... un saludo!

18.
Quà se ferma la nobile aventura,
qua i me doni de gran capitalista...
Eia, un bel giorno, l'è andà via in vetura
e da quel giorno no se l'à più vista...

Mi guardo el so lavoro de batista,
e ghe vedo adombrada una figura,
che ricama i miracoli e le imprese
de quando comandava a le sirese !

19.
Don Ciclo el dorme e el me fa su un concerto
che el par l'organo in ora de funsione...
Oh, che bruto paese Sant'Alberto
da dopo ch'è scapa le tentassione !...

Mi no me piase più le faraone,
el menarosto (fermo) el forno (verto)
el sireso, el putin, la « nina nana »
el sigolar de i seci a la fontana!



a cura de www.larenadomila.it

I.
Fuma in aria el camin novo
gialo e rosso de quarei,
e 'l bel sangue dei garofoli
sgossa zò da i pontesei...

I oseleti sconde l'ovo
for da le ongie de i putei,
e un esercito de rondene,
torna a mare ai so castei...

Primavera, tuto questo,
j è primissie del to çesto... ! 

II.
Varda in giel che bei colori
e par tera, che tapeti !
gira quelo dai « Bei fiori ! »
e la barca coi sorbeti ;

drento ai fònteghi, ne i vicoli,
cani e gati se inamora
e de Nine i più bei bòcoli,
j è li lì par saltar fora...

Primavera, sta gran festa
l'è un bacan de la to testa... ! 

III.
Ma co l'ispido de i ani
vien più tardi primavera,
e i più stupidi malani
fa de i sbreghi a la bandiera;

e se canta a denti streti
le cansone de l'amor,
che la sorte dei poeti,
g'à bisogno de dotor...

Primavera, dame un goto,
del me solito decoto... ! 

IV.
Madama Primavera,
seria fra le più bele,
predica grassia ai fiori
e stissa su le stèle

de quel camin la in sù!

Ma nel cor de la sera,
la istiga i primi ardori
col magico: Fu, fu...!

Che l'è la zoventù,
calda de umori... 

V.
Ne i so diversi giri
(sconta de drio le sese)
la regola i rigiri
de le galante imprese,

che sfoga co i sospiri
l' ansia del coresin...

J è Nina, Viola e Rosi
(segreti del paese)
che in brasso a i so morosi
le casca pian pianin,

bele longo destese
come sul so letin... 

VI.
Da un campanil che ingana
l'orario de la ciesa,
'na birba de campana
la bate de sorpresa

un fioreto zentil...

Sì che a l' aria m'à parso
de sentirghe un messagio
a le Marie del Magio,
a i ventesei de Marso,

al gaudio de l' Aprii ! 

VII.
Sento che la me anima
pena sfantà l'inverno,
l'è quela de un bon diavolo
che l'abia vinto un terno...

La testa fra le nuvole,
le man fonde in scarsèla,
el pensa a le mignognole
da tórghe a la so stela ;

no 'l vede altro che intingoli
fumar par le cusine,
e el passa qualche secolo,
davanti a le vetrine;

e se el va incontro a nosse
no ghe fa più dolor,
se ogni ano i mete in crosse
Gesù, nostro Signor! 

VIII.
Le casete manda al fosso
el tesoro de i so rami,
che i à visto i panorami
dal gran Monte de pietà;

e se vede veri verti
dove el sol capita a ore,
e se svela spassadore
su le scale e su l'intrà!

Fin del fogo la cadena
sì ben negra, in te un momento,
torna lustra a fil de argento
dopo un ora de barbier;

le finestre a dopie laste,
ghe dà aria a i so giacinti,
così bei che i par dipinti,
per la Pasqua del quartier ! 

IX.
Anima dunque olivi,
ossi da morto che sì sempre vivi !

Pasqua! Aleluja ! Festa!

La vergine impromessa,
core a scoltar la messa
col fior de nosse in testa;

el sial zò da 'na spala
ghe fa come da vela ;
la cotola de tela
sventola, fis-cia, baia

fin che la riva in porto...

Anima dunque, olivi, ossi da morto!

 X:
La candida cieseta,

drita sul col del monte,
g'à le campane pronte
e la meio pianeta ;

e i pigni negri in fondo,
che a i morti fa girlanda
risponde a ci domanda:
Viva el paron del mondo,

che r è rissussità !

E ride i mandolari,
e fa boche i morari
e se regola el tempo el russignol.

E i gobi e i soti e i storti de i olivi,
(ossi da morto che dà passe ai vivi)
leva le palme benedete al sol !

a cura de www.larenadomila.it

1.(Fontana del Fero)

I.
Nel cor de la contrada
divota a San Zuane,
le done su la porta
le fabrica le scatole...

Tra i fùmeghi del sòlfaro
e un spessegàr de mane,
sbalsa fora dai fònteghi
canti, ridade e batole...

fulminanti i va
ciocando par çità... !

II.
E fin che çerte case
arse de vecio fumo
le côa soto le gronde
el lustro padronal,

e in brasso a 'na Madona
che dise «me consumo!»
se smorsa le finesse
de San Zùane in val,

la tera de Verona
che dà i colori bei
spalanca le so vene
nel cor de la contrà

e i sassi de le mure
de i forti e de i castei
j-è tanti contastorie
de l'epoca passa... !

III.
Come se ariva al posto,
che l'aria ne saluda
fra un'alegria de càpari
da la passion nel fior,

intorno a la « Fontana
del Fero » gh'è una ruda
de inamoradi in bòssolo
che discore de amor,

e i se parla così :
« Amème mi — Amème mi ! »

IV.

O cara beatitudine
de sti smorosamenti,
che fila in brasso a i orti
quasi rasènto a i muri ;

« Din, den » le campanele
de dòdese conventi,
ne mele in boca un frigido
de fruti mal mauri ;

se specula traverso
le gabie de i telàrì,
le statue de le moneghe
da l'anima incantà,

te pensi a çerte barbe
negre de missionari,
che tien la testa bassa
dal rustego che i g'à !

V.

Più al largo, in fondo a un vicolo,
davanti a una cieseta,
gh'è ancora de le vecie
che fa saltar la roca;

le conta le rosarie
sentade in caregheta ;
el sol le mete in gringola,
la morte no le toca

e ne i segni le guarda
de la « Dona Lombarda »

VI.

L'è la ciesa de Nàzaret,
dove che San Gaetano
— come porta la lapide
s' à fato servir messa !

Adesso l'è del vescovo,
e da no so qual ano
i laorenti del vescovo,
la 'dòpara a barchessa,

con de i busi briganti
ne le coste de i santi...

VII.
E semo finalmente
drento un caste! antico, 
co l'édara e i sarpenti
da i ocieti de brasa...

Questo qua l' è el palasso
del re Teodorico :
Alboin e Rosmunda
g'à spadronado in casa,

e una note, de festa
j-à trincà in te 'na testa!

VIII.
O trista beatitudine
arsa de fumo vecio,
che côa cante e miracoli
de storia andà de mal,

e le rosarie magiche,
come a-alfiar su un specio,
le trà macie de sangue
sul verdo del cristal;

la gente de Verona,
ne i so momenti bei,
mola le corde al giubilo
che no conosse età,

e tra un osâr de popolo
e un fulmine de osei,
se infiama a son de musica
l'estro de la çità! 

DONA LOMBARDA
2.(La note de San Zuane)

 IX.

Co la morosa al fianco
più bassa de una spana,
e le tetine in gloria
drento un altar de seda,

'rivadi strachi morti
sul bel de la fontana,
eia gustava in estasi
quela delissia freda...

Va ben dar aqua a i fiori,
ma guarda, che te mori!

X.

Comode, al fresco, in ombra,
perse fra ciari e scuri,
sentaà tra banche e tavola
ciassa contrade intiere;

gira i bossoni lucidi,
castei de tochi duri,
pingola a i fili e sventola,
'na sagra de bandiere...

El son de la fontana
l'è bronso de campana!

XI.

Giusto arente al pissaroto
de quel'aqua ciacolona,
du foresti i fasea moto
d' èssar veci de Verona...

I parlava par le sconte
co una finta de morbin,
ma i g'avea segnado in fronte
la condana del destin :

— Amême mi, dona lombarda
Amême mi — amême mi!

— Oh, come mai volìo che fassa
che g'ò mari — che g'ò mari?

Sul davanti de la scena,
co i so cògoli e i so ani,
la scudela de l'Arena,
gloria e spasso dei Romani,

bate in alto la gran Ala 
su i palassi de la Brà
fin che i Cani da la Scala
sbaia drento a la çità... !

— Oh, dime un poco, dona lombarda,
vuto che el femo, che el femo morir?

— Oh, dime un poco, filio de un conte,
come faremo par farlo morir ?

XII.

Zò, a Verona gh'è i angeli,
che sventola i camini,
tra un fumo de polenta,
che saà da brustolin ;

sul muralion se impissa
'na corsa de lumini,
e l'Àdese se còcola
le pale de un molin...

E in quela, che le ròndene
le sfrisa i cornisoni,
e i colombi va in giostra
atorno al campanil,

l'Ave Maria, la scapa
da par tuti i cantoni,
e l'anima se cuna
come ingropada a un fil !

XIII.

— Oh, come mai volìo che fassa,
par farlo morir — par farlo morir ?

— Cori ne l' orto de la to mama,
che gh' è la testa de un sarpentin...

— Coro ne l'orto de la me mama,
che gh' è la testa de un sarpentin...

Da l'intrigo dei vicoli,
che apena te i conossi,
trombe, ocarine, strepiti
se move in comitiva...

'Na procession che dindola
de balonsini rossi,
salta, sparisse, gongola
come la fusse viva...

Che se alsa e se volta,
che se parla e se 'scolta...

XIV.

— Coro ne l'orto de la me mama,
che gh' è la testa de un sarpentin..

— In meso a i sassi lo pestaréto ?

— In meso a i sassi lo pestarò!

Dal fondo de la vale,
sconti, lontani e fini,
ma sempre più vissini
se sente vegnèr su,

prima sussuri e tremiti
de fior de mandolini,
dopo, chitare, armoniche
Madama Gioventù,

che se toca e se strense,
che se urta e se spense !

XV.

Ecoli ! — L' è un miracolo
che sbròca su de salto —
la fontana se insèngala
de un çercolo de fogo...

El Castel l'è de pegola,
l' Adese par de smalto ;
el cancan de le musiche
buta par aria el logo,

e in meso a un fumo gialo,
rompe de furia el balo...

XVI.

— Vegnarà a casa quel tuo marito
straco finito da la gran sé...

Sul colmo de la festa,
quando se fà più bela
la baraonda e rugola
qualche lanterna in tera;

su a San Piero, la tromba
che fa da sentinela,
dà el silensio a San Stefano 
e al ponte de la Piera
,
e i morosi se mola,
su i prà de la Bacòla !

XVII.

Fiole, de la rosaria,
che da quando sì nate,
col fero de le calse
e la corona in man,

g'avì imparaà a memoria,
g'avi ciucià col late,
sto stampo de regina,
mile ani lontan...

Spose, de la rosaria,
morose apena fate,
che la note de i sôni
de San Zuane in Val,

l'aqua de la fontana
ve fa deventar mate
e i basi de sta note
j-è quei che g' à più sal...

Puti, de la rosaria,
che quando no i ve vede,
ne la note de i bali
del nostro San Zùan,

savi ligàr col vostro
el cor de ci ve crede,
col zugo de le gambe,
col giro de le man...

Eco l'ora bastarda,
de la dona lombarda !

 3.(El castel)

 XVIII.

A cavai de do valete
solitarie e gentiline,
su le tragiche rovine
del castelo de Alboin ;

'torno a i grûmi de le èdare
e de teste serpentine,
eco quà trata dal diavolo
la gran rede del destin !

XIX.

— Cos'à sto vino, Dona Lombarda
che el me par torbido, che l'è cambia?

— Sarà sta i tòni de l'altra note,
sarà sta el vento che l'a intòrbià...

Sul taolon de la cusina,
bate el bianco de la luna;
se spalanca le portèle
de un imenso cantonal ;

e ne l'ultimo de i calti,
gh'è un putin, che da la cuna,
par la storia del vin torbido,
fa che scopia el temporal...

XX.

— No stèlo bevar, mio caro padre,
che l'è velen — che l'è velen...!

Dona Lombarda, livida,
davanti a sta sentensa,
la piomba ne le tenebre
de la più negra note...

El putin, par de drento
l'inciava la cardensa,
par la paura granda
de meritar le bote...

— Oh, lassè che ve guarda,
bona dona lombarda... !

XXI.

— Bevìlo vu, dona lombarda...!
— Bèvilo ti...
— Bèvilo ti...
— Oh, come mai volìo che fassa
caro mari — caro mari!?

Eco una scena tragica,
che buta in tochi el cor —
Guardè a che punto ariva
la furia de l'amor...

Quando la bissa beca
el so benefator,
bastònela, castìghela
Gesù, nostro Signor!

XXII.

— Oh, par la spada che porto al fianco
t'el bevarè — t'el bevarè...

— Oh, come mai volìo che fassa
che no g' ò sé — che no g'ò sé...

— Oh, par la spada che porto al fianco
te coparò — te coparò...

— Oh, par l'amore del re de Fransa
lo bevarò — lo bevarò...!

A caval de do valete,
pensierose e gentiline,
fra le tragiche festine
de le çene de Alboin,

sto bel pèsto de erbe magiche
e de teste serpentine,
bevi quà, Dona Lombarda
ne la crâpa del destin !

XXIII.

La prima gossa che l'à bevudo
« Dona Lombarda » cambia color;

a la seconda che l'à bevudo
« Dona Lombarda » ciama el dotor;

la tersa gossa che l'à bevudo,
i core in çerca del confessor ;

la quarta gossa che l'à bevudo
« Dona Lombarda » la va al creator!

XXIV.

— Ah, l'è dunque così, Dona Lombarda,
che ve credevi de salvarve vu?

Tanti secoli al mondo, che ve guarda...

(Voce lontana)
— L'è stado lu... L'è stado lu...!
— Èri bela, èri zòvene e busiarda,
e par questo el demonio el v'à vossù...

Ah l'è proprio così, Dona Lombarda!?

(Voce lontana )
— No 'l farò più... ! No 'l farò più... !
— Qua, ve acusa el putin da la so cuna,
quà, ve acusa el vin bianco torbolin,
e le ociade spione de la luna
e i sberlefi del muso de Alboin...

(Voce lontana)
— Alboin... Alboin... !

Eri de sangue barbaro e regina,
salda de forsa e piena de baldansa !
Çerti ve fa parlar da contadina,
çerti da « bela » del gran re de Fransa.

Ma che la sia de fina o trista grana,
la vostra pele resta tal e qual...
Par conto mio, sì sta la gran putana,
vegnuda al mondo sol par far del mal..

Dona Lombarda, risponde cosi :
Amème mi — Amème mi!

a cura de www.larenadomila.it

SOGNO DE L'AQUA GROSSA
(intermèso)

I.
El me Àdese, el capita a Verona,
par tòrse in brasso el fior de la çità,
e de note el la cuna, el canta e el sona
arie dei monti e salti in riva ai prà.

De inverno el core zò giusto de bona
col « fru fru » de la seda imboressà, 
e a metà Marso el supia, el se imusona
coi primi progni, che lo tien montà!

E l'è alora che « quei de Pescantina 
par un' asse i se nega » e sora Trento
i mete zò le sâtare e i camina

co i omeneti driti sul parecio
de le bòre incambrade lì al momento,
che sfida i ponti e ferma a Castelvecio.

II.
Ma verso Autuno, quando se maura
l' ùa « molinara » e la biancheta d'oro,
capita çerte piove che le dura
sensa dar tregua mai, sensa ristoro,

in fin a tanto che una note scura,
l'Àdese gialo el te deventa moro,
l'è più tera che aqua, el fa paura
co i filoni ingropadi e el fià da toro... !

I molinari de la « Campagnola » 
quei de Santa Anastasia, so « patrona
stissa le torse e tira le cadene;

e i molini se inarca su le schene,
col lanternin tacado a la Madona,
tuti un convulso e col formento in gola!

III.
Eco finestre a sbàtarse e tra i fumi
del sono roto dal presentimento,
par ogni buso o casa o apartamento
te comparisse e scomparisse i lumi !

Maria Santa ! — Tra un rosso de barlumi
da « Sotoriva » scapa un bastimento, 
l'infila el ponte el se ghe insuca drento,
el fa 'na scapriola e el va in frantumi !

Mama, che bota ! Pòro Ponte Novo, 
che te guardavi sempre le piture
del palasso Da Lisca coi putini... !

No se sa gnente adesso che l'è strovo,
ma cissà mai doman che batidure,
che te sì stà tradido da i molini !

IV.
Co i primi ciari lividi del giorno,
che se scominsia a vedarghe pianiti,
ci g'à l'aqua in botega o in magasin,
se dà le mane subito da torno.

La corente te mete el capo storno
co una furia de tanfo e de freschin ;
le galarie le boie dal tombin...
Ah Verona! El to omo el te fa un corno!

La cita de le càneve l'è piena,
picia i vesoti soto i fondamenti;
dai possi, el secio porta su aqua giala;

core i pompieri, in barca, co la scala,
dove l'aqua più tenta i tradimenti...
La gente guarda come ai salti in 'Rena !

V.
I Veronesi, alora teste esperte,
se la godea co l'aqua par le strade,
a l'ombra fresca de le ombrèle verte,
che pioveva, pioveva a mastelade...

Se le putèle se mostrava incerte
de traversarla a cotole levade,
le podea ben tentar, che j-era cuerte
se no altro le pùpole, de ociade !

Ma l'aqua cresse in modo che impressiona;
quei che guarda dai ponti i fìla via
fasendose un gran segno de la crosse,

e te vedi passar drento Verona,
co l'Adese che fa da ferovia
casse da morto e mobili de nosse !

VI.
Passa le asse de le segarìe,
che i tirolesi i tràfega in montagna,
le grepie intate de le boarie,
co i canoti, col fien, co l'erba spagna:

banchi de ciesa e intiere sagrestie,
trave da sàta e trave da filagna,
e su le trave de le brute strie,
che cavalca el disastro e fa cucagna!

Passa cuerti de paia e pavimenti,
le vache sgonfe, i porchi sbalotadi
e tuti quanti i sete sacramenti ;

tochi de ponti, molini desfadi,
e carosse e cavai coi fornimenti,
e gambe e brassi e teste de negadi!

VII.
Co s-ciaransane torbide de argento,
una capa de piombo se destende...
J-è le notissie perfide, tremende,
che l' « aqua grossa » porta zò da Trento!

E semo al colmo del combatimento,
che le rive tien duro e no se arende ;
gh' è mejara de anime che tende :
pali, cariole, sachi e tòrse a vento!

La çità sassinada a sangue vivo,
la pensa adesso a un muralion tardivo...
E da un argine a l'altro de le Basse,

par salvar le so bestie e le so strasse,
giuteme prima mi, che vôi giutarte,
i sogna un sbrego da quel' altra parte !

VIII.
Casca el ponte ! — Un gran urlo, una colona
alta come la Tor, de melma scura,
'na ventada, un fantasma de paura,
che te sconquassa, insemenisse, intrôna...

Gh'è ci se buta in brasso a la so dona,
ci trasporta le tende su le mura
che i crede la çità poco sicura,
che i pensa vaga zò mesa Verona !

Adio vecio ! Adio amigo, che te trovo
massacrà sul to leto e sensa prete...
Mi t'ò visto cascar bel ponte Novo!

E dai copi vedea, soto la piova,
una a la volta, chiete, chiete, chiete,
morir le case de la Binastrova !

IX.
Quando ste vede strine fin a l'osso
le pressipita in tochi a la rovina,
l'è come se spacasse un gran scartosso,
un emporio de roba casalina... !

L'è un salto, un cioco, una fumada, un posso
che se sprofonda, un sbrêgo de tendina,
che te spalanca quel che no conosso,
da le stanse da leto a la cusina !

E alora resta li tacadi via
Garibaldi e la Vergine Maria,
sul gialo e blù de la tapessària,

e el cuculo su e zò mena la coa,
come che el fusse ancora a casa soa,
e el segna l'ora de la Binastroa !...

a cura de www.larenadomila.it

I.
Eco giorni de gran caldo,
che le siore scapa ai bagni ;
quei dal giasso fa guadagni
e le angurie bate saldo...

Ouff ! Che stófego; i se senta,
fin a l'ombra de un capel,
e col sol che brusa in çiel,
va a remengo la polenta...

Voce dalla via:
— Aqua in gelo... Aqua !

Crepa i muri e su i portoni
scota el lustro de i otoni ;
j-è brasèri i marciapiè...

Sì che i omeni più fiachi,
g'à le ale in fondo ai tachì,
come i servi del cafè...

I signori, più sicuri,
tien tapà finestre e scuri
pisolando sul sofà...

Rusa ai veri dei saloni,
'na fanfara de mosconi,
nel silensio de l'istà...

VOCE:
— Aqua in gelo... Aqua!

II.
La Nineta, mesa mata,
coi brassini a raso l'osso,
da la se che l'à desfata
l'à sugado fin el posso...

Co un tapeto su le spale
e col slancio de un pompier,
la fa i salti par le scale
smanegando un gran bicier...

Voce:
Aqua in gelo... Aqua !

Aqua in gelo! Ma sta fiama,
che s-ciopeta drento al cor,
che me tira e che me clama
verso el santo tricolor,

no gh'è aqua, no gh'è giasso
che ghe smorsa via el calor...
Quà una s-ciabola, che masso,
che devento un gran valor...

Voce :
Aqua in gelo... Aqua !

Ma la Nina co i so basi
'n' altro fogo va a impissar :
— Resta in casa... Magna e tasi,
te sì vecio da copar...

Vien qua in brasso; no guardarme
che son bruta... ! No tentar...

(Boum...! Don, Don...! Eco l'alarme!)=
No lassarme... No çigar !

III.
Le comete in fondo al vicolo,
le fa un son che ne impressiona...
Semo in meso a un gran pericolo ;
l'è la fine de Verona...!

Ne le càneve segrete,
tuti in fasso a la imprevista...

(Boum...! Na bomba... Aiuto, el prete!)

— L'è andà zò dal farmacista!

— Manco mal, che in te sta tomba,
par de vìvar nel butier...

(Boum!... Madona! N' altra bomba...)

— L' è andà zò dal formaier... !

***

Passa un secolo de ani,
che se ciapa e reumi e tosse,
ma par aria gh'è i 'taliani,
che i fa un roon che se conosse..

Semo salvi... Fora, fora,
dal martirio — Oh Dio Signor,
quanto tempo e dopo ancora
duraràlo sto teror ! ?

Don, Don, Don, Don, Don...
Eco el Rengo traditor!

IV.
Gran miracoli se vede
da no dirli gnanca in ciesa;
l'è una forsa, una sorpresa
l'è un « Don Don » che se ghe crede.

No l'è el Rengo del Consilio,
che fa crèssar la polenta
ma una musica portenta,
che ne manda in visibilio...

Don... Don... Don...

Core gambe, sensa piombi ;
respiremo a du polmoni
e le ale dei colombi
se spresona da la Tor...

Soto el sol de i ombreloni
torna in moto la balansa,
e ci ha perso la baldansa
dà la spina al bonumor...

Don, Don, Don...

Viva el Rengo traditor!

La fontana de Verona,
pissa forte che la sona
come un globo de cristal...

E i tramvai, che la sa bela,
tira a man la campanela
che i par mati in carneval...

Zò dai pòrteghi del Gheto,
co le çeste e col careto,
torna i sèngali al marca...

Le barchete coi gelati,
le morose coi pecati,

l' aqua in gelo col mistrà !

a cura de www.larenadomila.it