Museo Barbarani - Poesie - 4 canzoniere
| // Podarìa interessarte |
| LÉNGUA + Museo Barbarani + La vita + I Libri + Articoli + Cartoline + Poesie sconossude + Poesie siélte + Dizionario + Menù Canzonieri + 1° Canzoniere + 2° Canzoniere + 3° Canzoniere + 4° Canzoniere + Giulieta e Romeo |
EL CRISTO SU LA SCALA (PRELUDIO)
Quei j è beati, quei che se i se mala
tra le angustie e l'amor de 'na fameia,
i g'à el Cristo sul pato de la scala,
che l'è lì, note e dì, sempre che el veia;
e de gnente el se dà de maraveia,
che la vita la cressa o che la cala:
nosse, batési, òbiti, festini,
pur che i mantegna l'oio a i so lumini!
Tri bei lumini tondi, lustri e sani,
degni d'essar portadi in procession,
che brusa la so chiete da cristiani
con dei sguissi da santa divossion
e i dise la premura e la passion
de quei, che dorme su ai diversi piani:
nore, madone, serve, còghe esperte,
facie da «me ne impipo» e brase cuerte.
Parlo de quele case vecie,
da i muri saldi e grisi in do' se impegna
stéme, làpide, scrite de ogni specie,
col pòsso in corte e col «msu e zò che vegna»
dei seci lustri, Dio che li mantegna,
che i ne porta fin l'aqua co le recie;
conto de quele case dai portoni,
dove gh'è su le Màscare e i Testoni!
El camaroto de la portinara,
l'è un Ufissio de posta, un...Ministero;
gh'è ci ghe trova la notissia cara
e ci una busta filetà de nero...
Chè, la vita l'è cuna e çimitero,
'na bocada de dolse, una de amara;
ci gode la salute e ci se mala,
soto a i oci del Cristo su la scala!
A l'Orsola, casante, in streto luto,
dai caneloti bianchi, fini, fini,
vedova de un Patrissio decaduto
dal più nobile piano, ai mesanini,
(ma ci pensa a la Sorte dei destini,
che j è le forse, che comanda a tuto...?)
promete el Cristo soridente in viso:
«Te farò portinara in paradiso!»
Serve e parone - Jè 'na lengua sola,
tuta 'na sporta, par la spesa in piassa...
(Ah, l'è un tormento, quelo de la tola,
se el paron l'è bisbetico de rassa...!)
I fioi de casa, discoli e «bardassa».
(Ah, l'è un problema quelo dela scola!)
par distinguerse in classe e far cariera,
i vien zò a cavalon de la ringhiera!
Sto sventolar de còtole, sto ciasso
fato de bagolessi e bonomia,
se, da una parte, el te metea un tremasso
quei tri lumini a oio e «così sia»,
el «Cristo» che l'è sempre in agonia,
seco, inciodà, che no 'l destaca un brasso,
parea el disesse: Pur che no i se mala,
vegna i putèi da mi zò par la scala...
Se una pora sposéta apassionada.
parchè el marì no porta a casa schei,
piomba zò dal so buso, desperada,
co le mane, diremo, nei cavei:
-Ci ghe cava la fame a i me putei? -
la ghe çiga davanti inzenociada...
Risponde el Cristo coi dovuti modi:
-Dona, guardè, anca mi, son pien de ciodi!-
Invesse, se l'è el solito impiegato
a la Banca del...Loto e co la luna
sempre in traverso par quel tristo stato,
de dar via firme e cabale e fortuna
e a lu no ghe ne va ben gnanca una
e sul camin ghe dorme spesso el gato...
Dise el Cristo sul pato de la scala:
-Pensa, che mi son nato in te 'na stala!-
Eco, che al primo pian, vive 'na mata
de siora, che mantien, l'unica, un lume
co l'oio bon, che i consa la salata...
Ma ogni altro dì la sfodra un qualche costume
e nastri e guanti e capelini e piume,
e ancora no la par ben sodisfata...
Brontola el Cristo a sta galanta dona:
-Conta, le spine de la me corona!-
E al so degno marì, che da vint'ani
vien casa tondo come un barileto,
dai gran goti trincadi, fra i bacani
de continue baldorie o un qual bancheto:
-Ele ore queste de corgarse in leto...?
Digo, ele ore queste da Cristiani?
Parlo con lu, sior conte, co la bala!-
-E ti, ci sito?
-El Cristo su la scala!-
-Giusto lu, che l'è santo e l'è divin...
(risponde l'altra de la via, campana)
Com'ela stada... là, in quel tal festin...
Un presso poco a l'epoca romana....
Speta, che pensa... No...! Nosse de Cana,
che el g'à cambiado l'aqua fresca in vin?-
-Si, l'è sta un bel miracolo e anca bruto;
ma ti, brigante, te lo bevi tuto!-
E così tuti i giorni l'è una scena,
un contrasto, una bèga, una passion
tra quei, che spesso salta via la çena
e quel, che crepa da 'na indigestion,
ci mena vita de consolassion
e ci la passa quasi sempre in pena...
Solo, sto poro Cristo, tra i cristiani,
l'è l'amigo e el dotor de tuti i piani!
a cura de www.larenadomila.it
TEMPO IN MOTO (14 SONETTI)
I
LA PIOVA
Quela matina, che Dio fa la piova,
me sento cocolar da 'na caressa...
L'è un augurio vissin de bona nova,
che me mete in amor de gentilessa;
e con più che me par, che la se mova
chieta, chietina, come l'oio, e spessa,
mi no ve posso dir cossa che prova,
ma l'è come piovesse contentessa!
Gh'è ci se gode a strologar le stele
o la luna in t'el posso, el sol che brusa,
e mi invesse no studio, che le ombrele;
parchè penso, che i òmeni, sti mati,
i se ghe sconda soto co la scusa,
che el Signor no ghe lesa i so pecati!
II
EL VENTO
Altro compare, che me vol contento
e con più che el barufa più el me piase,
quando co i veri el fa tremar le case,
se lo volì saver, l'è propio el vento...!
Far malani, l'è el so divertimento:
se dorme un fogo, el supia su le brase,
el ghe rompe le ore anca a le rase
e i àlbari se piega al so tormento...
Nei camposanti el te spaventa i ciari,
ne le ciesete el sona da romita
e el pascola le vele intorno ai mari....
In politica, el va par la più drita,
che sventolando pulpiti e sipari,
el fis-cia le comedie de la vita...!
a cura de www.larenadomila.it
III
LA NEBIA
La nebia, fioi, l'è quela çénar grisa,
che la par tamisada in çimitero...
Quando che l'aria ciapa udor de fero
e la se mete intorno sta camisa,
tuto de colpo l'ocio se spoëtisa,
par mi no so qual magico mistero:
parlo con Toni e me risponde Piero...
Baso Nineta e l'è la vecia Lisa...!
Messa in màscara e in balo sta gasèra,
la vita te deventa un carneval
dove tuti la fa a la so maniera...
Te ciami, par esempio, un vetural
parchè el te porta a finir ben la sera
e quelo te compagna a l'ospedal!
a cura de www.larenadomila.it
IV
LA NEVE
Zà, che a 'na çerta età i ossi i ne cioca
e s'è moli de suste e de çervel,
penso a la bela neve da putel,
che se cantava: Lassa pur che fioca...!
E sù puoti co la pipa in boca,
e zò bale al bersalio in t'el capel....
Adesso, che me nevega sul pel
me toca brontolar: Dio come fioca!
E da po', che la Moda un fià veciota,
ne g'à piantado su la testa, greve,
tanto de cana e la pipeta in boca,
cosa ne resta de sta vita oca?
Semo tornadi al òmeni de neve,
pronti a cascàr co l'ultima balota!
a cura de www.larenadomila.it
EL RECIN
La me morosa l'è da la «Carega»
bona come la pasta sfoiada....
Mai, che la perda un'ora de botega
e la lavora de la desperada...
Ma quela volta, che la taac bèga
par 'na roba da gnente, 'na fumada,
eco, la salta su da la carega;
ansi, la salta su da la contrada!
Ah, no ghe pol calmanti o camamila
nè «nine nane» o dindolar de cuna
par quele rabie carghe de morbin...
Ma, nel furor 'na lagrima ghe fila,
zò par la bela facia co la luna...
Fermi, Nineta! T'è cascà un recin!
a cura de www.larenadomila.it
LA PASSION DE LA NINA
Névega a fondo...! E propio ancò che el fioca,
Nina, te pari un saco de pensieri,
che te sbati el nasin su par i veri
e no gh'è verso, che nissun te toca...
Forsi sta casa la te par pitoca,
mi, che te donaria palassi intieri?
Te passa un lampo nei to ocieti neri,
Si! te trema una voia su la boca...!?
-Eco... no so... La vita, che se lese,
l'è fata de vulcani e teremoti
e mi ancò no g'ò in cor, che copi e sese;
e col treno, che parte a diese boti,
sgolo anca mi de furia al me paese,
a becàr, a patir co i passaroti!
Dirghe de no? me n'è mancà el corajo...
G'ò consegnà un careto de biscoti:
-Tolì, bechè, corì, cantè e bon viajo!
a cura de www.larenadomila.it
PRIMAVERE
I
EL PRIMO PULSO
Scapa l'Inverno a cavalon del giasso,
co le brume e el coredo dei ninsoi,
gh'è par volta un respiro, un canto, un ciasso
de cavalini in cubia e sonaioi!
i veci se fa trar sangue dal brasso,
giubila i canarini e i rossignoi
e zò in piassera, soto el me palasso,
gh'è una giostra de çercoli e de fioi!
Fora, in campagna su l'orin del fosso,
le violete te ride soto al naso
e i galeti se beca a più no posso...
Ma le siore le usma in te 'l corpeto
(che j è curiose come San Tomaso)
el primo pulso, che à trovà paneto!
a cura de www.larenadomila.it
II
LA GRAN TROMBETA
La primavera l'è una gran trombeta,
che ciama i buti su da soto tera
e a tuti la ghe fa de bela çiera,
a secondo l'onor, che se ghe speta...
Eco, in campagna, pronta la caseta
co i veri verti a quei che nasse e spera;
e ai buti siori, calda anca la séra,
se a qualchedun ghe bate la tosseta!
I gardelini in gabia i canta ciaro
e i te sbate le lae in alegria,
anca se un ciodo li tien fermi al muro...
Viva la vita e ci ne sa più caro!
Eco, l'organo el sona, el trota via,
e passa 'na fanfara, col tamburo!
a cura de www.larenadomila.it
III
LA SCAMPANELADA
Quando sospira l'aria de la sera
(una specialità del me paese)
che el biancospin spanisse per le sese
e se increspa ne i fossi la pavèra...
Mi vedo, che Madama Primavera,
soto un àlbaro rosso de çirese
(Siti! par carità, quei che me lese)
co un so colpeto de la man ligiera,
la mete in moto, màneghi e testine...
Capita fora i grii da soto tera
e le çirese ponte e birichine,
davanti a 'sti cantanti de parada,
come disposte s una sonaiera,
le ghe combina una scampanelada!
AUTUNI
I
NOVEMBRE
Eco le vigne, che deventa rosse
e le insanguena i muri, intorno al brol;
i pomari, i perari, a colpi, a scosse,
i destende tapeti al vento, al sol...
Gongola i Santi! Fùmega le fosse,
dove i morti se comoda el ninsol...
Ma le lodole canta ini de nosse,
ma i morosi se buta i brassi al col!
Ah, San Martin, che gusto; che te trovo
co le castagne, fruto sano, onesto,
'arente a sto barileto de vin novo...
Dame metà del to tabar, che tremo
da la paura, che el finissa presto...
-Porca miseria! Spina, che trinchemo!
a cura de www.larenadomila.it
II
EL PACHETO
Visto che el vento sbate zò le foie,
come la burascà de stamatina,
me son pensado(ma sentì che voie)
de mandarghene un paco a la me Nina...
G'ò messo drento tute le me doie
vecie oramai con su la teraina
e le bolete de le tante gioie,
çerto insognade in cissà qual vetrina!
Parte le foie e l'è la roba istessa
(g'ò scrito) de la vecia poesia,
che la move le ale par scomessa -
che se fida de l'aria e la va via
a caval de un saludo e una promessa,
col so fagoto de malinconia!
a cura de www.larenadomila.it
III
EL «DRIN DRIN» DEL MENAROSTO
E l'Otobre le canta le belesse
de ste sere impastade de alegria,
che da dopo sonà l'Ave Maria,
l'è tuto un «zentildò» de teneresse...
Streti intorno al camin, fra le grandesse
de 'na bampa de fogo e la magia
de quel finco montan (cosa che el sia,
che el se tien tuto el so bon ne le amaresse!?)
'Na spedà de 'sti osei, da Nane, l'osto
col vin novo, del nostro, de Verona,
eco una sera che me fa contento,
anca se el cor ne dà l'avertimento,
quando el campanelin ciama, che el sona:
«Guardè, che no se ferma el menarosto!»
a cura de www.larenadomila.it
LA MUSINA DE TERA
I
Parlo a quei fioi, che ghe sucede spesso
de palparse el tacuin par le scarsèle
e ghe ponse ogni tanto el golosesso
de gelati, pastissi, caramele....
E quando tra una bibita e un smorfiesso
i sbandona le savie paparele,
come se pol sperar studio, progresso,
se i se lassa inganar da ste candele?
L'è cossì, che sul bel de la matina
dopo una note trista e burascosa,
pori i me fioi, ghe vol la medissina...!
ma mi g'ò 'na bevanda più famosa,
che l'è serada drento in sta musina,
Tolì esempio de qua, de sta golosa!
II
Gavì fede e imparè - fèghe bon viso
a sta facia contenta de serveta...
No la g'à i oci e sol par boca un sfriso,
ma la vede distante, da profeta!
La ve sicura un posto in paradiso,
e la g'à la poesia de una caseta;
'na pretesa da Banca e el bel soriso
de la persona, che fa vita chieta!
Ela no la se dà gnente de bota
e l'è piena de forsa e de talento,
pur essendo impastà de tera cota....
Stòmego forte! - Intanto che discoro
la se sgonfa de ciacole de argento
ma no la parla.... Che silensio d'oro!
a cura de www.larenadomila.it
A L'OSTARIA (MONDO DE CASA VECIA)
(Fantasia)
Gh'è Marso, che sgonfa le tende...
Me par, che un batel fassa vela...
Gh'è drento i me sogni de tela
che nasse, se sgranda e partende
far forsa, diman, sul destin!
Gh'è in barca notissie stupende:
un mar de promesse par Nina,
fagoto de carta velina,
che gnente de gnente comprende
del nostro pitoco destin...
Sonar 'na campana se sente,
la barca l'è bela che in porto,
ma drento desteso gh'è un morto...
Aiuto cristiani! Vien gente...
L'è el nostro amoroso destin!
-Parona...
-Comandi?
-Un quartin!
a cura de www.larenadomila.it
CASETE DE MONTAGNA
I
Le casete de montagna
no le pensa e no le magna...
Comodade sul so verde,
tra el pociò de la fontana,
te le incontri e le se perde
come el son de 'na campana....
Se te capita un momento
de çercar late o conforto,
stala verta... muso drento...
Ciò! Te cati tuto morto!
Forsi, un ramo de garofoli
moreloni, color vin,
un saludo in zò i te sventola
dal bancal del finestrin!
II
Le casete de montagna,
le va al bosco e le guadagna...
L'è, che al bosco, chiete, chiete
sona e pascola le manse;
sbalsa in giro le cavrete,
da la barba co le franse...
E i putei çerca le ampomole,
more, fragole, noséle
(queste qua po' i se le màsena,
fra l'assal de le massele...)
Vecie e spose fa la legna
par l'inverno lì vissin,
pur che alegro se mantegna
el penacio sul camin... !
III
Gran silensio in de ste vale,
quando el capita che fioca...
Ah, nissuni ghe lo toca
sto magnifico de sial!
Sol 'na note, par miracolo
da pacifici costumi,
le casete impissa i lumi,
come un segno de sponsal;
e vien su scarponi e sòcoli,
col so passo greve, greve,
che i dissegna su la neve,
la Vigilia de Nadal!
IV
Quando sbroca Primavera
e se anima le sese,
le parone de le ciese,
dà l'anunsio su la tera...
Eco, torna i mandriani
co el vache inverso al monte,
che sgambeta in parte i cani
drio a le pegore bisonte...
E su l'alba in te i paesi,
a scoltar sta procession,
i sentensia: j è i Malghesi,
che dà el cambio a la stagion!
le casete de montagna,
se parecia a far cucagna!
a cura de www.larenadomila.it
EL ME STUDIO
Ne la càmara che vivo,
gh'è una vecia scrivania
piturada in verde olivo
a fioreti de gasia,
che me mete in gelosia,
ogni volta che te scrivo...
«Tiche tac» quando el camina,
g'ò un macaco de oroloio,
che me ponse, che le me spina
sentensiando come un sfoio:
che la vita l'è un imbroio,
che la morte l'è vissina...
Una mata de lucerna,
co 'na çiera de bigota,
la tontona: vita eterna,
mi g'ò un bel caval che trota,
che i chilometri no'l nota,
e l'è l'omo che se inverna!...
Quasi questo no bastasse
anca mi g'ò quela pèca
de ficar dei libri in casse
con su scrito: Biblioteca!
Tuto tempo che se spreca,
par finir fra quatro asse...
Co sta gente massa seria,
e in sì fata compagnia,
eco, impasto la materia
col levà de la poesia;
e in pacifica armonia,
godo e canto la miseria.
Ma ghe vol filosofia!
a cura de www.larenadomila.it
I DIAVOLI IN GIRO
(Tempo de Marso)
I
L'aria l'è tiepida secondo l'ora....
El sol, le nuvole sbusando fora,
come el trapassa tuto sconcerta
e dopo el lassa la porta verta...
Che educassion!
Tuto gh'è lecito
de sta stagion...
II
Siga sui càncani finestre e scuri;
gh'è in giro i diavoli che sgrosta i muri;
in casa «pùnfete» ussi e antiporti,
zuga co i spiriti de i nostri morti...
O che passion!
Tuto gh'è lecito
de sta stagion...
III
Çerto del torbido drento in cusina,
cogheti e sguàtare, lassù i combina...
in fin le nuvole color de late,
sforsando i cuèrcioli de le pignate,
le va in balon!
Tuto gh'è lecito
de sta stagion...
IV
La Nina in gringoli fa capriole,
e tuta sgrendeni la va par le viole...
ma se la pissega qualche moscon,
j è sante sventole da inquisission...
Che educassion!
Tuto gh'è lecito
de sta stagion...
a cura de www.larenadomila.it
IN TEMPO DE VILOTA
I
La sciarpa, che g'à al colo Verona
l'è un drapo verde propio de quei fini;
el ghe la giusta l'Adese in persona,
che l'è el più moscardin dei moscardini
la sciarpa, che g'à al colo la Verona...
Ah, l'è propio un regàl, che l'è un portento
crompà sui monti de la via de Trento;
l'è sta pagà col sangue dei alpini,
che de l'italia j è i più moscardini!
II
El Montebaldo e le ariète fine,
manda le teste calde in visibilio...
L'è un Padreterno quando el va in scompilio,
l'è un firmamento pien de stele alpine,
el Montebaldo e le Montebaldine...!
El g'à soto de lu, del so comando,
el gran lago de Garda, che l'è grando,
come el mar de Venessia in gondoleta...
Vojeme sempre ben cara Nineta!
III
San Zen che ride e paparele aclde;
questo l'è el gonfalon dei Sanzenati;
le paparele le ghe vol bel zalde,
e i Veronesi, che i sia tuti mati...
Le Sanzenate, jè more e spavalde,
e Daloca le mete in te i ritrati!
San Zen che ride e paparele calde;
questo l'è el gonfalon dei Sanzenati!
IV
Se l'«Arena» la fusse 'na scudela
piena de late, se andarìa in barcheta
e se gh'è vento, pol scusar da vela
le tende de la nostra camareta...
Ogni tanto pescandome in scarsela,
se metaria a pociar 'na pagnocheta...
Così se passarìa ore beate,
sempre in barcheta e pransi a pan e late!
V
La me morosa l'è da Castelroto,
l'è spesso a la finestra e mi son soto;
mi ghe son soto e se ghe buto un baso,
ela me scaraventa un fior del vaso...
L'è in 'sta maniera e co 'sto galateo,
che l'ò sposada sensa gnanca un scheo!
VI
La me morosa l'è da la «Carega»,
e se la scrive la g'à un bon vinciostro,
le letare la scrive e la le sbrega
par ci sa qual dispeto o un qual rimorso...
Ma un giorno g'ò capido da un discorso,
che no la vol lassar la so botega,
ch'ela l'è 'n'agneleta e mi son 'n'orso...
E la ghe sente poco che la sposa,
parchè la vol restar la me morosa!
VII
La Cioci, che l'è nata in Val Pantena,
l'è come çertti siori de la pigna,
che i coltiva la fame an dopo çena,
parchè de smagnassar no l'è mai piena.
Ghe piase la polenta col pocieto
e co l'è sgonfa la capìna in leto;
la ghe dà un gran supion su la candela
e la sogna un marì frito in padela!
VIII
La me morosa la sta in Val de i Lasi
e la g'à i rissi tuti quanti d'oro...
E la lo sa de averghelo, un tesoro,
tuti quei rissi da robar coi basi...
E la pensa de farse coi cavei,
manini al colo, brassaleti, anei,
fin le pianele... Ma la sbaglia strada,
parchè la restarà puta e pelada!
IX
Se volì sentir una de bele
ecola fresca, che vien l'aqua in boca:
la Rosina dei prè, l'è tra de quele,
che se maridarà quando ghe toca.
Ma de note o de giorno, sventa o fioca,
se soto la finestra sua de ela,
se g'avesse a fermar 'na timonela,
qualunque ghe sia su, santo o demonio,
l'è el sposo, che vien torla in matrimonio!
Ma la gente la ride in fina mai,
parchè el so damo el ciaparà el tranvai!
X
La Catina l'è su da Cesanova,
ma no la porta amor ai forestieri...
Se la de incontra uno sui sentieri
la ciapa el bosco, che nissun la trova
o la fa finta de çercar l'erbeta,
l'erba che dise «Guarda e no tocare...».
I foresti, la crede una cavreta
e i la lassa lì chieta a pascolare!
XI
Se no son belo no so gnanca bruto,
ma son pien de morose da par tuto!
E g'ò una moroseta in Val de Poro:
ela l'è bionda e mi son gato moro -
moro quel gato, che g'à lustro el pelo:
tuti me cava tanto de capèlo!
E g'ò 'na gran signora a Cà de i Dai,
che la conduse al pascolo le pài....
Pò ghi n'ò una, ma parlar no posso,
che me mostra la luna in fondo al posso...
E ghi n'ò 'n'altra, no ricordo an dove,
che la vago a catar quando che piove;
e quando piove l'è cosìta bela,
che me la porto via soto l'ombrela...
E ghi n'ò ancora perse par el mondo,
che me ciama de note e no rispondo;
çerte, me core incontro a brassa verte,
e mi me fico soto de le cuerte....
Se no son belo, no son gnanca bruto,
ma son pien de morose da par tuto!
a cura de www.larenadomila.it
LA CABALA DEL GNOCO
Eco qua, mondo pitoco,
la gran cabala del gnoco!
Drita in mèso a la cusina,
co la càpola de gala,
me comare moscardina,
la se giusta la grembiala,
che bisogna celebrar
el gran Vendri gnocolar…!
Come capita el bon estro,
co 'na ociada da maestro
la marida a poco a poco,
la farina a la patata
e da forte inamorata,
la manipola el paston…
Che el marcia in bigoli,
longhi e sutili
ben tenerini,
come che va…
E ogni tanto ‘na bela infarinà…!
Fin, che via i rùgola,
tochi e tocheti,
oh che gnocheti,
che nassarà…!
E ogni tanto ‘na bela infarinà…
E ti lavora,
gratacasola,
daghe el miracolo
de la parola;
faghe i so brufoli
a fior de pansa,
che in esultansa
i ridarà…
E ogni tanto ‘na bela infarinà…!
Desteso in rango
su la tovaia,
sto fido popolo,
che mai no sbaia,
che a mesogiorno
sfida el canon;
sereno intrepido
chieto onfà l’oio,
che speta el boio
del caldieron..!
E ti lavora
gratacasola,
daghe el miracolo
de la parola…
grata el formaio,
sensa creansa,
che el se ghe intrufola,
dentro la pansa….
E ti destrìghete
butier balosso:
spiuma,desfrìsete,
sàlteghe adosso….
pronti, el risponde
rosso brusà:
Zzzz…zzzz- che el sìsola …
Gnochi, son qua!
a cura de www.larenadomila.it
L'OMO DE BON COR E LA FORMIGA
l'omo de bon cor
-Ci t'à dato, o gran formiga,
la passion de la fadiga?
Ci t'à dà el dissernimento
da distinguar el formento
o una fregola de pan?
la formiga
-Aah, l'è el nostro testamento,
l'è la forsa de doman...
Quando i siori i core ai bagni
o nei boschi su in montagna,
là, tripudia la cucagna,
qua el martirio dei sparagni...!
Par esempio la çigala
che la canta sempre in gala,
ogni inverno la vien qua
a scrocàr la carità...
l'omo de bon cor
-Le çigale, sì, j è artiste,
che ghe manca çerte viste;
pur le deve ben campar....
J è poarete, seche, triste,
ma j è nate par cantar...!
la formiga
-E nualtre, pore criste,
sempre soto a lavorar...
La formiga che lavora
no la pensa a far la siora;
e se anca ghe n'invansa
la perpetua la sostansa...
J è le misere palanche,
le colone de le banche...!
l'omo de bon cor
-Si, va ben, ma dopo tuto
anca el vostro l'è un statuto,
che se pol modificar...
Ma pensève che rimorso,
nel «Giudizio Universale»,
se mancando de socorso,
crepa tute le çigale...!?
la formiga
-Tute storie, tute bale...!
L'egoismo, ometo mio,
no'l rispeta, che el do Dio...
E... nualtre, o vero o finto,
se obedisse al nostro istinto...!
l'omo de bon cor (andando via)
-La formiga m'à convinto!
a cura de www.larenadomila.it
LA LISSIA DE AUTUNO
I
Per amor de la netissia,
che l'è fior de economia,
contarò qua in amicissia
come i «trà sora» la «lissia»,
nel «Da far» de casa mia!
Drento in corte soto al muro
del porton, co i copi in testa,
la fornasa in ciaro scuro
(vecia grinta, muso duro)
tien «coatà» par la so festa,
la «lucifara» caldiera,
del più bel rame slusento,
bravo arnese de lamiera,
pien de fogo e de bandiera,
come un vecio regimento...
Lì vissin, s-ciapada e degna
de la nobile funsion,
'na «catastrofe» de legna,
de brusar la se rasegna
co una vera divossion!
L'è in sta rustega caseta,
l'è in sta vecia farmacia,
che se purga e che se neta
da ogni mal, che la difeta,
la, de casa, biancaria...
II
Sia mame, sia fiole
le strussia, le sgoba,
menando a cariole
fagoti de roba,
che trata a redosso
su l'erba del fosso,
fra antiche canson,
la segna el momento,
la sona l'inissio,
del bel movimento,
del gran sacrifissio,
tra morbida spiuma,
che boie e consuma,
sfadighe e saon...
E none e putèle
cucià su i zenoci,
le spale a le brèle
le sguassa ne i poci,
le sbate la tela,
ninsoi, che fa vela
sgonfadi a balon...
III
Eco dunque, strache morte,
col boresso sempre in dosso,
le comare vien dal fosso,
dindolando drite e storte,
fra le cante de l'amor...
gambe nude e brasso forte,
denti bianchi e viso rosso,
le te sburta, col fià grosso,
le cariole par la corte,
rancurandose el sudor...
Pò a pianin, drento le brente
le dispone con gran cura
tuta la ninsoladura,
che la broda sbrodolenta,
ghe ridona al so candor...
la castalda, sempre atenta,
la governa sta fatura
col sistema e la misura
de l'età vecia nonenta,
con giudissio e con ardor!
IV
In fra tanto, sul far de la sera,
i famegi, che g'à la consegna
de tegnér, soto via la caldiera,
sempre vivo un vulcano de legna,
dove boie, tra aromi, el «çendron»,
dal castel de la negra fornasa,
fa che el fumo del griso «lissiasso»
l'imbriaga de umori la casa,
come el stesse ciapandola in brasso,
come el fusse un secondo paron!
V
voci di famigli
-Done, done eco la boie...
Semo pronti co le moie?
VI
Ben cuertade le tinosse,
con una grossa tela alta,
la gran broda su i ribalta,
che la passa a gosse, a gosse
con l'aiuto del Signor....
E a sto filtro i ghe ciama el «Colaòr».
Qua, le done con sussiego
bagna un déo, le tasta un poco,
co la lengua le trà un s-cioco,
pò, le verse comarègo.
VII
la castalda
-Anca st'ano le me «moie»
le fa fin vegnèr le voie!
1a comare
-Mai tastà in te 'sta cusina,
una lissia così fina...
2a comare
-Propio giusta la bugada,
de un magnifico saor...
3a comare
-Oh, una lissia de casada,
che sà fin de bon udor...
il poeta (commenta)
-Gnanca a un brodo de capon,
i ghe fa ste adulassion...!
4a comare
-Anca mi sensa avarissia
bison ben, che elogi en fassa...
No gh'è autuno, sensa lissia,
ma la lissia vol fugassa...
E che queste le sia case,
che le lèse el me pensar,
parla el monte de le brase,
che le coa sul fogolar...
No le speta, che la torta,
che la pinsa o la putana...
Mi no g'ò la boca storta,
che son fiola de me mama....
No le speta, che la «mare»
par la torta a cusinar,
e se questo è mal parlare
più no stèvene intrigar....
la castalda
-Si l'è questo un bel parlare,
semo chi par contentar!
VIII
Dopo un giorno de sponsada
in quel bagno saldo e flosso,
bison ben che la bugada
la ripassa a salti el fosso,
dove, intorta su a scartosso
i ghe dà la resentada,
par destendarla a sugar...
Fin che bela e che destesa,
fresca e linda da i pecati,
come un'anima de ciesa,
trata là sora una sèsa,
del candor del biancospin,
la bugada e i so «segnati»
la sbandiera in gran festin...
Il poeta (commenta)
-Ma vardè fadighe, fioi,
par dormir fra du ninsoi!?
a cura de www.larenadomila.it
NUVOLA CHE PASSA
(parlata della vallata dei Lessini)
I
Perso coi oci drento a 'n'aqua bassa
(giusto una sera, ch'era a rio piovù)
g'ò intravisto una nuvola che passa,
come un'ombreta, che se perda in su...
E mi, curioso de tegnèrghe a drio
me son, da ingordo, quasi dimandà:
«Tòrnela forsi a casa dal bon Dio,
a portarghe la piova, ch'è vansà!?»
II
E alora, pronto: fermi, nuvoleta,
dèghe de ascolto al parlar mio de mi:
«Poco lontan da qua, gh'è 'na caseta
da i copi rossi e un ortesin cossì;
là, ghe vive cantando la Nineta,
a boca verta tuto el santo dì;
e gh'è una scufia bianca de vecieta,
che i ani tanti, ghe fa dir de sì!
E mi ve prego in gentilessa granda,
nè su qul orto, che el g'à sé che el more
butèghe dóso un secio de bevanda;
nè su quei copi, anè da quele siore,
disìghe, che son mi quel che ve manda,
come se fussi el me spiansin de amore!»
III
Ma spetando a scoltar su l'aqua bassa
quasi el responso de la me preghiera,
eco tornar la nuvola, che passa,
bianca desfada da la trista çiera...
-Oh, che bravura, nuvoleta svelta,
g'avìo dato bevanda al me ortesin?
-Fiol, che disgrassia! Fulmini... Tempesta.
Eco quelo che ho visto e quel che resta:
Una strassa de scufia, sensa testa,
quatro muri, una crosse, un lanternin!
-E la Nina?
-Vestida da foresta,
drento in carossa... Un velo... Un ombrelin!
a cura de www.larenadomila.it
PASQUA
El çiel l'è neto,
come el vestito
de un puteleto,
che fa pulito,
pronto a la Cresima!
Marso, dai venti,
che sa da fiore,
coi so strumenti
(le spassadore)
bate Quaresima!
Se sente in giro
(cosa che el sia?)
come un respiro
de pulissia,
che neta l'anima.
E le putele
canta; Aleluia!
Le paparele,
le se ingarbuia,
sora la tavola...
El çiel se macia
de ponti neri...
Viva la facia,
dei so pensieri...
Eco le ròndene!
a cura de www.larenadomila.it
SANTA LIBARA
I
Ah, Santa Libara
su do scalete,
unica in pulpito
fra le ciesete;
griso el museto
pien de creansa,
paradiseto
de l'elegansa...
L'Adese specia
la to bontà...
Te sì la vecia
de la çità!
II
Te li ricordito
quei diavoleti,
su par le sagome
dei to mureti?
Che sora l'erba
de la grembiala,
zugava a porcola,
batea la bala?
L'Àdese in bona
t'à rinfrescà...
te sì la nona,
de la çità!
III
Ah, che miracoli
che te coàvi:
de gente nobile
fadighe e scavi:
lussi, spetacoli,
statue, scalini,
vecie da ciacole,
barche, molini....
L'Àdese toca
tute ste età...
Te sì la cioca
de la çità!
a cura de www.larenadomila.it
SOGNO DE UN VERONESE A VENESSIA (intermèso)
I
Candida maga, come mai nissuna
sirena al mondo à rimirà le stele:
vita de gran marcanti e de putele,
forsa de vele, che se spense in mar...
Nìo de morosi, in pasto de la luna,
nìo de colombi, che te beca tuta,
quei, che te gode e in brasso tuo se buta,
no te podarà mai desmentegar...
II
Come contarle mi le to caresse,
o indormensada sora eterni legni;
dona de marmo, sgrafà zò da i segni
rossi, de ongiade, del to bel Leon?
Ci desmentegarà le to grandesse,
la to Piassa, el to Ponte, el to Palasso,
le gondole, che fila in «Canalasso»
quasi scapade via da la preson?
Quele gondole negre su i canai,
le par fate de dame e de sospiri
e le se perde in meso ai so rigiri
drento un Rio, soto un troso, in do' le vol
da par tute le parte, sensa mai
quasi tocarse, sensa mai parlarse,
come figure in via de palesarse
e lì uno pronto: «Fermi, no se pol!»
Ecole vive e subito scomparse,
nel gran silensio de i palassi al sol!
III
Oh, che tremendi, quando se lì lese,
i «papiri» del rùstego dialeto
intrapolado de latin.. I «Diese»
del gran consilio veneto segreto,
che te segnava col supremo impero
la strada drita de la dea Rason,
anca se no era sempre veritiero
quel che dasea la «Boca del Leon»!
IV
Cale e boteghe - 'Na parsona sola,
par barufe, par ciassi, par finesse...
I dissegni li fa la frutarola
e i quadri a... oio. quel che frise el pesse...
Fònteghi, busi, bàcari... E qua sede
ricamade co l'oro de zechin,
là, antichità e foresti che ghe crede,
tra 'na ventada alegra de morbin...!
L'è quel morbin, che para via i pensieri,
largo de simpatia, gusto e bontà:
facie de late co i sialeti neri
e uan ruda de franse a volontà;
l'è quel morbin, che fa sorbir le scale
a salti, a trati, de anime in calor,
che i Venessiani par che i g'abia le ale
e a mi, vecioto, me scombate el cor;
che ne le cale tien la gente a righe,
sensa mai dubio la se possa urtar,
come in campagna gira le formighe
su e zò par la scorsa de un morar!
V
O Venessia de artisti e de Madone,
mi, te vòi tanto, tanto e tanto ben,
che te sì fata come çerte done,
che tien drento el più amabile velen...
Te sì de bronso come i to Cavai,
ma sul tramonto te deventi d'oro...
Sì, che i to ponti j è dei canociai,
che ne spalanca el fondo de un tesoro,
come quei canociai fati de carta,
che da putei se combinava su,
pur da podèr fermar prima che i parta
i sogni sbusi de la gioventù!
E mi vedo scapar Bianca Capelo,
co i cavei spampanadi sul balcon
e 'l muso negro del geloso Otelo
e Marco Polo a spasso col «Milion».
Gh'è el galante Goldoni, che me bate,
col bastonsin dal pomolo, 'na spala,
e Marino Falier da le idee mate,
che l'à perso la testa par la scala....
- E ti, che te si qua bel zoveneto,
che te me tiri par el gabanin?
- Ah, mi son mi, quel «poro Fornareto»
che i mantien sempre l'oio al so lumin!
Passa davanti femene in bauta....
'na scurlada de rosso: Pantalon!
E Arlechin consolà de pasta suta,
Colombina e Rosaura in tentassion!
Fin che tra cale e scùrtoli intrigai,
marionete e lustrissimi su i ponti,
co sto sognar, che no finiva mai
me dimandava: Insoma in dove sonti?
-Semo a Venessia, «pare», - eco, risponde
un barcarol, che me vogava al verso;
e do gondole strambe e vagabonde:
«Tolì in brasso quel toso, che el s'à perso».
'Na ridada che scapa...! Quel sengioto,
che fa l'onda sbatendo ne la riva...
Me sentiva mancar la tera soto
e qualcossa de drento che moriva
a poco a poco! - Fis-cia el vaporeto;
ciama una vosse «Per la ferrovia».
Uno me tenta de passa tragheto,
me trovo imerso in te 'na fantasia;
sì, che de colpo, un sguisso, un lampo, un salto,
un sbàtar de ale, un brontolar de ton,
me porta in aria a guardar zò da l'alto,
sequestrà fra le sate de un leon!
VI
«Pax tibi Marce evangelista» spiega
una vosse lesendome el pensier...
Eco l'insegna de la me botega
e sta sera sarò el to gondolier...!
Te porto a spasso sora la laguna,
prima che in l'aqua se indormensa el dì...
Ah, no capita a tuti la fortuna
de viagiar co una bestia come mi!
Eco Muran, la «Roca» del galeto,
che supia veri de galanteria
e buran la «Regina» del merleto,
che se trama la dote in poësia...
La gh'è Torçelo, primo asilo verto
ai sbandadi de grado e de Aquileia
e San Francesco dito del «Deserto»
dove no alberga nissuna fameia!
a cura de www.larenadomila.it
ANGURIE (FRUTI DE STAGION)
Sui banchi de piassa
(lanterne e baloni)
le facie sganassa
dei mèsi testoni...
l'è sagra de angurie,
che va su le furie
da rosse che j è...
'na fila de omassi,
con fato su i brassi
sbatendo el cortel,
i sbraia a gran vosse:
«A taio le rosse!»
L'è un dolçe massel.
O bela Nineta,
che quando te tasi
te magno de basi,
te colmo de amor....
La vuto una feta
del magico fruto,
che el sànguena tuto,
ma sensa dolor?
-«No, no..» la ripete
con nobile incuria:
«Te lasso le fete,
ma dòneme el cor...»
-???
-Sì, quel de l'anguria!
a cura de www.larenadomila.it
APRIL
April! Che impromessa
de fiori e de fruti...
El g'à una caressa,
un baso par tuti..
L'è come un putin.
Le greste del Baldo
j è sempre in sospeto...
Se el sol pende al caldo
gh'è April, Aprileto
con pronto el spiansin.
La luna, in sto mese
no porta disgrassia,
no màsena ofese
ma inchini de grassia
ma onesto sentir;
parchè Primavera,
che amori confida,
de giorno de spera,
de note la invida
al dolçe dormir!
a cura de www.larenadomila.it
EL PRESEPIO DE NADAL
I
Un bò, che fa fumo
scaldando la stala,
un musso a consumo
fin tanto che el sbala...
Drio a cani, che 'baia
pastori vien su....
È nato Gesù,
su un mucio de paia!
II
Nel cor de la grota,
el ciàro se spande
così tanto grande,
che quasi la scota...
Du angeli bate
le ale: Flu, flu!
(O-hà) che Gesù,
l'è in vena de late!
III
Par la solita stradeta
destinada ai più gran viagi,
eco ariva i tre re Magi,
drio a la coa de la cometa.
Carghi d'oro, argento, mira,
i fa sosta a 'na caseta,
do' gh'è scrito su un'asseta:
«Pan e vin, gasose e bira»
-Drin, drin, drin,
fa l'organin...
IV
La Madona la li guarda
co una qual delicatessa,
come a dir: «L'è una belessa»
ma parlar no la se asàrda...
E confusa da 'sta pompa,
tolto in brasso el so bambin,
la lo sconde pian, pianin,
par paura che i lo rompa!
V
L'è un gran cori cori
vigilia de festa,
le pegore in testa,
guarnide de fiori;
cavrete, moltoni,
agnei che fa: mama,
dal gran che i la ciama
da tuti i cantoni...
L'è un gusti, l'è un godi,
l'è un ciasso, l'è un movi:
donete coi ovi,
comare co i brodi...
Camina, camina,
con tuto el bisogno,
par far, che sto sogno
no 'l vada in rovina...
-Drin, drin, drin
fa l'organin...
VI
I palassi de Betleme,
i se impissa tutti insieme
e su in çiel, pronte le stele,
stissa i lumi e le candele...
Ma gh'è un, che mo se gode
e l'è propio l'orco Erode;
che se màsena fra i denti
la gran «strage de 'nocenti»
-Drin drin drin
fa l'organin....
VII
Ma San Bepo, che l'è drito,
messo subito in sospeto,
giusta el basto al so musseto
e el fa vela par l'Egito,
co la sposa e col putin,
e el tol su anca.... l'organin!
a cura de www.larenadomila.it
L'ADIO A LA STASSION
Par quei, che ogni tanto
(sia rose - sia spine)
secondo el so fine,
se ferma in stassion,
gh'è scene de pianto
saludi, moine
de spose, de Nine,
par ogni vagon....
Così, mi, davanti
la cara putèla
posà a 'na sportela
del negro vapor,
se penso ai briganti
che viagia con ela,
'na gran tremarèla
me tòrcola el cor...!
La magno co i oci
sta santa creatura:
«Signori in vetura!»
Bisogna trotar...
Me bala i zenoci...
«Partensa, Venessia!»
Madona, che pressia
che furia de andar!
Un sïolo...'Na tromba.
(Zà el treno se move.)
Do lagrime piove,
sì ben sia el seren...
Ma el fià, che rimbomba
del mostro gigante,
me sbufa distante:
«Te robo el to ben!»
Fra tanto fracasso
(che apena s'el veda)
de candida seda,
saluda un fassol...
L'è imenso quel brasso
tacà al fassoleto...
L'è tuto el direto,
che sbate un ninsol!
a cura de www.larenadomila.it
LA FEDE DE LA LUSSIETA
Quando che i m'à insegnado la Lussieta,
angelo de belessa e de bontà,
la stava a pian teren de 'na caseta
la più poareta de la so contrà...
Un camin da fasseti con un parecio
de cusina mal consa, un sofadin;
cornisete de pano atorno al specio...
Quadri? 'Na Santa Lussia col lumin!
Ah, ma questo, par mal che la ghe andasse,
l'era sempre ben lucido e stissà...
Val più una fede drento quatro strasse,
che in te un Domo de vescovi in çità!
a cura de www.larenadomila.it
LA FORESTIERA
-Neve in pocio, scola el giasso,
raso a tera gh'è l'erbeta...
Ohe, Nineta, dame brasso,
che a pianin, co la fiacheta,
par creansa, e col baston,
'nemo torla a la stassion!
-Ci?
-La riva, me lo sento,
par che el sangue el sponcia, el boia;
l'è una pena, l'è un contento,
l'è un stufesso e l'è 'na voia;
la me par 'na tentassion...
Nemo torla a la stassion!
-Ci?
-Ma senti, no te provi
anca ti 'na contentessa
de galina che fa i ovi,
una qual tal debolessa
fora via de l'ordinario?
Nina, pòrteme l'orario,
che studiemo... Qua a le diese,
gh'è un discreto acelerato...
-Sì, ma el vien tre volta al mese:
«Solo in giorni di mercato».
-Sto direto? Ah, no la schersa!
-Ma no 'l porta mai la tersa...
-Forsa Nina, te fè angossa,
semo zò quasi in ritardo...
Ben, toremo la carossa
per sta dama de riguardo:
l'è 'na fiola de signori,
che no vive che de fiori!
-«Din, din, din»
-Cori, che i sona,
sarà quel da le bolete...
-Gh'è 'na siora, de Verona,
co un gran masso de violete...
Ma la marcia a piè par tera!?
-Ah, l'è qua, la «Primavera»
a cura de www.larenadomila.it
LA SCAMPAGNADA
«Zuga le ròndene - piene de ciasso:
Nineta vèstete - che andemo a spasso...
Sen de dominica - sani e in boresso,
cosa, che capita - no tanto spesso;
(sarà el fumo - de la ramina,
sarà sta el... scuro - de la cantina,
sarà sta l'organo - dei nostri sogni,
che mete in musica - lussi e bisogni...)»
--Dove me portito?
-Lontan, lontan!
--In automobile!?
-No... forsi in tran!
-Scapo su in camara - me vesto in bota
(Basse le ròndene - gh'è el tempo in rota)
-Dio, la bluseta - l'è tuta un buso...!
-Nina, destrìghete - che el çiel fa el muso!
-Semo in miseria...!
-Ma gh'è el talento!
Nina, descàntete - che vien su el vento.
-Anca la còtola - l'è tuta slisa...
(Da qua a momenti... - resto in camisa!)
-Sempre le solite - co le se move...
Tute, le capita... - E adesso piove!
-Ecola pronta - la to putela...!
-Nina, despòiete - son sensa ombrela!
De drìo a le greste - de i monti alti
fumane e nuvole - vien suso a salti...
Le se combina - po' le se sbalia,
come du eserciti - che va in batalia...
Ah, j è teribili - fin da distanti
ste furie sgrendene - vere briganti,
che le se truca - teste e figure,
de bestie magiche - caricature...
Le ciapa a sbalsi - busi e cantoni;
qua gh'è la tigre - là gh'è i leoni...!
(Co una manovre - furba, maestra
fa el so baeto - da la finestra...
'Na ociada intorno- da avanti, indrio,
po' la finestra - se sera e ...adio!)
Gh'è pronta subito - 'na gran sventada,
che in te un momento - spassa la strada,
fa a pugni e sberle - contro de i muri,
tra veri roti - càncani e scuri...
Se move i àlbari - come in delirio,
che i par fin òmeni - soto un martirio;
casca zò a piombo - dei sgossoloni,
che ne la polvat - va a rugoloni;
infin che i diavoli - spacapignate,
mola de tuto - le catarate....
Altri, i più picoli - co i so corneti,
màsena el giasso - par far confeti...
Atenti o popolo - vestì da festa,
a la catastrofe - de la tompesta!
Drento al e nuvole - grise, fumanti,
el par che i sfregola - dei fulminanti....
Un lampo, un brivido - cioca el canon...
Eco, una scatola - verta de ton!
-Dov'èlo el fulmine - done, dov'èlo,
zà che si nate - par far bordelo...!?
-Manca una frecia - manca la coa,
manca la marcia - del «bissa boa».
Eco a l'ordine - Pronti, che el va...
«Crrrac» dentro l'Adese - l'è tombolà!
Trema le case, - stale, fienili,
scuna le ponte - dei campanili
e la me Nina - con gran rispeto,
çerchela, trovela - l'è soto el leto!
Basta! Pacifico - torna el seren...
Va un gobo in màscara - l'Arcobalen!
Torna le ròndene - piene de ciasso.
Nineta, vestete - che andemo a spasso!
a cura de www.larenadomila.it
LE SPIGHE DEL FORMENTO
Bele e drite - alta la testa,
fruto e amor de gran sfadighe,
che ne dà el sostentamento;
sempre unite
a tacar lite
co la fabrica del vento
e el sfrasel de la tompesta,
eco un campo de formento,
col so esercito de spighe,
brusche, pronte, lancia in resta!
Le g'à el rosso de i papaveri,
el «bluatin» dei fiordalisi,
margarite e bianco-spin...
Le g'à l'ombra un fià maregna
de la vigne, sempre pregna,
col miracolo del vin...!
'Na gabàna, un par de braghe
vecie, un grùmolo de paia,
'na figura da canaia
co una testa da brigante,
sensa s-ciopo e sensa daghe,
sensa gnanca 'na medaia...
Eco qua el so comandante:
General «spaventapàssare!»
a cura de www.larenadomila.it
NINA-NANA DE LA NEVE
La fioca da l'alto,
col paracadute...
L'è tanta salute
sul nostro giardin....
Che ris-cio, che salto!
la comoda el leto
pianeto, pianeto,
montando el piumin.....
El çiel l'è de smalto,
scampàna la Pieve....
Se dorme la neve,
fa nana putin!
I rami dei pigni
tastandola nova,
dal gusto che i prova,
ghe bate el morbin....
J è ochi, i è cigni
che marca cucagna,
j è Grandi de Spagna,
che sfogia armelin!
Ma ti, te ransigni
i brassi!? Conforme
la neve che dorme,
fa nana putin!
I bei passaroti,
ciapandola tuta,
i canta: Che bruta!
squassando el coin....
E mi con du goti
de Val Polesela
la neve putèla
marido col vin...
Bèline, puoti,
sbadaci de luna....
La neve te cuna,
fa nana putin!
a cura de www.larenadomila.it
ROSE DE MAGIO
I
Magio me bate
qua su la spala;
çerto l'è l'ala
de la stagion.
Ma le scarlate
rose de fogo,
dimanda un logo
de divossion...
E mi con pronta
grassia le meto
drento un vaseto
su l'altarol,
dove gh'è sconta
la facia bona
de 'na madona
col so bel fiol!
«Madona granda,
che sì la stela
de la me bela
caseta in fior:
lassè che spanda
ste foie rosse,
che j è la vosse
de un puro amor...!»
Via, via sti scuri
fiori de carta;
bison che i parta,
che j è un squalor;
Viam, via sti duri
cori de argento,
ringrassiamento
de un qual favor...
Un sacrosanto
pegno de afeto
gh'è in sto vaseto,
cara preson,
dove ogni tanto
respira a gala,
um cor che bala
de divossion... !
II
Ma se spalanca
'na portesela...
Oh Dio, che bela
Nina che vien...
La facia bianca
coi oci fondi,
da i rissi biondi,
'na rosa in sen...
La dise: Bona,
bona anca questa;
èla 'na testa,
che g'à sto fiol!?
Co la Madona
par che el discora
e mi de sora,
che tiro el cor!
Va ben che tanti
miga cativi
trascura i vivi
dal gran pregar
e i va coi santi
con frati e preti,
parchè, poareti,
no i vol pecàr...!
Ma la Nineta
che fà pulito
g'à pò el dirito
de un fià de cor;
e ti, poeta,
che te me canti,
sbandona i Santi
dame el to amor!
Magio me bate
qua su la psale;
el cor me bala
de comossion...
E le scarlate
rose de fogo,
le cambia logo
de divossion!
a cura de www.larenadomila.it
EL LEORO (L'AUTUNO DEL POETA, intermèso)
I domanda se son cogo?
Ma se l'è la me passion
quel de star davanti al fogo
dove esulta un bel capon,
degna bestia del Signor,
che la vive sensa amor... !
Se pacifico in carèga,
slongo i piè sul fogolar,
sento in mi n'altro che prega
genuflesso su sto altar,
dove sluse coi otoni,
i me veci cavedoni.
E del fogo la cadena
pendolante dal camin,
verso l'ora de la çena,
l'è una musica, un violin,
che tien su zala fumenta,
me comare, la polenta!
Teie lustre, col so cuerto,
brontolando par natura,
le combricola un concerto
da far far bona figura
a 'sto intingolo selvàdego,
che ne fa da companàdego...
Cossa? - un lèoro, fulminado
col me s-ciopo mio de mi;
l'è cascà come un salado
ne la consa del salmì....
Ah, ben pochi cassadori,
pol gloriarse de sti onori!
LA SERVETTA
Toc...
-Ci bate?
LA SERVETTA
-Con Parmesso.
-'Vanti 'vanti...
LA SERVETTA
-Gh'è de là
quel putel, che al stesso presso,
'n'altro lèoro el g'à portà...
-Gnente, gnente manda in drio....
basta el primo.... Basta el... mio!
a cura de www.larenadomila.it
FUMANE
L'è ora e tempo, caro Vitale,
che co la ponta del naso ai veri,
te rima in merito quatro pensieri,
tegnudi a pascolo, qua su in 'sta vale,
dopo un'alegra e sana colassion,
a l'albergo del «Leon»!
Se vive al comodo, cunà dai sogni,
che mete in grìngola la me poesia;
i caretieri de la val de i «Progni»
cioca la scuria e me li porta via...
I pigni de Cerù,
fa co la testa: No te i cuchi più!
A la dominica, finida messa,
i zugadori persi sul stradon
«siè la batuda, quatro la rimessa»
i perpetua le sfide del balon...
A caval de i mureti qualche fiol,
ghe tende ai colpi, che scavalca el brol!
E tuto intorno a piombo de tirèla,
dindola al monte, pronta e sucarina,
l'ua del «Recioto» de Valpolesela,
con San Giorgio e Negrar, degna regina
e castalda del vin de quela «Grola»
che no ghe manca gnanca la parola!
De fassada de mi gh'è do sorele,
che par belessa le ghe n'invansa;
quando le canta no le par più ele,
le g'à el fonografo drento la pansa...
Una la studia, l'altra la lavora...
Cissà mai, che marì ghe salta fora!?
Oh, quante volte su a le «Salete»
vardo co i oci del desiderio
quela cieseta, che fa baète
col muso in crosse fra l'alegro e el serio!
Oh, se podesse cambiar la vita
con quel romita!?
Murar 'na piera de sepoltura,
davanti a l'usso de la sagrestia:
«Di me qui alcuno non si dia cura
che no ricordo più ch'io mi sia».
Ma quasi subito sento una vosse:
Mato, che tuti qua i te conosse!
Zà no gh'è santi, no gh'è Madone,
bison che torna fra la me gente;
me bala intorno çerte Verone,
che a son de armonica cantar se sente:
«Aqua de l'Adese, ombra del Domo,
eco i specifici par sto bon omo!»
Ma intanto, a l'opara, no piantar grane,
dònete un giorno de sta delissia;
qua spiuma el nobile vin de Fumane,
che l'è la fabrica de l'amicissia;
liba a le origini de sto recioto,
che el mussa e el sfragola fora dal goto!
Pensa, che i àlbari perde le foie;
g'ò i oci deboli (scuse no vedo...)
Drento a le càneve, gh'è el vin che boie,
gh'è tordi e lòdole, che gira a spedo...
Tègnete mente i pigni de «Cerù»...
Cioca una scuria, e no te i cuchi più!
a cura de www.larenadomila.it
LA «VIOLETA»
I
La «Violeta» matutina
(stissi e cògoma) la sveia
col cafè de la matina,
tuta quanta la fameia...
El ghe fa «Chichiricì»
el galeto dal bondì!
Bepo Stala, che ghe piase
sta polpeta giovinçela,
el rostisse su la brase
la so mèsa mortadela
e ogni tanto el se fa soto
con un qualche pissegoto.
La «Violeta» polastrina,
tanto pur de dir qualcosa,
la ghe dà 'na cantadina,
po' la fa la parmalosa:
-Sior boaro - la ghe osserva -
m'alo tolto par la serva?
*
Drio al paron, che va a la cassa
(pipa in boca e cor seren)
trota el Fido a testa bassa
co la coa che fa «den den».
Par che el pensa in bona fede:
-Qua de òsei no se de in vede!
*
Pian, pianin, bele, beline
«Cococò» de soto vento,
sampetando le galine
le combina un parlamento...
(No pensando al protocolo,
che le tira par el colo... !)
II
Ma se sente che el congegno
de la casa el trema, el s-cricia...
Ah, la scala l'è de legno,
la parona l'è de cicia:
tanta cicia e tanto lardo
da fatora de riguardo!
E una volta in cusina
se spampàna sta abondansa
la «Violeta» matutina
la va zò de padronansa
e suqassando i rissi neri
la perseguita i mestieri.
La se pirla da ogni banda,
se ocor legna, la le spaca...
(La parona la comanda,
la parona la tabaca...)
Se ocor aqua fresca e sana,
bala i seci a la fontana!
III
Torna el Fido a recie basse
col paron serio, che dopo
d'èssar stado a galinasse
no l'à gnanca sbarà el s-ciopo...
Ah, j è le strussie, j è dolori,
par 'sti bravi cassadori!
*
Da i paesi più vissini
mèso giorno canta in tera:
ne le gabie i gardelini
messi al sol, fa primavera....
La polenta montanara,
fuma in mèso a la panara!
a cura de www.larenadomila.it
PARTE L'AUTUNO
No vedo el momento, che vegna
(magari che el fusse anca ancò)
cromparme un careto de legna,
par dopo sentarme a filò,
le foie contar, che va zò
conforme che el vento le segna.
L'è rosa, l'è giala, l'è rossa:
j è foie de tanti colori...
che more secondo l'angossa
e la qualità dei dolori...
Ghi n'è de vestide da siori,
ma el vento fa tuta 'na fossa!
-Castalda, gh'è gnente de novo?
-Poeta, le solite storie:
la sera vien presto e fa strovo,
l'Autuno, che parte in baldorie!
-Sicuro, l'Autuno... Memorie!
Me penso studente, da novo!...
Me vedo a l'età, che 'naseva
da çerti parenti a Poian,
che l'ua nel casoto tendeva,
insieme con Checo paesan,
co un libro de storia par man...
Che bele dormide, faseva!
Me trovo sul far de matina
sui monti, che bato brocheta;
le nebie de carta velina,
me fa scomparir la çiveta,
e intanto confà 'na saeta,
le lodole in aria camina...
Gran mate ciassade sui monti
coi siori, che stava a la «Vila».
Mi e ela nei boschi più sconti,
'naa man drio la vita sutila,
in çerca de la camamila,
che calma i ardori più pronti.
La sera, che i veci, vecioni
zugava a campana martel,
se ela moveva i ocioni,
dal vecio sofà del tinel...
Ben... Basta... Tiremoghe un vel,
che sento 'na vosse: Baroni!
Ma eco 'na trista matina,
se indorme la bianca vileta;
le nebie de carta velina,
me fa scomparir la çiveta...
Par aria, confà 'na saeta,
i nostri bei ani camina!
a cura de www.larenadomila.it
SAN MARTIN DE LE CASTAGNE
I
Batalia l'Autuno - coi venti giassadi,
su i campi desfadi - che ha perso ogni fià;
e co le caresse - vestide de piume,
ste perfide brume - le stòfega i prà...
Fa i so caprissi el fumo sul camin....
«Bossolo, bossolo, San Martin!»
Carèti de legna - se mucia zò in corte;
gh'è el fredo a le porte - che bate el tam tan...
Lassèmo che el vegna - tegnemose uniti,
coi spedi ben driti - che gira pian pian:
Lodole e tordi bala sul camin...
«Bossolo, bossolo, San Martin!»
II
Le càneve fonde - fodrade de ragni,
le conta i guadagni - del vecio paron,
che in testa a i ordegni - te segna col gesso
i nùmari e el presso - del fusto più bon...
Discorsi confusi là drento fa el vin...
«Bossolo, bossolo, San Martin!»
Sì fati concerti - del mosto, che boie,
ne mete le voie - de un mato cantar;
così che al momento - del fiasco che 'riva,
çighemo un evive - che el fassa tremar!
Bala in corte le foie el so destin...
III
Gran castagne e amissi veci
col vin novo in casa mia...
la cusina sfodra i seci,
la più bela argentaria,
che me sia
stà lassada, da i me veci...
La tovaia de lin, grossa
col parfummo de lavanda,
la ne serve da oselanda
giusto al ciaro de 'na bossa
de «Fumane» o «Bardolìn»...!
CORO A LA PORTA
«Ancò l'è el giorno de San Martin
bevaremo un bocal de vin,
magnaremo sti quatro maroni,
a la salute dei nostri paroni...!»
IV
Sì, in malora le magagne...
Torna al mondo i nostri noni;
su, padele de castagne
su, ramine de maroni;
e vualtri, «Olà», putei,
che sì lì sen a far gnente,
via la scòrsa a i peladei,
drento in l'aqua a fiama ardente:
Salvia, aloro, fenocin...
CORO A LA PORTA
«Ancò l'è el giorno de San Martin
bevaremo un bocal de vin,
magnaremo sti quatro maroni,
a la salute dei nostri paroni...!»
a cura de www.larenadomila.it
L'OMO E LA FINESTRA (episodio)
I
1
Mi conosso a sto mondo una piasseta,
che ghe someia a tante de la specie...
L'era, una volta, el prà de 'na cieseta
piena de crepi in fin sora le recie.
Quando sta ciesa s'à cambià in caseta
pur rancurando le memorie vecie,
ecola deventada un'ostaria,
co una piera par parte: «Ave Maria»!
2
Gh'è davanti la pergola, una vigna,
che la par propio quela del Signor...
Ani in passando, la g'avea 'na ghigna
da malmostosa e de cativo umor;
e parchè, in te un canton, gh'èra una pigna
come arente a malà, prete o dotor,
s'avarìa anca pensà, che miga tanto
lontan fusse lì sconto un camposanto!
3
E l'è stada così: dopo, che l'osto
s'à visto radopiar nome e i lavori
de la cusina, specie in luio e agosto,
quando i marì se rangia da par lori,
giusto pensando de sgrandar el posto
el s'à messo in le man de i muradori,
che scava e scava, j à catado i ossi
de un mondo vecio, che no te conossi...!
4
Sora sta catacomba, ormai distruta,
le tavole imbandide a tratoria,
ofre minestre in brodo e pasta suta,
chè a la fame e a l'amor no se ghe cria;
ci la sa longa el te le conta tuta,
ci la sa curta el te le slonga via
e i ride e i magna e i buta in tera i ossi
de bestie bone, che no te conossi!
5
Ma la piasseta l'era impresonada,
drento un fondo de case uso una scena;
fabriche alte in parte ne la strada,
col sol a fete e col respiro in pena;
gnente osei, fiori gnente, una sbrassada
de finestre color de l'erba sena,
mèse sbaciade, muso duro e sbiave,
come i paroni i fusse soto ciave!
II
6
Una finestra sola, da st'inverno
anca de note, tegne verti i scuri;
no se podea sentir gnente a l'interno:
un lumin... 'na veceta.. ombrìe su i muri...
L'era un someio del Riposo eterno,
se no se vol contar çerti sussuri
e ogni tanto una vosse: Onesta, Onesta,
cambieme la vessiga su la testa!
7
Ma col primo molin de primavera,
eco una forsa, che spalanca i veri
e una figura in màscara de cera,
co i oci fondi stralusenti e neri,
quasi come la fusse una bandiera,
che no g'à più bisogno de misteri,
eco el saludo de 'na man de ossi,
da parte de uno, che no te conossi.
8
Po' quel fantasma el piomba zò in poltrona,
parchè le gambe no le tien in piè;
el varda in giro co una facia bona,
che ancora el mondo el ghe par belo assè...
Par la strada la vita se spintona
par un tanto cussì de marciapiè...
Ma, che suplissio par dei pori infermi,
vivar in mèso a ci no sta mai fermi!
9
Invesse a lu no ghe importa gnente
e secondo le nostre informassion,
l'era un bon sior de pensionà da agente
de una gran casa de speculassion,
che l'è quel'arte de tirar la gente,
da una vita pacifica, al milion,
che po' la Sorte, ne l'orbar maestra,
ghe lo fa scapar via da la finestra...!
10
(Ne la so vita, mai l'ombra de un ciasso;
le ostarie de campagna, el cavalin,
le bele note de mato strapasso
quando l'età de l'omo l'è in morbin,
gnente donete, che te salta in brasso,
gnente bei sogni, che ne indora el vin,
sensa fameia, sensa fioi a balia,
sempre in economia, sempre in batalia!)
11
Con tuto questo el gran Paron del mondo,
el l'à ciamado a una tremenda prova,
a una tortura che no g'à mai fondo,
condanandolo là, che no'l se mova...
Mi, me domando e analogo rispondo:
-Dunque a le volte a no far mal che giova?
Cosa gh'è valso a lu, st'altro suplissio,
de sepelirse vivo in te n'ufissio?
12
L'era un de i so gran divertimenti,
quel de vardar le tavole in piasseta,
la qualità dei singoli clienti,
el modo de spolpar la cotoleta,
fin la finessa de curarse i denti,
la mancia e quel tantunque de eticheta,
che distingue el plebeo da l'omo nobile,
par calcolarghe la richessa mobile...!
13
E quando se fermava un organeto,
la man de ossi, pronta sul balcon,
fasea i saltini come un diavoleto,
segnando el tempo e la consolassion:
e, dopo, ben ligà nel scartosseto,
«Tachete» in tera, el santo palancon
e l'organo paron de le disgrassie,
alsando i oci el rispondeva «Grassie!»
14
Ah, quela testa, che te varda fisso,
inquadrara nel lucido dei veri,
co la rassegnassion de un crocifisso...!
L'è durado così de i mesi intieri,
gialo de facia e fredo come un bisso
la mente sempre ferma a du pensieri:
quel de ingraparse con la man maestra,
ben tacando a la vita e a la finestra!
III
15
Belo partir, ma che nissun s'incorsa,
'na matina de Marso e de nebieta!
Piovisinava! Un prete... Qualche torsa...
Altretanto de ombrele... La vecieta...!
- Onesta, Onesta, me mancà la forsa
e me toca lassarla sta piasseta!
No l'à fato el caval dei sforsi grossi,
par tirarseli a drìo quei quatro ossi!
16
Ma col primo arivar dei rondinini,
eco un portento, che spalanca tuto
e la finestra piena de putini,
oci celesti e l'abitin da luto,
vasi de fiori, gabie de oselini,
sveia quel logo, che el parea distruto...
El nostro omo, con bontà maestra,
l'à vossù benedir quela finestra!
a cura de www.larenadomila.it
LA SAGRA NEL PRÀ (LE CANTE DE LE BELE NOSSE)
I
PREPARAZIONE
IL POETA
-Benedeto quel bon Dio!
che m'à messo in testa un grio!
Ah, stanote, g'ò un'orchestra,
che me ciama a la finestra,
che me tien fermo, insognà...
E l'Istà, da gran maestra,
sbachetando a sanca, a destra,
la dirige in mèso al prà...
I GRILLI
-«Griii...!- Griii...!- Griii...!»
Come semo ben vestiii!
Co la negra palandrana,
drento e fora da la tana,
femo: -«Griii...!- Griii...!- Griii...!»
IL POETA
-Viole, ròndene, clarini
marionete e buratini,
sonaioi de tamburini,
tuti stona da la festa
un'arieta de so testa,
par la sagra de ogni dì!
IL POETA E LE CILIEGE
In fra tanto le çirese,
le più rosse del paese,
le se presta a dar 'na mna.
E j è i mati balonsini,
che se regola ai festini
del boresso venessian...
IL POETA E LE LUCCIOLE
Eco, al son de la chitara,
i slusini i sbalsa in gara...
Se li vede e no se i vede
come un simbolo de fede;
e se impissa e po' i se smorsa,
par miracoli de forsa,
timonando con baldansa
su un barlume de speransa;
come s-ginse in meso ai fumi:
Lumi! - Lumi! - Lumi! - Lumi!
i sarà çirca un milion...
J è de perle una tempesta,
de diamanti una foresta,
che ne ilumina el salon...!
IL POETA E LE FARFALLE
Se presenta da la Vale,
la tribù de le farfale,
con mantilie su le spale,
e i galanti in compagnia...
Le più bele g'à la stola
de un color tra el verde e el viola
ma ghe manca la parola...
Che pacifica armonia!
Co le ale le fa: «Flu»
se confonde el gialo e el blu,
le g'à l'oro sul fissiù...
Oh che lusso, che magia!
Le più tante veste in bianco
e le sgola sora un fianco
e j è bele, che mai più...
Ma se un poco le sta ferme,
eco, salta fora el verme.
Soto i pissi del fissiù...
«Flu! - Flu! - Flu! - Flu!»
II
PRESENTAZIONE
I GRILLI
«Griii...!- Griii...!- Griii...!»
IL POETA
Questi qua j è amissi miii!
J è i me bravi contadini,
se pol dir quasi cusini,
musicanti soprafini
de la Scala de Milàn!
LE FARFALLE
«Flu! - Batèmoghe le man!»
IL POETA
Questa qua j è le çirese,
le più rosse del paese,
gamba svelta e sangue san;
coi so mati balonsini,
e fa parte dei festini,
puro stile venessian...
LE FARFALE
«Flu! - Batèmoghe le man!»
IL POETA
St'altre j è quele dame,
che se impissa da la fame,
che se brusa da l'amor;
j è piutosto grame, grame,
e le more drento un fior!
LE FARFALE
«Flu! - J è debole de cor!»
I GRILLI
«Griii...!- Griii...!- Griii...!»
IL POETA
-Questi qua j è amissi miii:
-Viole, ròndene, clarini
sonaioi de tamburini,
marionete e buratini...
TUTTI
-Scarpa larga e goto pien...!
IL POETA
Gloria e basi a le signore,
che ne visita a 'ste ore,
che ne onora del so ben... !
III
LA GIOSTRA
IL POETA
-Le farfale in te un minuto,
sensa sforso e sensa aiuto,
sensa gnanca far de mostra,
«Flu!» le fabrica 'na giostra,
la più stramba, che se dà.
Visto mai giostra compagna,
nele sagre de campagna,
nè a le fiere de çità!
LE ÇIRESE
Sì dal bon, sì che l'è bela,
ma no gh'è la campanela!
UNA CAPRETTA (dalla stalla)
«Den, den! - Den, den! - Den, den!»
IL POETA
E in te un atimo i me grii
-Bene, bravi «Di' de dii!» -
salta in gropa e su le spale
de le magiche farfale...
E i fa: «Griii...!- Griii...!- Griii...!»
E la giostra la fa «Flu...! - Flu! - Flu!!»
Ah, che gusto, che mai più!
IL POETA
Cosa fale sù le stele,
che tien morte le candele?
Cosa fa la luna eterna,
che no gira la lanterna?
I GRILLI
«Griii...!- Griii...!- Griii...!»
LA GIOSTRA
«Flu...! - Flu...! - Flu...!»
IL POETA
Oh, che gusto che mai più!
*
Bevi el vin, che mete i fumi...
Fa a l'amor, che te costumi,
godi quel che te consumi,
vivi in passe note e dì!
«Lumi...! lumi...! lumi...! lumi...!»
La gran sagra l'è finì!
...............
-Benedeto el nostro Dio,
che el m'à messo in testa un grio!
a cura de www.larenadomila.it
LA COMPAGNIA DE SAN FILIPO NERI
(ballata 1)
SPECI DE VENESSIA
Lina, fior de sapiensa,
col sal de la marina,
dàme la to manina,
che g'à el savio color de la cossiensa....
Giùteme a sgranar zò sta litania,
fata de contentessa e dispiasensa,
parchè te ne vè via,
pian pian... pian pian...
co l'estro padovan
de la filosofia...!
Queste qua fate in pressia
stanse de poesia,
le parla come un «Vico da Venessia»
che no ciapa su el fià de la busìa,
che l'è un specio sincero,
che dise vero al vero,
anca se par la qual
el vero vero canta da cristal...
L'è traverso sto specio, che me passa
la to bona e studiosa zoventù,
el to far de comando e de virtù,
el dondolar de la testina bassa,
quel modo de andar via
co la filosofia,
tegnendola par man
come fusse un can
de 'n'altra cantorìa.
E sempre el specio: co el Setembre scapa,
e i bate le castagne su in Fieta,
le brusche ombrìe del Bocaor del Grapa,
mantien candida e fresca la cesèta.
E le campane de Paderno... Dân,
quele zò a Possagno e de Crespan,
tute d'acordo le se dà la man,
come ne ltre Grassie del Canova,
e con vosse ciassosa,
le se passa la nova,
che la Lina se sposa...!
E l'è propio par qua, par sti sentieri,
che via cantando, in brasso al vecio autuno,
la compagnia de San Filipo Neri,
fa che de scapa qualche volta uno...
Pian, pian... pian pian...
co l'estro venessian...
Tuti lo sa, ma no lo sa nissuno!
a cura de www.larenadomila.it
(ballata 2)
AUTUNO SOTO EL GRAPA
I
La compagnia de San Filipo Neri!
Studio, grassia, virtù, arte e mestieri,
come coamnda el spirito e l'età...
Feste e cantade, luna su i sentieri
(che l'è el lampion de San Filipo Neri)
eco l'insegna de la Società!
-Viva l'otobre, mato par balar!
«Cori, cori bepi, se ti mi vol ciapàr»
II
la sede granda l'era su in Fiera:
quatro mace de casa, la cesèta,
el monumento col so bel «cocò»...
Va i Sartoreli in quel «bon bon» de la vila,
dove se dorme sensa camamila,
via da i bordei de l'epoca de ancò;
dove el Sior Marco, che l'à fato pressia,
el scopriva Bassan, Mestre, Venessia
co lso miracoloso canociàl;
e come che 'l tendea a galine e rose,
in tempo giusto el batea zò le nose,
verso matina, quando canta el gal!
III
E che gite ciassone e moscardine!
Che bone a Sant'Andrea le maraschine,
su par «l'Astego» nastro de candor!
Fasea de ocieto le margaritine,
che le andava a morir ne le manine
de ci ghe cava indovinei de amor...
O a le Fusere de Fieta Bassa,
dove le case j è de antica rassa,
e le conta del nostro «Micielin»....
O zò in Possagno dove Zanesco,
in meso a le fornase, el gode el fresco
e el mete a rosto el grasso Serafin;
Quel Serafin, che à dà stupensa prova
risussitando i gessi del Canova,
che la guera g'avèa sassinà...
Ma lu co la so magica bateca,
li g'à rimessi in gamba, in «Gipsoteca»
con passiensa de arte e carità...
Ste parolone che finisse in «eca»
fa che Possagno sia 'na gran çità!
IV
A traverso el sfoiar dei castagnari,
e i fruti in rosso e oro dei pomari,
piove merleti a ponto d'ombra e sol;
e come che i va in testa a l'Agnesina,
eco che salta sù la madonina,
'pena scapada fora dal ciesol...
Si, che la campanela de le Grassie,
dimesticada a scongiurar disgrassie,
un bruto tempo, el fogo o mi no so;
quasi che el fusse el dì de la Madona,
par miracolo santo,, la ghe dona
el più alegro - da sposi - campanò!
V
Qua el poeta se imagina una tapa...!
Giusto una sera che el guardava el Grapa,
coem verso a un Altar de la passion,
el disea tra de lu: No gh'è candele,
ma se ghe vede ai lumi de le stele,
ma se ghe sente ancora del canon...
E se ghe scolta el far de la çiveta,
l'eco de i veci conti de Fieta
fra «Quatro strade» e el «ponte de Crespan».
E come se impissa un luminario,
subito la Madona del Calvario,
la se presenta co una testa in man!
Sante reliquie - fioi - ossi, penséve,
che i era el perno de la gioventù;
che i ninsoi de la luna e de la neve
a poco, a poco ghe dà el bianco su!
Che le bestie i avea descombinadi,
ossi da morto de boni soldadi,
che tendeva al campeto, a la so Pieve
e adesso invesse no i ghe pensa più...
No i se ricorda più de la so tera,
gnanca magari d'essar stà in guera...
Ah no i g'à in mente proprio gnente, più!
O bona gente, de qualunque classe,
che ghe fè posto a tuti quei che nasse,
dèghe una casa dove i regna in passe;
dèghe un «Ossario» che i se giusta su!
VI
Ma intanto i foghi de le «Quatro strade»
manda intorno l'anunsio a le contrade,
che gira i spedi a vampa de camin...
E va i morosi co le inamorade
e la luna li fulmina de ociade,
e tuto gira par el so destin...
-Viva l'Otobre, mato par balr:
«Cori, cori Bepi se ti mi vol ciapàr»
(ballata 3)
LE DO CIESETE
La compagnia de San Filipo Neri:
Sciensa, grassia, bontà, arte, mestieri,
come comporta el spirito e l'età;
la luna a nolo su par i sentieri,
(fido lampion de San Filipo Neri):
Viva la vita, in gloria e santità!
Soto l'onor de i veci castagnari,
va drito ogni destìn par i so afari,
dopo una tapa a l'Università...
Se de do se ne sposa almanco uno,
«Tuti lo sa, ma no lo sa nissuno»
Eco l'insegna de la Società!
I
E mi penso a la Tina, su, in Fieta
co la casseta de i colori in man,
che la va a piturar la so ceseta,
sora el Lastego in marica par Crespan,
quela ceseta, che el furor de guera,
soto al Grapa, l'avea trato par tera!
Forsi l'è sta par questo ato de amor,
de aver donà a la cesa una caressa,
che la Pitura l'à trovà Scultor,
che tol su da la crea, forma e belessa;
un bel artista de zentil «burbansa»
gran cavalier de i àmoli de Fransa!
E se sente sonar le campanele
de le altre nosse de le so sorele,
nate anca ele soto un bel destin;
che a l'altar de la Patria e ai so guerieri,
la compagnia de San Filipo Neri,
g'à voludo zontar 'n'altro altarin!
Così concludo questa prima parte,
come se fa col zugo de le carte,
che salta fora propio el «sete bel».
E, davanti a 'sta copia benedeta,
eco, me cavo tanto de barèta,
eco, me cavo tanto de capel!
II
Tina del mar, dove che sguissa el pesse,
mi te vorìa sognar te 'na conchilia
e te guidasse Gigi par le tresse,
quele tresse stupende e via sgolar
sora sti montesei de Vilafranca,
carghi anca lori de le batàlie Sante,
che no basta una storia e mile cante,
par poderle nei secoli fermar!
De le «Fornase» nobile poesia
col «Ciesol» de casada fra le rose,
che se parecia a dirve tante cose,
cari sposeti, co tornè da via....
'Rente al gran pósso i batarà le mane
e piovarà fioreti drento al brol,
ve farà inchini fin siè meridiane,
che drento in corte segna el passo al sol!
III
Drento el «Ciesol» che l'è del Seteçento,
'na madona de Gigim in puro argento,
la se trova là sola a sospiràr...
Ah, Tina cara, quela so creatura
la speta anca da ti qualche figura,
che la tegna su alegra a ciaoolar!
Così fra cèse e fra sti Monti-altari,
fati santi dal sangue e la passion,
passa la vita e passa i reliquari
de la guera, de amor, de divossion...
E passarà la vostra vita chieta,
co la benedission tute del çiel...
eco, me cavo tanto de barèta,
eco, me cavo tanto de capel!
a cura de www.larenadomila.it
LA FESTA DE L'UA (congedo)
Col Setembre, scade Autuno
malinconica stagion
e l'è propio el vinti uno,
che se riva a sta... stassion!
Ci desmonta par i primi
se desperde drento al brol
e i se sbecola i arzìmi,
anca quando no se pol....
E co in fati un paron grimo
col so s-ciopo, sempre in giro:
-Guai ci toca qualche arzìmo,
via dal brol, se no ve tiro....
-ohe, paron, dai çento s-ciopi
no sta far tanto bordel...
Bel afar, se te me copi...
M'èto tolto par 'n'osel?
Quando t'eri puteleto,
anca a ti te piasea l'ua
e magari, ghe scometo,
che no l'era gnanca tua!
Pensa, ancò l'è cosa fata:
e la ua g'à la so festa;
dunque l'è una festa mata
co i arzìmi su la testa;
'na girlanda bianca e nera,
che tra el verde sluse al sol;
sbecolemo sta bandiera...
L'è l'Italia, che lo vol!
El paron sora pensieri,
l'à finì col brontolar:
-Tirè zò dei graspi intieri,
ma no stèla sbecolar!
a cura de www.larenadomila.it
GARDA
(coro)
Da la Roca a San Vigilio
gh'è la riva tuta un sol
e le vele in visibilio
le se sgonfa fin al col....
(El vento supia, dal Monte Lupia)
-Canta, canta, barcarol!
Alti e suti i pescadori
co le man te le scarsele,
par la gloria dei so cori
j è l'amor de le putele,
che ghe buta i brassi al col...
(El vento supia, dal Monte Lupia)
-Basa e canta, barcarol.
Da ti, Garda, el lago el spina
le memorie vecie e intate...
L'era tua quela regina,
ch'è scapà vestì da frate
col rosario atorno al col....
(El vento supia, dal Monte Lupia)
-Canta, e pesca, barcarol!
Pesca mò la Garda fonda,
che se sente le campane;
el segreto sta ne l'onda,
che lo tien fra le so mane
in cadene fin al col...
(El vento supia, dal Monte Lupia)
-Pesca e canta, barcarol.
Vien dai monti a verta boca
dei pastori la canson
e i fratoni de la Roca
dà una gran benedission...!
a cura de www.larenadomila.it
| // Podarìa interessarte |
| LÉNGUA + Museo Barbarani + La vita + I Libri + Articoli + Cartoline + Poesie sconossude + Poesie siélte + Dizionario + Menù Canzonieri + 1° Canzoniere + 2° Canzoniere + 3° Canzoniere + 4° Canzoniere + Giulieta e Romeo |