Angiari

ANGIARI
Popolassión: 2.218 Altessa: 17 metri sóra el livèl del mar
Superfice: 13,47 chilometri quadri Comùni confinanti: Minerbe, Rociàra, Legnago, Zèrèa, San Piéro de Morubio.

Angiari, el se cata a 37 chilometri in diressión sud da Verona con a est l'Àdese e a ovest el Canal Bussè. Par questo paese l'Àdese l'è stà una fonte de svilupo economico, 'ista la presensa de un porto, no massa grando, che'l vegnéa utilisado ànca dai abitanti dei comuni vissini, con "scalo" dei burchi che i trasportava una serie infinida de mercansie oltre a legna, giara e sabia. El nome Angiari angiarisecondo i esperti el deriva dal latin "in glareis" ne la giara, molto probabilmente trasportada da le aque de l'Àdese, che in questo paese l'à provocà nel corso dei secoli numaròse piéne. Un documento del 935 el ne parla del borgo fortificado de Angiari "Castrum Anglarii" con céseta e relativa corte, regalado ai Canonici de Verona da Ermengarda moiér de Gandolfo de la nobile faméja dei Gandolfingi-Di Palazzo. Papa Eugenio III conferma ne l'elenco de le pievi veronesi al Vescovo Tebaldo II nel 1145, ànca quèla de Angiari dedicada a S.Michel Arcangelo:"Plebem Englari cum capellis et decimis et quidquid aliud ibidem juste possides". La cèsa atuàl l'è stà consacrada nel 1772 mentre el campanìl l'è del 1842, a l'interno la Circoncision dipinta dal pitór G.Batista Rossi e 'na Santa Eurosia de Antonio Pellegrini. Da 'édar l'Oratorio de Santa Crose del 1523 lóngo el Bussè vissin a la provincial che la va da Rociaréta a Legnago, con dipinti del '500, du altàri de cui uno in marmo del '600 e n'altro più picenìn in legno del '500. Molto bèla l'è la Vila Lando-Murnóvo del '400 con modifiche del '700 ne la piassa çentràl del paese. Famosa l'è ànca la Corte Vidali-Murnóvo definida "la casa grande de Angiari" che nel '700 la gavéa un pósso, un forno, la corte, la càneva, 'na stala, un fienil e 'na barchessa e che 'desso la conserva gran poco de l'aspeto original. Infine da segnalàr l'è ànca la bèla Corte dòminical Avrese a la Paina, con du portali, tóri colombare del '400 e un bèl giardìn. Foto: Césa de San Michél