Badia Calavena

BADIA CALAVENA in cimbro "Abato"
Popolassión: 2.649 Altessa: 470 metri sóra el livèl del mar
Superfice: 26,94 chilometri quadri Comùni confinanti: Vestenanova, Selva de Progno, Tregnago, Velo Veronese, San Mòro de Saline.

Comùne de la Val de Ilasi con le frasioni SS.Trinità, Sant'Andrea, San Valentin e Sprea a nord de Tregnago e a sud de Selva de Progno. In 'stà zona jè stà rinvegnudi reperti de l'età del fero mentre la prima testimoniansa scrita su Badia Calavena l'è del 1040 su 'na lapide, 'ndóe ne vien dito che sóto la giurisdissión del Vescovo de Verona el todesco Walterio, l'è stà costruido un castèl (1037 d.C.) sul col San Piéro. costrussión che parò l'è durà poco e precisamente fin al 1052 d.C.; cossita, al so posto, se vede la nàssita del Monastero de San Piéro con monaci todéschi de l'Ordine de San Benedéto come par l'Abasia de San Zén a Verona. El monastero nel corso dei ani l'éra deventà sempre piassé importante e pién de schèi, grassie a le donasioni de vescovi, papi e imperadori. Nel periodo de massimo splendór, verso la fin del XII secolo, grassie a 'na bóla papàl, tra i beni e le propietà de San Piéro se vede ànca le cése a le porte de Verona, Soave, Monteforte, Cologna, cavaión. El 10 dugno del stesso ano, Papa Lucio III scapà da du ani da Roma e rifugià a Verona el consacra personalmente la cèsa de San Piéro fondà nel teritorio de la Calavena, la val che da Tregnago la menàva fin oltre l'atuàl Badia. Nel 1287 el Vescovo de Verona Bartolomeo de la Scala el ciama dei boscaioli-cimbri "Tzimberer" originari del Sud Tirolo, dàndoghe dei tochi de tera in Lessinia par abitarghe e disboscàr in parte. Se vede la nàssita in 'sto periodo dei "Tredese Comùni Veronesi" Cimbri, 'ndóe ne l'elenco dei Comùni del 1326 gh'è Sprea con Progno che sarìa la vècia denominassion de Badia Calavena. La convivensa tra i abitanti de Badia e i monaci nel corso dei ani l'éra deventà sempre piassé dura, con numaròse beghe par pascoli e teréni, come quèla ricordà in un documento del 10 genàr 1333. Nel 1390 i montanari de la zona jè riussidi a difendarse e far prigionieri i soldà de le trupe Carraresi spinte fin qua dopo la batàja coi Visconti. Dopo i Scaligeri l'è la 'òlta dei Visconti e dei Venessiani che i le conferma nel "Vicariato de la Montagna" con giurisdissión de la çità de Verona. Tra el 1424 e 'l 1433 par volontà de l'Abate Maffei vien costruido el nóvo monastero, ai pié del monte,badia ciostro bene 'ndóe gh'éra la cèsa dei SS, Vito e Modesto, passà nel tempo ne le mane de la Congragassión de Santa Giustina de Pàdoa e nel 1443 in quéle dei Benedetini de San Nazàr de Verona. Nel '500 se vede le inmancabili beghe tra i monaci ormai in decadensa e i abitanti par el contról de la zona, declino rivà nel 1529 con l'ultimo abate comendatario. Cossita se vede la nàssita e 'l svilupo de l'abitado de Badia, anticamente posissionà intorno al Monastero e ne la parte alta del paese. A parte la peste del 1630 che l'à sbassà el nùmaro de i abitanti, la vita in sto periodo l'è andà avanti in tuta tranquilità fin al 1797 quando l'è rivà Napoleón. El teritorio veronese el vien diviso in 'sti ani in "Distreti" e Badia l'éra el çentro de quél de la "Montagna". Nel 1810, con 'na riforma francese, tuti i beni eclesiali i passa ne le mane dei vari comuni de la provincia. E intorno a la metà de 'sto secolo, se verifica el fenomeno de la grande emigrassión verso la 'Merica lassando quasi 'udo el paese. Tra le cése, da visitàr gh'è quèla parochiàl, dedicà ai SS. Vito, Modesto e Crescenza su i resti de l'antica abazia, infati de 'sta costrussión gh'è rimasto el ciòstro del '400, el pòrtego, la Sala Capitolàr e 'l campanìl. Drénto a la cèsa podémo amiràr un bèl tabernacolo scolpido e do tele una del Cavazzola e l'altra del Turchi conossù come "l'Orbeto". Tra le figure importanti ricordèmo Don Zocca el "Prete da Sprea" el piassé grande conossidór de le erbe mediche. Curiosi jè i trombini ciamadi ànca "Pistoni" o "S-ciopi da Sagra", armi a avancarica utilisà dai "Pistonieri de l'Abazia" par momenti significativi ne le feste paesane. E se Ve piase caminar alora val la 'pena far quatro passi o par i sentieri in mèso ai boschi o par le contrà par 'édar le case afrescade de Sant'Andrea e de Pergari, la colona con la Beata Vergine co' 'l Butìn a Valcasara de sóto.