Bosco CèsaNóa

BOSCO CESANOA (Boscochiesanuova) cimbro Nuagankirchen
Popolassión: 3.600 Altessa: 1106 metri sóra el livèl del mar
Superfice: 64,81 chilometri quadri Comùni confinanti: Roverè Veronese, Selva de Progno, Séro Veronese, Gressana, Arbedo (Erbeso), Ala TN

Importante Comùn de la montagna Veronese, ciamà da Fogazzaro "la perla de la Lessinia", Boscocesanoa l'è posissionà tra la Val Squaranto e la Valpantena a nord del Séro, al çentro de 'n altopian çircondà da le frassioni Valdeporo, Corbiol, Arzerè, Lughessan e da un panorama stupendo con el Corno d'Aquilio (mt 1.545), Castèlberto (mt 1.757), Monte Tomba (mt 1.767), Monte Carega (mt 2.130), Castèlgaibana (mt 1.805). El teritorio l'a scomincià a popolarse fin da l'antichità come i ne dimostra i reperti del Paleolitico catà a San Giorgio, Lughessan e in Val Squaranto (grote del "Bus del Meo" e "Buso del Beco"). Prima de l'arivo dei coloni todéschi la zona de Boscocèsanoa faséa parte, ne l'alto medioevo, de l'antica Frizolàna e l'éra un possedimento a boschi e pascoli, prima de propietà dei feudatari e dopo, come i ne dise un pochi de documenti, del Vescovo de Verona e dei Monasteri de San Zén (doc. 1014 d.C.) e Santa Maria in Organo (doc. 814 d.C. e 833 d.C.). Con un diploma de Otone I del 969 l'è stà concesso a de la zente de la Valpantena de poder sfrutàr la Frizolàna. Nel 1218 grassie ai canoniçi vien scrito 'n statuto par gestir al mejo la Frizolàna, ma nel 1224 jè scomincià 'na serie de beghe par 'sti possedimenti tra el Comùne de Verona e i canoniçi, che jè andà avanti fin ai tempi de Napoleón. La gestión aministrativa e giuridica de quèla zona, a l'inissio del '200, ghe spetava a un gastaldo mandà dal Monastero de San Zén mentre i Scaligeri i s'à fati dar in feudo i pascoli no dasendogheli più indrio. Nel 1287 i coloni todéschi originari del Sud Tirolo, conossudi come boscaioli çimbri "Tzimberer", jè stà ciamadi dal Vescovo de Verona Bartolomeo de la Scala par ciapar in concessión dei tochi de tera in Lessinia par abitarghe e disboscàr in parte. Par primo l'è stà sfrutà el teritorio de Roarè e pian pian i'a fondà 'na noa comunità a Val de Poro (in cimbro Porrental) che la comprendeva ànca la Frizolàna (Frizzolana). Cangrande I nel 1326 el g'a concesso a la Frizolàna de no pagàr le tasse a Verona, privilegi confermadi ànca da Mastino nel 1350 e da Cangrande II nel 1356. Con un diploma del lujo 1375 el Vescovo Piéro de la Scala, l'à costituido in parochia la Ecclesia Nova dedicà a S.Tomaso no distante da la césa de Santa Margarita come riportà sora la carta de l'Almagià del XV° sec. santa venerà dai Cimbri Se vede la nàssita de Césanoa, ligà ancora çivilmente a Val de Poro. Nel documento del 1391 de Gian Galeasso Visconti, el Comùn de la Frizolàna sensa capologo, el vien nominà composto da Arzarè, Bosco Frizolana, Carcaro, Arbedo, Scole Boscorum e Valbusa mentre no risulta ne l'elenco Val de Poro. Nel 1403 nel Vicariado de la Montagna vien zontà ànca el Comùn de la Frizolàna. Con l'arivo dei Venessiani vien rinconfermadi i privilegi Scaligeri, zà confermadi dai Visconti. Nel 1420 i paróni dei fondi de la Podestaria i à costituido la "Nobil Compagnia", restà in pié fin a la metà del '700, a scopo aministrativo e giuridico de la zona. Nel 1501 al çentro de l'atuàl paese de Boscocèsanoa, a l'epoca Bosco Frizolàna, l'éra stà costruida 'na cèsa piassé granda de quèla de prima 'isto l'aumento demografico, ciamandola con la denominassion "Ecclesia Nova". Da quèla data risulta nei documenti Bosco Frizolàna sinonimo de Césanova. Dal 1501 al 1621, Césanoa capologo del Comùne de Frizolàna aministrà dal "Massaro", comprendea parochia + çentro abitado + la parochia de Arbedo. Nel 1621 con la division dei Comùni de la Frizolàna, Césanoa e Arbedo i deventa Comùni autonomi. Nel 1797 l'antico "Vicariado de la Montagna" l'è stà sostituido dal "Distreto de la Montagna" con Val de Poro frassión de Césanoa. Nel 1850 vien costruido la strada tra Verona e "Bosco Césanoa" e a l'inissio del '900 la cèsa atuàl dedicà ai Santi Benedéto e Tomaso al posto de quèla vècia, mantegnendo la data 1501 scrita sul porton. Tra le curiosità, da sótolinear che Boscocèsanoa l'erà indicà col nome de "Mênderla" ai tempi dei primi coloni todéschi, diminutivo de la parola cimbra "mandar" che vól dir mandria, pascolo. Al dì de ancò l'è deventà un teritorio turistico sia d'istà che d'inverno a Brancheto, Monte Tomba e Malga San Giorgio o in un panorama incantado come quél de la Podestaria. Da visitàr sicuramente l'è el Museo Etnografico "La Lessinia, l'Omo e l'Ambiente" 'ndóe te vien spiegà la laorassion del late, del giasso, del carbon; numaròse le opere d'arte popolar religiosa come le tipiche colonete, steli votive e dipinti de la Lessinia. Da visitàr ànca le sessioni stacade, la Giassara de Grietz e 'l Baito de la Coleta 'ndóe te vien spiegà la produssion del giasso e del late con i so derivadi.