Bùtapiéra

BUTAPIERA
Popolassión: 7.060 Altessa: 38 metri sóra el livèl del mar
Superfice: 17,27 chilometri quadri Comùni confinanti: Verona, Castèl d'Assàn (Azzano), Opeàn (Oppeano), Isola de la Scala, San Gioàni Lupatoto, Vigasi (Vigasio)

Comùn a sud de la çità de Verona con origini antichissime de l' Età del Bronso. In epoca romana, ne la frassión Setimo de Galese gh'éra un vilàio posissionà pròpio lóngo la via Claudia Augusta che la travérsava el teritorio de Butapièra. Analisando el toponimo de 'sta frassión, se capisse che l'è posissionà a sete meiàre romane dal "foro" Piassa Erbe e grassie a de le scoèrte archeologiche in località Zera de Setimo podémo avérghe la conferma de la presensa romana. El nome de 'sto Comùn podarìa derivàr dal nome del fondator del vilàio o de 'na persona ànca se qualcun el dise che 'na 'òlta gh'éra un "terén pién de piere", mentre nei primi documenti se pól catàr in veronese antico, Butapreda, deventà ne la forma atuàl Butapièra. La zona nel XI secolo la faséa parte de la "Campagna" sóto la giurisdissión de Verona e col tempo l'è deventà una de le propietà del Monastero de San Zén. Con la dominassión Scaligera se vede el svilupo del paese e l'inissio de 'na trasformasion teritoriàl con l'union de contrà che i à formado grandi propietà, come nel caso dei Nobili Campagna che i è riussidi a ciapar in concessión da i De la Scala: "pezze di terre boschive, arative e prative con case copate e somarate in contrà di Fragazzole e dintorni". Finida la Signoria Scaligera, Butapièra l'è entrà a far parte del Vicariado de Cà de Campagna composto ànca da San Gioàni Lupatoto, Càdidai, Castèl d'Assàn, Vigasi e Somacampagna con a capo un Vicario eleto ogni ano dai capifaméja con poter giudissiario e aiutà ne la gestión patrimonial da un Consilio Aministrativo con sede a "Cà de Macici". Nel 1416 i comuni che i faséa parte del vicariado i éra riussidi a liberarse da la schiavitù feudal e aministrando col tempo, el teritorio in modo autonòmo fin a la fine de la domininassion venessiàna. In 'sto periodo se vede la nàssita de numarosi fossi par dar da béar a le risare. Un documento del 15 lujo 1585 ne parla de un çerto Zampaolo Brà che'l dimandava a l'Aministrassion de la Serenissima el parmesso de usàr 'na vècia fossa: la quale comincia a Ca' di David, scorre sino a Buttapietra per ritrovarvene d'acqua per unirla con altra acqua di sua ragione per irrigare in pertinenza di Isola della Scala suoi beni. El 5 april 1799 ne la frassión Magnàn ghe stà 'na batàja tra Francesi e Austriaci. In 'sto periodo la popolassión l'è stà sbalotà da un comun a n'altro, nel 1814 faséa parte del Comùn de Castèl d'Assàn, nel 1815 de quél del Comùn de Verona e nel 1820 l'è deventà comune autonòmo. Che travérsa el teritorio comunàl ghe una serie de canài e corsi d'aqua da risorgiva come el Menago e 'l Piganzo che i finisse nel Tartaro. Tra le risorgive piassé importanti e bele de la provincia veronese gh'è quèla ciamada Fontanon de l'Aqua Ciara su la strada tra Butapièra e Raldón. A Butapièra podémo 'dar interessanti case padronali e corti de campagna, come Corte a la Zera del '500 con céseta de San Gioàni Batista, Corte Fenileto e Vila Giuliari a Setimo del '700 progetada da l'architeto Pompei. Ne la frassión Bovo (da l'òmonima faméja provensal) un tempo gh'éra un castèl butà zò da Eselìn da Romàn nel 1234 e a ricordàrlo gh'è ancora un obelisco, mentre la cèsa parochiàl dedicada a San Bovo conserva le pale del Gobbini, Brusasorzi e Farinati. La cèsa parochiàl de Butapièra inveçe (parochia dal 1526 con capelan), l'è intitolada a l'Esaltasion de la Santa Crose e costruida nel XVIII secolo; drénto la presenta 'na pala con rafigurà "S. Elena che adora la Crose" del Ghiarelli e un afresco con la Madona.