Cavrìn

CAVRÌN (Caprino veronese)
Popolassión: 8.371 Altessa: 254 metri sóra el livèl del mar
Superfice: 47,32 chilometri quadri Comùni confinanti: S.Zén de Montagna, Costermàn, Ferara de Monte Baldo, Brentìn (Brentino Belluno), Rìole (Rivóli Veronese).

Cavrin el se cata ai piè del Monte Baldo, ne le vicinanse del Monte Creta e tra el Lago de Garda e la Vald'Àdese. Storicamente in questo teritorio se pól contàr una bòna quantità de posti 'ndóe l'è passà l'òmo preistorico come le Grote de la Val Vecia, de Valmenon, i covóli de la Creta, de cengia Rossa, de la Strisia e del Santo. Dopo molti secoli i è stà costruidi i "Castèlieri" de Pradonego, la Mota, San Michel, Tere Rosse e Frati, unidi da una bèla rete de sentieri "roi" da parte dei Cauri, antica popolassión de origine retica. De qua iè passadi ànca i Etruschi sconfiti dai Celti e sucessivamente i Galli Cenomani e i Galli Boi. Ne l' 89 a.C. iè rivà ànca i romani che dopo resistensa con la popolassión locàl i è deventà paróni de la zona riedificando "Caurin" solo nel 16 a.C. valorisandolo come çentro de lavorassión e de racolta del fero catà a Ferara de Monte Baldo. Tra i numarosi reperti de origine romana, gh'è da segnalàr quél più importante che'l se cata sóto la barchessa de Palasso Carlotti, el cippus "Calpurnus mercator". Dopo la fine de l'impero romàn la val l'è stà invasa da Eruli, Goti, Longobardi e Franchi. L'è passà ànca Re Alboin nel 500 da Cavrin e de questa so presensa gh'è un bèl reperto conossù come "Sarcofago de Campasso" con scolpida una crose longobarda. In questi ani se forma le "curtes" con el scopo de salvaguardàr l'economia local e sucessivamente el "contado" con potere decisionàl del signoroto. Con le invasioni dei Ungari i vèci castèlieri jè tornà de moda, tanto che la zente che l'abitava in fondoval, in riva ai progni, l'è scapà in questi çentri fortificadi. Nel 1193 el Comùne de Verona el riscata el teritorio da Enrico VI dando inissio a un bèl raporto comerciàl con la çità, tanto che le comunità de Cavrin, Pesina, Boi, Ceredel e Lubiara le aquista una propia autonomia aministrativa. Intorno a ogni sede comunàl, ne le zone de colina, nasse novi çentri abitativi come Bera e Montecio o vissin a sorgenti come Passón, Porçin, Vilmesan e Braga o in zone montane come Pradonego. Cavrin l'è stà a le dipendense dei Scaligeri che i avéa concesso la gestión de la val ai Dal Verme e dopo ai Malaspina. In epoca venessiana gran parte del teritorio l'è stà diviso e comprà dai nobili Negrelli, Malaspina, Brenzoni, Nichesola, Carlotti, Gaiter, Zuccalmaglio che i costruisse splendide vile come Vila Nogarola e Vila Negrelli a Pesina, Vila Zuccalmaglio a Cavrin, Vila Cariola-Bevilacqua a Preele de Passón, Vila Colpani a Lubiara, Vila Nichesola-Sometti, Vila Nichesola o de quatro camini, Vila Nichesola-Zambellini e Vila Nichesola-Rigo a Platano, Vila Nichesola-Camis a Onè. Palasso Carlotti che dal 1952 l'è sede comunàl l'è ormai deventà uno dei simboli de Cavrin basta 'édar i afreschi che ghe al'interno, le decorassioni, le statue in tufo e stanse con disegni fantasiosi sui muri come la "sala dei sogni". Nel 1630 l'è comparsa da ste parti la peste dimesando la popolassión; ci l'éra contagià el vegnéa portado al lasareto de Valdoneghe e dopo sepelido nel "Campo de la Morte" viçin a l'atuàl cèsa Ceredel. Nel 1786 la Serenissima conçede el marcà stimanàl del sabo. In questa epoca l'economia local l'è ai massimi livei tanto che se vede nàsar un poche de atività artigianali; i mugnai come a esempio a Valseca e Caiar 'ndóe gh'éra i molini, i ferari a Vilmesan (l'è conservà un majo idraulico), i spremidori de olive (gh'éra frantoi a Montecio e Bera), laterizi (con le fornase de Porçin se faséa i cópi e i quarèi) e cave de marmo (Lubiara e Gamberon). Da segnalàr che ne la Val de Salve Regina da la sorgente de la Bergola sgorga l'aqua del "Campion" che atravérsando la val de Cavrin un tempo el dava "energia" ai molini. Un tempo esisteva ànca le calchere par la produssion de calçe viva e le giassare par la produssion de giasso e la conservassion del magnàr. El 31 majo 1796 i fa visita in questo teritorio i francesi corendoghe drio ai austriaci e butando zo el leon venessiàn. Nel 1801 sparisse le comunità de Cavrin, Ceredel, Lubiara e Pesina con la riforma napoleonica e vien nominà Cavrin unico çentro giuridico-aministrativo. Dopo Napoleón e i austriaci el teritorio el vien colpido da le guere de indipendensa; con el sucessivo passàio a Italia ne l'otobre del 1866 e la crisi economica parte l'epoca de le grandi emigrassioni verso l'estero. Se Ve piase l'arte minor Ve segnalemo i stafoleti dedicadi a la Madona de la Corona a Cavrin, quél de Salve Regina ne le vicinanse de Pradonego e quél de la Madona Adolorada a Boi con tri, quatrosento ani su le spale. Le crosi inveçe jè più reçenti ma altretanto carateristiche come quéle in marmo de le Aque vissin a Cavrin o quèla del Gal a Montecio. Val la 'pena far 'na visita a Passón, località con carateristiche case de pièra e una bèla fontana vissin a la cèsa e Porçin con un bèl lavatoio e resti de le fornase. Oviamente no podéa mancàr un breve discorso ànca par el Santuario de la Madona de la Corona a Spiassi, el più "ardito d'Italia". El se cata tacà via a le rocie a strapiombo su la Val d'Àdese e rifato più 'olte nel corso dei secoli con l'atuàl fassàda (facciata) de fine '800. El simbolo l'è una "Pietà" de marmo con la Madona col Cristo morto sui zenoci. La statua la presenta una scrita "Hoc opus fecit fieri Ludovicus de Castrobarco A:D. 1432" mentre secondo la tradissión l'è sparida nel 1522 da l'isola greca de Rodi, durante 'n ataco dei turchi e ricatada li' tra i sassi del Baldo. Documenti storiçi i dise che nel lógo "de la Corona" ancor prima de l'arivo de la statua gh'éra dei eremiti benedetini. La cèsa l'è stà sgrandada 'isto l'alto nùmaro dei pelegrini da tuta Italia e nel 1985 da segnalàr la visita de Papa Gioàni Paolo II. Da visitàr inoltre la cèsa-oratorio de S.Cristina a Ceredel del XIII secolo, quèla de San Roco a Pesina del XV secolo, la Parochial de Cavrin, quèla de San Martìn ne la contrada òmonima risalente al XIII secolo, quèla de San Roco a Gaon, quèla de Santa Eurosia a Rubiana del '700, quèla de la Madona de la Mercede a Boi e infine quèla de Passón dedicada ai SS. Vito, Modesto e Crescenzio del XIII secolo, ànca se fin al 1933 l'e' stada continuamente modificada. L'è doveroso spendar quatro parole par la cèsa parochiàl de Cavrin costruida a la fine del '700 (su 'n 'antica pieve romanica) con la fasàda in marmo de Lubiara. A l'interno se pól amiràr un vasca batesimale otagonale in marmo rosso fregiada con 'na croçe greca, un altàr in stile baroco con 'na pala rafigurante la "Madonna con bambino e cinque santi" sensa contàr statue e quadri de un çerto pregio. Par ci ghe piase i forti austriaci e italiani, in questo teritorio, in stato de abandono, ghe quei de San Marco vissin a Lubiara e Cimo Grande vissin a Spiassi. Ne la località Platano, con i so 400 ani gh'è un bèl esemplar de "Platanus Orientalis" sóranominado "El Platano dei Bersajeri", uno dei più antichi albari d'Italia tanto da èssar deventà monumento nassionàl.