Erbé

ERBÉ
Popolassión: 1.847 Altessa: 22 metri sóra el livèl del mar
Superfice: 16,10 chilometri quadri Comùni confinanti: Traénsòl, Nogara, Sorgà, Isola de la Scala, Castèlbelforte MN

Comùne no massa grando, sul confìn col mantoàn e traersà dal fiume Tión. Abitado fin da la preistoria e ocupà dai eserciti longobardi, sto borgo el vien segnalà a partir dal IX, come la ne dise la prima citassión su "Vicus Erbeto" del 28 majo 846 quando Engelberto fiól de Grimoaldo, nel so testamento el fa riferimento al paese:"Hacto in curte mea in Erbeto". Erbè no risulta sui diplomi e privilegi concessi al monastero de San Zén de Verona prima del diploma rilassado da l'imperadór Enrico II a l'abate Rozo del 21 majo 1014 "In oedem teritorio veronesi....castèllum Herbetum cum adjacentiis et pertinentiis suis" El castèl e vari possedimenti i vien confermadi al monastero da Enrico III nel 1047 mentre con el privlegio de Federico I del 1163 no se fa più riferimento al castèl ma a 'na corte: "Curte Herbetum cum pertinentiis et distroctu". Con el diploma de Federico II l'Abassìa la ciapa una discreta autonomia aministrativa deventando un vero e pròpio feudo: "Curtem Herbeti, cum pertinentiis, et districtu, Comitatu, et jurisdictione". 'Sto feudo nel 1668 el comprendea Traensòl, Moratica, Roncolevà e Granarolo e i teritori de San Piéro in val fin a tuto el XVIII secolo. Parò no bisògna desméntegàrse che ànca da chi i è passadi i romani che i s'à costruido un vilàio con tanto de ponte. Che pól darne conferma de la presensa preistorica de l'òmo in questo teritorio i è i reperti, catadi durante dei scavi, de oltre 2000 ani prima de Cristo in località Tremolina. Nel 1976 jè stà catadi tochi de ceramica, ossa de bestie, lóngo el Tión, mentre studi più aprofondidi ne porta a conossensa dei resti de palafite, stesse de quéle rinvegnude su le coline del Garda. Nel 1982, in località Castion, invesse, l'è stà ritrovà 'n abitado, con numaròse tombe de l'Epoca del Fero apartegnude a la çiviltà paleoveneta. Da 'édar assolutamente l'è la cèsa de Santa Maria Novela de Erbedel (Erbedello) del IX secolo con afreschi stratificadi che i va dal '200 al '400. Tra i più numarosi da segnalàr quei con la "Madona in trono" mentre quei absidali i dise i sia meno vèci e piturà da Antonio Badile. In contrada Madona nel 1721 l'è stà costruido l'Oratorio de la Madona del Carmine. La cèsa parochiàl atuàl de San Gioàni Batista l'è del 1735 in stile baroco costruida su le rovine de la precedente che l'éra guidà da un arciprete, (se pól notàr ancora el campanìl e 'l presbiterio del 1526) con una sola navada e con quatro capèle laterali in marmo. De drio l'altàr maiòr gh'è una tela de Andrea Voltolini con rapresentà el santo che batesa el Signòr tra i angeli. In paese molto bèla l'è Vila Gallici del XVI secolo, 'na 'òlta abitasion dei laorenti e trasformada ne l'800 in una elegante casa da Gaspare, come ne dise n'iscrission: "A.R.S.-1803-l'opera che gli antenati lasciarono incompleta portò a termine Gaspare Gallici".