Gàzo

GAZO (Gazzo Veronese)
Popolassión: 5.402 Altessa: 16 metri sóra el livèl del mar
Superfice: 56,66 chilometri quadri Comùni confinanti: Sanguiné (Sanguinetto), Sorgà, Nogara, Caselón, Ostiglia MN, Serravalle MN, Sustinente MN, Villimpenta MN
 
Comùne de la Bassa Veronese al confìn con la provincia de Mantoa formà da le frassioni S. Piéro in Val, Pradele, Gazo, Roncanova (sede municipal), Corezo, Macacari e abità da l'òmo fin da la preistoria, come i ne dimostra i reperti catadi ne la zona. In località Dosso de Pol jè stà portà a la luçe un bèl mucio de tombe de la popolassión Atestina. In tuto el teritorio de Gazo bèn o mal, l'è stà catà qualcosa, come i reperti de l'Età del Bronso e del Fer (utensili, ceramiche, folende) e de epoca romana (fibule, vasi, monéde), conservadi nel Museo Archeologico de Vila Parolin-Poggiani. In sto comun ghe passava la famosa via romana Claudia Augusta e quindi se pól pensàr che a l'epoca Gazo l'éra un vicus importante. Con el passàr dei ani 'sto comune l'à mantegnudo la so importansa come i ne dimostra i privilegi concessi al Monastero de Santa Maria Magior da parte dei re longobardi Liutprando e Ildebrando nel VIII secolo, concessioni confermade da Lotario I, Ludovico II, Berengario I e Ugo tra el IX secolo e 'l X secolo. El çentro abitado de Gazo el nasse de sicuro nei primi ani del VIII secolo come feudo de l'Abasia de Santa Maria in Organo de Verona che la g'avéa giurisdissión su la zona fin a l'epoca Scaligera e citado par la prima 'òlta nel' 864 "in loco qui dicitur Gaio". ànca el toponimo l'è de origine longobarda, da "gahagi" che vól dir lógo, bosco recintà, ven. antico "gazo". Le prime testimonianse del castèl del Gazo jè a cavàl del XIII secolo quando gh'è stà numaròse guere tra veronesi e mantoani. Nel 1243 Turrisendo dei Turrisendi messo al bando da Eselìn da Romàn l'è entrà in possesso del castèl insieme con Rizzardo de Sambonifacio, provocando 'na dura reasion da parte del stesso Eselin che l'à fato butar zò la fortessa e un fraco de costrusioni in paese. Ma poco tempo dopo el castèl el rinasse e nel 1277 l'è stà comprà da Alberto de la Scala che nel 1282 el s'à ciapà i privilegi dal monastero de Santa Maria in Organo su Gazo par 29 ani. Ma nel 1319 un diploma de Federico d'Austria el contestava la giurisdissión de l'Abate e confermava l'investidura dei Scaligeri. Nel 1405 el comune el passa dai Visconti ai Venessiani che i mete tuti i beni a l'asta; a 'sto punto salta fora nel 1429 la faméja Giusti che compra tuto e i vien nominadi dal Senato Venesian Conti de Gazo. De la frassión Roncanova gavemo le prime notisie nel 830 quando l'è stà regalà da l'imperadór Ludovico el Pio al monastero de Santa Maria in Organo che nel 1529 l'à introdoto la coltivasion del riso. El toponimo el deriva dal latin "runcare" che vól dir lógo disboscà destinado a l'agricoltura e al pascolo. Altra frassión l'è Corezo (Correzzo) che secondo la toponomastica podarìa derivàr dal latin cornigia "stricola de corame (cuoio)" in questo caso stricola de terén tra do fiumi Tartaro e Tión o in zona inpaludà. Fin al 1928 quando gh'è stà la riforma aministrativa da parte del governo Mussolini, l'éra un comun con frassión Macacari. Verso la fine del XIV secolo l'éra tra i possedimenti de Jacopo dal Verme che l'à costruido 'na fortessa. Col tempo el feudo l'è passà ne le mane de la faméja venessiana dei Cappello. Altra fortessa l'éra arènte el Ponte Molino antico ponte marmoreo 'ndóe ghe passava la via Claudia Augusta. s maria gazzoPradele nel 1369 l'éra feudo dei conti Montanari che i g'à costruido un bèl palasso merlà con tóri. Da visitàr assolutamente a Gazo l'è la cèsa de Santa Maria Magior ricostruida nel 1130 dopo la completa distrussión col teremoto del 1117. Durante i scavi del 1938-40 jè vegnudi a la luçe i resti de le fondamenta de le precedenti costrusioni e mosaici del IX secolo, sensa contàr dei bassorilievi muradi a l'esterno e un interessante lapide che ricorda la consacrassion de l'altàr de Santa Crose da parte de l'Abate Audilberto nel 820. Altra cèsa de una çerta belessa l'è quèla de San Piéro in Monastero ciamada "el Cesón" a San Piéro in Val, tempio antico del XI secolo a crose latina e tór campanaria con finestre romaniche. Rispeto altre cése de la zona, l'éra tra i possedimenti de l' Abazia de San Zén. Sempre in 'sta frassión gh'è la cèsa parochiàl de San Piéro Apostolo del 1674, costruida su n'antico oratorio usado da l' Abazia de San Zén dedicà al Salvator e restaurado nel corso del XVIII e XIX secolo. Altre cése parochiàli jè quéle de Macacari dedicà ai Santi Fabian e 'Bastian, de Roncanova dedicà ai Santi Filipo e Giacòmo tuto e do del '500. A Corezo la "Césa vècia" dedicà a San Gioàni Batista de origine longobarda, l'è una tra le più importanti e piéne de storia de la zona con lapidi sepolcrali e resti romani. Nominada nel Privilegio Rotaldiano del 813 g'avémo le prime notisie scrite parò nel 23 genàr 1307 in un documento dal Monte de Pietà 'ndóe se diséa che la cèsa la dipendea dal Vescovo de Verona. Ampliada nel corso del XVII secolo, drénto la se presenta a navada unica con altàri e afreschi de valòr. E par finìr la Pieve de San Prosdocimo a Pradele, una de le piassé antiche del veronese e ricordà fin dal IX secolo e presente in tempi lontanissimi. Tra i palassi, da segnalàr el Montanari del XV secolo a Pradele, el Capello a Macacari e Vila Lando a Levà de Sóra. Par ci ghe piase la natura podémo consiliar de far un salto a l' Oasi del Busatèl a San Piéro in Val, 'ndóe se pól amiràr la natura incontaminada e un fraco de bestie. L'area che l'è sóto la protession del WWF Italia la se cata su 'n area de 81 etari tra la provincia de Verona e de Mantoa. Foto: Césa de Santa Maria Magior